ថៃ កំពុងផ្ទុះ Norovirus ខ្លាំង, វេជ្ជបណ្ឌិតព្រមានឲ្យប្រយ័ត្ន ជាពិសេសខែត្រជាក់នេះ

ប្រទេសថៃ បានចេញការព្រមានឲ្យមានការប្រុងប្រយ័ត្នចំពោះមេរោគ Norovirus អំឡុងខែត្រជាក់នេះ ខណៈបច្ចុប្បន្ននៅប្រទេសខ្លួនឯណោះ កំពុងផ្ទុះករណីឆ្លងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន THAI , គិតត្រឹមថ្ងៃពុធទី១៨ខែធ្នូឆ្នាំ២០២៤ ស្រុក Klaeng នៃខេត្ត រ៉ាក់យង មានករណីឆ្លងមេរោគ Norovirus លើមនុស្សចំនួន ១ ៤៣៦នាក់ហើយ។

ជុំវិញរឿងនេះ វេជ្ជបណ្ឌិត Yong Poovorawan ប្រធានមជ្ឈមណ្ឌលឧត្តមភាពផ្នែករោគវិទ្យានៃសាកលវិទ្យាល័យ Chulalongkorn នៃប្រទេសថៃ បានព្រមានថា អត្រាផ្ទុះមេរោគ Norovirus ក្នុងរដូវរងា ពិតជាមានការកើនឡើងគួរឲ្យកត់សម្គាល់ ព្រោះអាកាសធាតុត្រជាក់ ជួយឲ្យមេរោគអាចរាលដាលរឹតស្រួល។

លោកលើកឡើងថា គ្រប់គ្នាត្រូវអនុវត្តវិធានការបង្ការដូចជារក្សាអនាម័យឲ្យបានល្អ ទទួលទានអាហារឆ្អិន សម្អាតកន្លែងផ្ទុះមេរោគ ជាពិសេសត្រូវទុកដាក់ឬបោះចោលកន្ទបកូនក្មេងឲ្យបានប្រុងប្រយ័ត្នជាទីបំផុត។

តាមពិតទៅ Norovirus មិនមែនជាមេរោគថ្មីទេ ពោលគឺវាផ្ទុះឡើង៥០ឆ្នាំមកហើយ។ វាងាយឆ្លងបំផុតទៅលើកុមារនិងអ្នកដែលមានអង់ទីគ័រខ្សោយ ជាពិសេសអំឡុងពេលអាកាសធាតុចុះត្រជាក់បែបនេះតែម្តង។

វាឆ្លងរាលដាលតាមរយៈផ្ទៃដែលមានមរោគ ដូចជាតុ ទ្វារ និងអាហារ ឬការប៉ះពាល់ជាមួយអ្នកជំងឺ។ រោគសញ្ញានៃការឆ្លងអាចលេចឡើងក្នុងរយៈពេលពី១២ទៅ៤៨ម៉ោង ហើយជាទូទៅអ្នកឆ្លងចេញអាការ ក្អួត ចង្អោរ គ្រុនក្តៅ ឈឺក្បាល ឈឺដងខ្លួន និងរាគ។ បើក្នុងករណីធ្ងន់ធ្ងរ អ្នកជំងឺអាចខ្វះជាតិទឹក ប៉ុន្តែមេរោគនេះមិនបណ្តាលឲ្យមនុស្សស្លាប់នោះទេ៕

អត្ថបទ៖ សុខ សុវណ្ណ