ព័ត៌មានអន្ដរជាតិ

ពូទីន ផ្ញើសារឆ្នាំថ្មីឲ្យមេដឹកនាំកូរ៉េខាងជើង សង្ឃឹមថាទំនាក់ទំនងនឹងខ្លាំងជាងមុន

បានផុស

១ year មុន

នៅ

ថ្ងៃសុក្រ ២៧ ធ្នូ ២០២៤

ដោយ

Chheang

នៅក្នុងសារអបអរឆ្នាំថ្មីមួយដែលមេដឹកនាំកូរ៉េខាងជើង លោក គីម ជុងអ៊ុន ទទួលបានពីប្រធានាធិបតីរុស្ស៊ី បានបង្ហាញពីក្ដីរំពឹងថា ប្រទេសសម្ព័ន្ធមិត្តទាំងពីរនឹងបន្តកិច្ចសហប្រតិបត្តិការជាមួយគ្នាបន្ថែមទៀតនៅឆ្នាំ២០២៥ខាងមុខ។

លោក គីម ជុងអ៊ុន និងលោក វ៉្លាឌឺមៀរ ពូទីន (រូបភាព៖ EPA)

យោងតាមប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង KCNA នៅថ្ងៃសុក្រទី២៧ធ្នូ២០២៤ លោក វ៉ា្លឌឺមៀរ ពូទីន បាននិយាយថា ទំនាក់ទំនងទ្វេភាគីរវាងប្រជាជាតិទាំងពីរត្រូវបានកើនឡើងដល់កម្រិតថ្មីមួយ បន្ទាប់ពីកិច្ចពិភាក្សាកំពូលរបស់លោកជាមួយលោក គីម កាលពីខែមិថុនា នៅទីក្រុងព្យុងយ៉ាង។

ដោយលើកឡើងពីសន្ធិសញ្ញាការពារជាតិដ៏សំខាន់ លោក ពូទីន បានប្រាប់ថា លោកប្រាកដថា «ប្រទេសទាំងពីរនឹងបន្តកិច្ចសហការលើគម្រោងប្រតិបតិ្តការយ៉ាងជិតស្និទ្ធបំផុត ដើម្បីអនុវត្តសន្ធិសញ្ញាជាប្រវត្តិសាស្ត្រនៅឆ្នាំ២០២៥ និងពង្រឹងកិច្ចខិតខំប្រឹងប្រែងបន្ថែមទៀត ដើម្បីទប់ទល់នឹងការគំរាមកំហែង និងបញ្ហាប្រឈមនៃសម័យកាលនេះ»។

លោក គីម និងលោក ពូទីន បានប្រកាន់យកសន្ធិសញ្ញាភាពជាដៃគូយុទ្ធសាស្ត្រដ៏ទូលំទូលាយមួយ ដែលអំពាវនាវឲ្យផ្តល់ជំនួយយោធា «ដោយគ្មានការពន្យាពេល» បើភាគីណាមួយរងការវាយប្រហារ។ សន្ធិសញ្ញានេះបានចូលជាធរមាននៅថ្ងៃទី៤ធ្នូ។

កូរ៉េខាងជើង និងរុស្ស៊ី បាននិងកំពុងពង្រឹងកិច្ចសហប្រតិបត្តិការយោធាក្រោមសន្ធិសញ្ញាភាពជាដៃគូ។ កូរ៉េខាងជើង ត្រូវបានគេចោទប្រកាន់ថាបានបញ្ជូនទាហានប្រហែល ១១ ០០០នាក់ទៅរុស្ស៊ី ដើម្បីគាំទ្រសង្រ្គាមរបស់ក្រុងមូស្គូប្រឆាំងនឹងអ៊ុយក្រែន។

ទីភ្នាក់ងារចារកម្មរបស់កូរ៉េខាងត្បូង បានប្រាប់សមាជិកសភាកាលពីសប្តាហ៍មុនថា យ៉ាងហោចណាស់ទាហានកូរ៉េខាងជើង ១០០នាក់ដែលត្រូវបានបញ្ជូនទៅប្រទេសរុស្ស៊ី បានបាត់បង់ជីវិតក្នុងអំឡុងពេលប្រយុទ្ធ ហើយចំនួនទាហានកូរ៉េខាងជើងដែលរងរបួសត្រូវបានគេប៉ាន់ស្មានថាមានប្រហែល ១ ០០០នាក់៕

ដោយ៖ ឈាង