​តើ​​អ្វីជាលក្ខណៈពិសេស​នៃ​នាវាចម្បាំង​ USS Savannah (LCS 28) ដែល​នឹង​ចូល​ចត​​នៅខេត្តព្រះសីហនុ​​ចាប់​ពីថ្ងៃចន្ទ​​​​​?​

មកដឹង​ពី​អានុភាព​និង​លក្ខណៈពិសេស​ខ្លះៗ​​នៃកប៉ាល់​ចម្បាំង​យោធា​ជើង​ទឹក​​របស់​សហរដ្ឋអាមេរិក USS Savannah (LCS 28) ដែល​​នឹងត្រូវ​ចូលចត​នៅ​កំពង់ផែ​ខេត្តព្រះសីហនុ​​​រយៈពេល​៥ថ្ងៃ​ចាប់​ពី​ថ្ងៃទី​១៦​រហូត​ដល់​ថ្ងៃទី​​ថ្ងៃទី​២០ខែ​ធ្នូ​ឆ្នាំ​​២០២៤ ដោយ​ដឹក​កង​​ទ័ព​ជើង​ទឹក​​​សហរដ្ឋអាមេរិក​​១០៣​នាក់​។

​USS Savannah (LCS 28) ​ជា​ប្រភេទ​នាវាចម្បាំង​​មួយ​​ប្រភេទ​​​​សេរី​​ថ្មី​បំផុត​​​​ដែល​ទើប​ដាក់​ឲ្យ​ប្រតិបត្តិការ​ក្នុង​​ឆ្នាំ​២០២២ ហើយ​វា​​ជា​​នាវា​​ចម្បាំង​ទំនើប​និង​មាន​ប្រសិទ្ធភាព​​​ក្នុង​ការ​ប្រយុទ្ធ​ដោយសារ​​តែ​ការ​បំពាក់​បច្ចេកវិទ្យា​ទំនើប​​​​និង​ទើប​ដាក់​ឲ្យ​ប្រតិបត្តិការ​​នៅ​លើ​ផ្ទៃ​សមុទ្រ​​ក្នុង​ឆ្នាំ​២០២២ បន្ទាប់​ពី​ត្រូវសាង​សង់​​អស់​រយៈពេល​៥ឆ្នាំ​។

នាវាចម្បាំងនេះ​​​ចាប់​ផ្តើម​ទទួល​សិទ្ធិ​ផ​​​លិត​​នៅ​ក្នុង​ខែ​មិថុនា​ឆ្នាំ​២០១៧ ដោយ​ក្រុម​ផលិត​នាវាចម្បាំង General Dynamics LCS Team ហើយ​​២ឆ្នាំ​ក្រោយ​មក​ ពោល​គឺ​ នៅក្នុងខែកញ្ញា​ឆ្នាំ​២០១៩ បាន​​ទម្លាក់​ចូលសមុទ្រ។ ​​វា​ត្រូវ​បាន​ដាក់​ដំណើរ​ការ​សាកល្បង​​​លើក​ដំបូង​នៅខែ​សីហា​​ឆ្នាំ​២០២០ ​ហើយ​នៅ​ថ្ងៃទី​​៣ខែ​​កញ្ញា​ឆ្នាំ​២០២០ ក៏ត្រូវ​បាន​​សម្ពោធ​ដាក់​ឲ្យ​ប្រើប្រាស់​ជាផ្លូវការ។ រហូត​ដល់ថ្ងៃទី​៥​​ខែ​​កុម្ភៈ​​ ​ឆ្នាំ​​២០២២ ​នាវា​ចម្បាំង​នេះត្រូវ​បាន​​ចេញ​​បេសកកម្ម​​​លើក​ដំបូង​​​​ទៅ​កាន់​​​​ទីក្រុង​ Brunswick ​រដ្ឋ​​ Georgia ​ពី​​​មូលដ្ឋាន​សំចត​​នៅ​​ទីក្រុង​ San Diego ​រដ្ឋ​កាលីហ្វ័រញ៉ា​។

យោង​តាម​​​​​​គេ​ហទំព័រ Seaforces.org ដែល​មាន​​ចុះ​ផ្សាយ​នូវ​​ព័ត៌មាន​​​​​​អំពី​​នាវា​ចម្បាំង​ យន្តហោះ របស់​សហរដ្ឋអាមេរិក បាន​បង្ហាញ​ថា ​LCS ​ជា​សេរី​​​នាវាចម្បាំង​ទំនើប​ដែល​កសាង​ដោយ​​ ក្រុមហ៊ុន​ផលិត​នាវា Austal-USA, Mobile, Alabana, USA។

ចាប់​តាំង​ពីឆ្នាំ​២០១០ ក្រុមផលិត​នាវា​ចម្បាំង​​​នេះ​​​​បាន​​ផលិត​នាវា​ចម្បាំង​​​ជាសេរី​​​ប្រភេទ​ LCS នេះ មានដូជា LCS2 USS ​Independence (2010), LCS 4 USS Coronado (2014), LCS 6 USS Jackson (2015), LCS 8 USS Montgomery (2016), LCS 10 USS Gabrielle Giffords (2017), LCS 12 USS Omaha (2018), LCS 14 USS Manchester (2018), LCS 16 USS Tulsa (2019), LCS 18 USS Charleston (2019), LCS 20 USS Cincinnati (2019), LCS 22 USS Kansas City (2020)
LCS 24 USS Oakland (2021), LCS 26 USS Mobile (2021), LCS 28 USS Savannah (2022), LCS 30 USS Canberra (2023), LCS 32 USS Santa Barbara (2023), LCS 34 USS Augusta (2023), LCS 36 USS Kingsville (2024) ​និង​ LCS 38 USS Pierre កំពុង​ដំណើរ​ការ​សាងសង់។

​USS Savannah (LCS 28) ធ្លាប់​បានដាក់​ឲ្យ​សាកល្បង​​​ប្រើប្រាស់​​​ដោយ​ការ​បាញ់​មីស៊ីល​ប្រភេទ​​ SM-6/RIM-174 ពីនាវា​​​ទៅ​កាន់​គោល​ដៅ​ដែលបាន​កំណត់ ក្នុង​សមយុទ្ធ​​​​​យោធា​ជើង​ទឹក​នៅ​​​​ Eastern Pacific Ocean កាល​ខែ​តុលា​ឆ្នាំ​២០២៣។​

LCS 28 ជា​នាវា​ចម្បាំង​​ទី​ប្រាំមួយ​ដែល​បាន​ដាក់​ឈ្មោះ​​ផ្តល់​កិត្តិយស​​​ដោយ​ភ្ជាប់​ឈ្មោះ​​ទីក្រុង​ Savannah ​ស្ថិតនៅ​រដ្ឋ​ Georgia។ ការ​បំពាក់​បច្ចេកវិទ្យា សមត្ថភាព​​នៃ​ការ​ដាក់​ប្រព័ន្ធ​មីស៊ីល និង​ទីលាន​​ចុះ​ចត​ឧទ្ធម្ភាគចក្រ ជាចំណុច​ពិសេស​​របស់​​នាវាចម្បាំងនេះ​​សម្រាប់​ការ​ប្រឈម​ក្នុងសង្គ្រាម៕​

ដោយ រ៉ាន់​ រើយ​