មកដឹង​​​​​​​រឿងរ៉ាវសំខាន់ៗ​នៃ​ហេតុការណ៍ធ្លាក់យន្តហោះនៅទីក្រុងវ៉ាស៊ីនតោន

មកដឹងត្រួសៗអំពីហេតុការណ៍ធ្លាក់យន្តហោះរបស់ក្រុមហ៊ុនអាកាសចរណ៍ American Airlines ដែលមានអ្នកដំណើរ៦០នាក់ និងនាវិក ៤នាក់នៅលើនោះបានបុកគ្នានៅកណ្តាលអាកាសជាមួយនឹងឧទ្ធម្ភាគចក្រ Black Hawk របស់កងទ័ពដែលដឹកទាហានបីនាក់នោះលើនោះ នៅជិតអាកាសយានដ្ឋានជាតិ Reagan ក្នុងទីក្រុង Washington, DC ហើយបានធ្លាក់ចូលទៅក្នុងទន្លេ Potomac កាលពីយប់ថ្ងៃពុធ។

ការប្រកាសរបស់លោកប្រធានាធិបតី ដូណាល់ ត្រាំ

បន្ទាប់ពីហេតុការណ៍នេះ លោកប្រធានាធិបតី ដូណាល់ ត្រាំ បានប្រាប់អ្នកសារព័ត៌មានកាលពីថ្ងៃព្រហស្បតិ៍នៅឯសេតវិមានថា គ្មាននរណាម្នាក់នៅរស់រានមានជីវិតពីការធ្លាក់យន្តហោះនោះទេ។ ហើយយ៉ាងហោចណាស់សាកសពចំនួន ៤០ ត្រូវបានគេរកឃើញមកដល់ពេលនេះ។

ការរកឃើញប្រអប់ខ្មៅ

ឧបករណ៍ថតទិន្នន័យជើងហោះហើរ និងឧបករណ៍ថតសំឡេងរបស់កាប៊ីនយន្ដហោះ ដែលត្រូវបានគេស្គាល់ជាទូទៅថាជាប្រអប់ខ្មៅ ត្រូវបានរកឃើញពីយន្តហោះដែលបានធ្លាក់ នេះបើយោងតាមNTSB បានបញ្ជាក់។ ប្រអប់នេះនឹងត្រូវបានវិភាគនៅឯមន្ទីរពិសោធន៍ NTSB ដែលមានទីតាំងប្រហែលមួយម៉ាយពីកន្លែងធ្លាក់យន្តហោះ។ NTSB នឹងបញ្ជាក់បន្ថែមថាមានអ្វីកើតឡើងខ្លះ បន្ទាប់ពីការវិភាគបានបញ្ចប់។

អ្នកជិះស្គីកំពូលៗមកពីសហរដ្ឋអាមេរិក និងរុស្ស៊ីស្លាប់ក្នុងហេតុការណ៍នេះ

U.S. Figure Skating ដែលជាអង្គការដែលបម្រើការជាស្ថាប័នគ្រប់គ្រងកីឡាជាតិ បានបញ្ជាក់ថា អ្នកដំណើររបស់យន្តហោះនេះ រួមមានសមាជិកកីឡាករនិងកីឡាការនីរបស់ខ្លួនជាច្រើននាក់ ដែលបានចូលរួមជំរុំហ្វឹកហាត់ដ៏មានកិត្យានុភាពសម្រាប់អ្នកជិះស្គីថ្មីថ្មោង និងកម្រិតមធ្យមនៅ Wichita រដ្ឋ Kansas។

លោក Doug Zeghibe ដែលជានាយកប្រតិបត្តិ និងជានាយកប្រតិបត្តិរបស់ក្លឹបជិះស្គីបានកំណត់អត្តសញ្ញាណសមាជិកក្លឹបនៅលើយន្តហោះដូចជា Jinna Han, Jin Han, Spencer Lane, Christine Lane, Vadim Naumov និង Evgenia Shishkova ។

ក្លឹបបាននិយាយថា Shishkova និង Naumov គឺជាអ្នកជិះស្គីលើទឹកកកដែលមានដើមកំណើតរុស្ស៊ី និងជាអតីតជើងឯកពិភពលោក ដែលបានបង្វឹកនៅក្លឹប Skating Club of Boston ។ ជាមួយគ្នានេះទីភ្នាក់ងារព័ត៌មានរដ្ឋ TASS ក៏បានរាយការណ៍ដែរថា ពួកគេនៅលើយន្តហោះរួមជាមួយពលរដ្ឋរុស្ស៊ីផ្សេងទៀត។

