​​​​អ៊ីស្រាអែល​​​វាយប្រហារ​ដោយ​ដ្រូន​​​បណ្តាល​​ឲ្យ​ស្លាប់​៥នាក់​​ ចំថ្ងៃ​​​ចុះ​ហត្ថលេខាលើ​បទ​ឈប់​បាញ់​នៅ​ហ្គាហ្សា​

ក្មេងជំទង់ជនជាតិប៉ាឡេស្ទីនម្នាក់ និងបងប្អូនបីនាក់ស្ថិតក្នុងចំណោមមនុស្សយ៉ាងតិចប្រាំមួយនាក់ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើជំរុំជនភៀសខ្លួន Jenin នៅតំបន់ West Bank​ ចំថ្ងៃ​ដែល​​ភាគី​ជម្លោះ​ទាំង២​​សម្រេច​កិច្ច​ព្រម​ព្រៀង​ឈប់​បាញ់​​ ដែល​​ជំរុញ​ដោយ​សហរដ្ឋអាមេរិក​និងប្រទេសមួយចំនួន​ក្នុង​តំបន់​។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៦ខែមករានេះ

ទីភ្នាក់ងារព័ត៌មានប៉ាឡេស្ទីន Wafa បានឲ្យដឹងថា យន្តហោះគ្មានមនុស្សបើករបស់អ៊ីស្រាអែល បានបាញ់មីស៊ីលចំនួន ៣ គ្រាប់ទៅកាន់មនុស្សមួយក្រុមនៅជិតរង្វង់មូលមួយក្នុងជំរុំ Jenin កាលពីល្ងាចថ្ងៃអង្គារសម្លាប់មនុស្ស ៦ នាក់ រួមទាំងក្មេងប្រុសអាយុ ១៥ ឆ្នាំម្នាក់ និងមនុស្សជាច្រើននាក់ទៀតរងរបួស។

គួរបញ្ជាក់ថាការវាយប្រហារដោយយន្តហោះគ្មានមនុស្សបើកលើជំរុំ Jenin នេះកើតឡើងចំពេលមានការវាយឆ្មក់របស់យោធាអ៊ីស្រាអែលយ៉ាងខ្លាំងក្លាទៅលើសហគមន៍មូលដ្ឋាន និងការសម្លាប់ដោយកងកម្លាំងអ៊ីស្រាអែលជិត ៨០០នាក់នៅតំបន់ West Bank ដែលបានកាន់កាប់ចាប់តាំងពីថ្ងៃទី​៧ខែតុលា​ឆ្នាំ២០២៣ ក៏ដូចជាការចាប់ខ្លួនមនុស្សរាប់ពាន់នាក់ផ្សេងទៀត។

ការវាយប្រហារដោយយន្តហោះគ្មានមនុស្សបើកក៏កើតមានឡើងចំពេលមានប្រតិបត្តិការយោធាដែលបានចាប់ផ្តើមនៅក្នុងជំរុំ Jenin ដោយកងកម្លាំងសន្តិសុខរបស់អាជ្ញាធរប៉ាឡេស្ទីន (PA) ក្នុងរយៈពេលប៉ុន្មានសប្តាហ៍ចុងក្រោយនេះ ដោយបានកំណត់គោលដៅលើក្រុមអ្នកតស៊ូប្រឆាំងប៉ាឡេស្ទីន ដែលបានបណ្តាលឱ្យមនុស្សរាប់សិបនាក់បានស្លាប់។

បើតាមលោក Anwar Rajab អ្នកនាំពាក្យរបស់កងកម្លាំងសន្តិសុខរបស់ PA បាននិយាយថា ការវាយប្រហារនេះមានគោលបំណង «រំខានដល់កិច្ចខិតខំប្រឹងប្រែង» ដោយអាជ្ញាធរដើម្បីសម្រេចបាននូវសន្តិសុខ និងស្ថិរភាពនៅក្នុងជំរុំភៀសខ្លួន Jenin៕

អត្ថបទ៖ ប៊ុន សុភាព