ព័ត៌មានអន្ដរជាតិ

ហ្វាំងឡង់៖ ការចូលជាសមាជិកណាតូ ទើបជួយធានាសន្តិសុខអ៊ុយក្រែនបានយូរអង្វែង

បានផុស

២ years មុន

នៅ

ថ្ងៃព្រហស្បតិ៍ ៩ មករា ២០២៥

ដោយ

Chheang

រដ្ឋមន្ត្រីការបរទេសហ្វាំងឡង់ លោកស្រី Elina Valtonen បាននិយាយថា សមាជិកភាពនៅក្នុងអង្គការណាតូ គឺជាការធានាសន្តិសុខរយៈពេលវែងដែលអាចជឿទុកចិត្តបានតែមួយគត់សម្រាប់អ៊ុយក្រែន ដើម្បីទប់ទល់ការប្រឆាំងឈ្លានពានពីរុស្ស៊ីនាពេលអនាគត។

លោកស្រី Elina Valtonen (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Valtonen បានលើកឡើងកាលពីថ្ងៃទី៨ខែមករាឆ្នាំ២០២៥ថា៖ «ខ្ញុំគិតថា ក្នុងរយៈពេលវែង ការធានាសន្តិសុខដែលអាចជឿទុកចិត្តបានតែមួយគត់គឺមាត្រា៥ នៃសន្ធិសញ្ញាទីក្រុងវ៉ាស៊ីនតោន ដូច្នេះសមាជិកភាពរបស់អង្គការណាតូគឺសំខាន់។ យើងកំពុងគាំទ្រសមាជិកភាពអង្គការណាតូរបស់អ៊ុយក្រែនបន្ថែមទៀត ហើយសង្ឃឹមថាវានឹងមិនយូរពេកទេ»។

មេដឹកនាំអ៊ុយក្រែន បានអំពាវនាវយ៉ាងមុតមាំចង់ចូលជាសមាជិកអង្គការណាតូ ប៉ុន្តែត្រូវបានជំទាស់ពីសមាជិកសំខាន់ៗមួយចំនួន ខណៈខ្លួនកំពុងមានសង្គ្រាមជាមួយរុស្ស៊ីជិត៣ឆ្នាំទៅហើយ។

លោក ដូណាល់ ត្រាំ ដែលនឹងត្រូវឡើងកាន់តំណែងជាប្រធានាធិបតីអាមេរិកនាថ្ងៃទី២០ខែមករាខាងមុខ បានរិះគន់ជំនួយរបស់រដ្ឋបាលលោក ចូ បៃដិន ចំពោះអ៊ុយក្រែន ហើយបាននិយាយកាលពីថ្ងៃអង្គារថា អ៊ុយក្រែនមិនគួរក្លាយជាផ្នែកមួយនៃអង្គការណាតូទេ។ ជំនួយការ និងសម្ព័ន្ធមិត្តរបស់លោក ត្រាំ មើលឃើញថា សមាជិកភាពរបស់អ៊ុយក្រែន ជាការញុះញង់មិនចាំបាច់ចំពោះទីក្រុងមូស្គូ។

ពាក់ព័ន្ធនឹងបញ្ហានេះ លោកស្រី Valtonen បាននិយាយថា រដ្ឋបាលលោក ត្រាំ នឹងមិនក្លាយជាទីបញ្ចប់សម្រាប់មហិច្ឆតាចូលជាសមាជិកអង្គការណាតូរបស់អ៊ុយក្រែននោះឡើយ។

លោកស្រីបានបន្ថែមថា៖ «កាលពី៣ឆ្នាំមុនគ្មាននរណាម្នាក់គិតថា ហ្វាំងឡង់ ឬស៊ុយអែតនឹងចូលរួមជាមួយណាតូបានឡើយ។ ឥលូវយើងនៅទីនេះ គ្មានអ្នកណាស្មានដឹងទេ»។

សូមបញ្ជាក់ថា ហ្វាំងឡង់ ដែលមានព្រំដែនប្រវែង ១ ៣៣៦គីឡូម៉ែត្រជាប់ប្រទេសរុស្ស៊ី បានចូលជាសមាជិកអង្គការណាតូ នាខែមេសាឆ្នាំ២០២៣៕

ដោយ៖ ឈាង

Related Topics:ប្រទេសហ្វាំងឡង់