ចំណុចសង្ស័យមួយចំនួន

អ្នកជំនាញ កំពុងឆ្ងល់ថាហេតុអ្វីបានជាឧទ្ធម្ភាគចក្រ Black Hawk អាចហោះហើរពីលើរយៈកម្ពស់ដែលអនុញ្ញាត
បានចំពោះឧទ្ធម្ភាគចក្រ Black Hawk យោធា ហើយថែមទាំងបុកយន្តហោះដឹកអ្នកដំណើរនៅជិតអាកាសយានដ្ឋានជាតិ Reagan។ ឧទ្ធម្ភាគចក្រនេះ ហាក់ដូចជាកំពុងហោះហើរពីលើរយៈកម្ពស់ដែលអាចអនុញ្ញាតបាន នេះបើយោងតាមទិន្នន័យហោះហើរជាសាធារណៈដែលត្រូវបានវិភាគដោយ CBS News ។

គួរបញ្ជាក់ថាកម្ពស់ហោះហើរដែលត្រូវបានអនុញ្ញាតនៅលើទន្លេ Potomac ក្បែរអាកាសយានដ្ឋានជាតិ Reagan គឺ ២០០ ហ្វីត ដែលជាកម្ពស់កំណត់ដ៏សំខាន់សម្រាប់រក្សាលំហូរសុវត្ថិភាពចរាចរណ៍។

បើតាមទិន្នន័យពី FlightRadar24 ដែលតាមដាន និងកត់ត្រាទិន្នន័យយន្តហោះសម្រាប់ការហោះហើរភាគច្រើននៅទូទាំងសហរដ្ឋអាមេរិក បានបង្ហាញថា កម្ពស់ប៉ាន់ស្មានចុងក្រោយរបស់ឧទ្ធម្ភាគចក្រគឺប្រហែល ៤០០ ហ្វីត នៅពេលដែលវាបានធ្លាក់។ យោងតាមទិន្នន័យពី FlightAware និង FlightRadar24 បានឱ្យដឹងថា រយៈកម្ពស់របស់យន្តហោះនេះគឺប្រហែលពី ៣៧៥ ទៅ ៤០០ ហ្វីត។

លោក Greg Feith អតីតអ្នកស៊ើបអង្កេតសុវត្ថិភាពផ្លូវអាកាសជាន់ខ្ពស់នៃក្រុមប្រឹក្សាសុវត្ថិភាពដឹកជញ្ជូនជាតិបាននិយាយនៅក្នុងបទសម្ភាសន៍ជាមួយថា CBS News ថា «ពួកគេជាអ្នកបើកយន្តហោះយោធា ពួកគេស្គាល់ផ្លូវ»។ «ហេតុអ្វីបានជាថ្ងៃនេះ នៅលើជើងហោះហើរនោះ ពួកគេបើកនៅកម្ពស់ពី ១៥០ ទៅ ២០០ ហ្វីត លើសពីកម្ពស់ដែលពួកគេគួរបើក?»

លោក Steven B. Wallace អតីតប្រធានផ្នែកស៊ើបអង្កេតគ្រោះថ្នាក់សម្រាប់រដ្ឋបាលអាកាសចរណ៍សហព័ន្ធបានប្រាប់ CBS News ថាគាត់ជឿថាអ្នកស៊ើបអង្កេតនឹងផ្ដោតការយកចិត្តទុកដាក់លើកម្ពស់របស់ឧទ្ធម្ភាគចក្រ Black Hawk ។

ជាមួយគ្នានេះរដ្ឋមន្ត្រីការពារជាតិលោក Pete Hegseth បាននិយាយថា ការស៊ើបអង្កេតកំពុងពិនិត្យមើលថាតើយន្តហោះនេះស្ថិតនៅកម្ពស់ត្រឹមត្រូវនៅពេលនោះឬអត់។ ក្រុមអ្នកស៊ើបអង្កេត NTSB មិនទាន់បានបង្ហាញពីកម្ពស់របស់ឧទ្ធម្ភាគចក្រនៅក្នុងការសង្ខេបរបស់ពួកគេទេ ក្រុមការងាររបស់ពួកគេនឹងវាយតម្លៃ«ទិសដៅ និងរយៈកម្ពស់មុនពេលមានការបុកគ្នា»។

ចំណុចទិន្នន័យទាំងនេះគឺជាអាថ៌កំបាំងមួយក្នុងចំណោមអាថ៌កំបាំងសំខាន់ៗជាច្រើនដែលក្រុមអ្នកស៊ើបអង្កេតកំពុងស្វែងរក ខណៈដែលពួកគេស្វែងរកការពន្យល់ពីអ្វីដែលបណ្តាលឱ្យមានគ្រោះមហន្តរាយផ្លូវអាកាសដ៏អាក្រក់បំផុតរបស់ប្រទេសនេះក្នុងរយៈពេលជាងមួយទសវត្សរ៍មិនធ្លាប់មាន៕

អត្ថបទ៖ ប៊ុន សុភាព