ព័ត៌មានអន្ដរជាតិ

សមាជិកអង្គការណាតូក្បែរខាងរុស្ស៊ីរៀបចំសមយុទ្ធយោធាទ្រង់ទ្រាយធំរយៈពេលជាង១០ថ្ងៃ

បានផុស

៤ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

អង្គការណាតូ (NATO) បានរៀបចំធ្វើលំហាត់សមយុទ្ធយោធាទ្រង់ទ្រាយធំដែលមានឈ្មោះថា Cold Response 26 នៅភាគខាងជើងប្រទេសហ្វាំងឡង់ ន័រវេស និងស៊ុយអែត រយៈពេលជាង១០ថ្ងៃ ចាប់ពីថ្ងៃទី៩ខែដល់ថ្ងៃទី១៩ខែមីនា។

យោងតាមសារព័ត៌មាន Yle និង UNITED24 MEDIA ផ្សាយថ្ងៃទី១០ ខែមីនា ឆ្នាំ២០២៦, ប្រទេសន័រវេសកំពុងដឹកនាំសមយុទ្ធនេះ មានរយៈពេលប្រហែលពីរសប្តាហ៍មានទាហានប្រហែល ២៥ ០០០នាក់ មកពីប្រទេសសម្ព័ន្ធមិត្តចំនួន១៤ កំពុងចូលរួម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលដៅនៃសមយុទ្ធនេះគឺដើម្បីពង្រឹងភាគខាងជើងរបស់សមាជិកណាតូដែលស្ថិតនៅជិតមហាអំណាចនុយក្លេអ៊ែររុស្ស៊ី ដែលបានលើកទ័ពឈ្លានពានអ៊ុយក្រែនកាលពីខែកុម្ភៈឆ្នាំ២០២២ រហូតមកដល់ពេលបច្ចុប្បន្នមិនទាន់រកផ្លូវបញ្ចប់សង្គ្រាមនៅឡើយ។

លំហាត់សមយុទ្ធនេះនឹងបញ្ចូលការអនុវត្តពីរបៀបដែលកងទ័ពមកពីប្រទេសផ្សេងៗធ្វើការរួមគ្នាក្នុងអាកាសធាតុដ៏លំបាក និងសាកល្បងកម្លាំងកងទ័ពថាតើពួកគេអាចចល័តបានលឿនប៉ុណ្ណា។

យោធាប្រហែល ៤ ០០០ នាក់មកពីសហរដ្ឋអាមេរិក បារាំង អ៊ីតាលី ចក្រភពអង់គ្លេស និងស៊ុយអែត កំពុងមកដល់ប្រទេសហ្វាំងឡង់សម្រាប់សមយុទ្ធនេះ។

កងកម្លាំងអាមេរិកនៅអឺរ៉ុបបានបញ្ជាក់ថា សមយុទ្ធនេះមានគោលបំណងបង្កើនវត្តមានយោធារបស់សហរដ្ឋអាមេរិក និងសម្ព័ន្ធមិត្តរបស់ខ្លួនក្នុងតំបន់អាកទិក និងផ្តល់នូវអត្ថប្រយោជន៍ជាយុទ្ធសាស្ត្រនៅក្នុងតំបន់។

គួរបញ្ជាក់ថា យោធាទាំងអស់បានចូលរួមអនុវត្តការប្រើប្រាស់កាំភ្លើងធំក្នុងលក្ខខណ្ឌនៅរដូវរងា និងកិច្ចសហប្រតិបត្តិការរវាងសម្ព័ន្ធមិត្តណាតូផងដែរ។

លោក Kimmo Ruotsalainen មេបញ្ជាការនៃសមយុទ្ធនេះហៅសមយុទ្ធនោះថា៖ « ជាសមយុទ្ធបាញ់គ្រាប់ពិត និងកាំភ្លើងត្បាល់ដ៏ធំបំផុតនៅភាគខាងជើងប្រទេសហ្វាំងឡង់»៕

ប្រែសម្រួល៖ ណឺ មិនា