៥៨ខេត្តនៅថៃ បន្តគ្របដណ្តប់ដោយខ្យល់ពុលក្នុងកម្រិតគ្រោះថ្នាក់ធ្ងន់ធ្ងរ  

គុណភាពខ្យល់នៅប្រទេសថៃ មិនទាន់ល្អប្រសើរឡើង ដោយកាលពីថ្ងៃអាទិត្យទី២៦ខែមករាឆ្នាំ២០២៥, ​ខេត្តចំនួន៥៨ ត្រូវគ្របដណ្តប់ដោយកំហាប់ភាគល្អិត PM2.5 ក្នុងកម្រិតគ្មានសុវត្ថិភាពធ្ងន់ធ្ងរ។

យោងតាមទីភ្នាក់ងារអភិវឌ្ឍន៍បច្ចេកវិទ្យាអវកាស និងភូមិសាស្ត្រព័ត៌មានវិទ្យា (Gistda), ក្នុងចំណោមខេត្តខាងលើ មាន២០ខេត្តដែលគុណភាពខ្យល់បានឈានដល់កម្រិតគ្រោះថ្នាក់ធ្ងន់ធ្ងរបំផុត (ពណ៌ក្រហម) ​ភាគច្រើននៅតំបន់ទំនាបកណ្តាល ខណៈខេត្តគ្រោះថ្នាក់បំផុតលំដាប់លេខ១ គឺ Sing Buri ​ដោយត្រឹម២៤ម៉ោង កម្រិត PM2.5 បានឈានដល់ ១០៩.៧មីក្រូក្រាមក្នុងខ្យល់មួយម៉ែត្រគូប។

យ៉ាងណា ក៏នៅមានខេត្តចំនួន៩ដែលមានគុណភាពខ្យល់ល្អ (ពណ៌បៃតង) ផងដែរ ជាពិសេសនៅភាគខាងត្បូងដូចជា Krabi, Phuket, Phangnga, Nakhon Si Thammarat, Satun, Surat Thani, Ranong, Chumphon និង Trang ដែល PM2.5 មានចាប់ពី១៥.២ទៅ២៤.៩ មីក្រូក្រាមក្នុងមួយម៉ែត្រគូបប៉ុណ្ណោះ។

រឿងនេះកើតឡើងខណៈ ភ្លើងឆេះព្រៃរយៈពេល៥ថ្ងៃ ត្រូវគេគិតទុកជាមុនថា នឹងធ្វើឲ្យគុណភាពខ្យល់នៅក្នុងខេត្ត Rayong ភាគខាងកើតប្រទេសថៃ កាន់តែធ្លាក់ចុះដល់កម្រិតយ៉ាប់យ៉ឺន ហើយមានក្តីកង្វល់ខ្លាំងបំផុតចំពោះសុខភាព មិនមែនត្រឹមតែខេត្តនេះទេ ពោលគឺប៉ះពាល់ដល់ខេត្តផ្សេងៗទៀតផងដែរ។

គិតត្រឹមព្រឹកថ្ងៃអាទិត្យ អគ្គិភ័យនៅតំបន់ភ្នំ Khao Chom Hae បានរាលដាលលើផ្ទៃដីជាង ៣ ១៩៧ហិកតា ដោយដុតកម្ទេចព្រៃអស់ប្រមាណ៣០% ខណៈស្រុក៣ ប៉ះពាល់ខ្លាំងបំផុតគឺ Nikhom Phatthana, Ban Chang និង Muang ហើយដ្បិតតែមានការខិតខំទប់ស្កាត់និងពន្លត់ពីសំណាក់កងអគ្គិភ័យក៏ដោយ ប៉ុន្តែមិនអាចយកឈ្នះភ្លើងបានទេ ព្រោះកម្លាំងខ្យល់បក់ខ្លាំងធ្វើឲ្យភ្លើងរាលដាលខ្លាំង។

ភ្លើងឆេះព្រៃនេះ បានបណ្តាលឲ្យកំហាប់ភាគល្អិត PM2.5 នៅខេត្ត Rayong កាន់តែធ្ងន់ធ្ងរដល់កម្រិត៨០មីក្រូក្រាមក្នុងមួយម៉ែត្រគូប បណ្តាលឲ្យកើតជំងឺផ្លូវដង្ហើម ខណៈអាជ្ញាធរណែនាំឲ្យពលរដ្ឋពាក់ម៉ាស និងចៀសវាងសកម្មភាពក្រៅផ្ទះ៕

អត្ថបទ៖ សុខ សុវណ្ណ

ចុចអាន៖ ភ្លើងឆេះព្រៃ៥ថ្ងៃនៅភាគខាងជើងប្រទេសថៃ ធ្វើឲ្យគុណភាពខ្យល់កាន់តែយ៉ាប់