​ព្រឹលធ្លាក់ខ្លាំង​បំបែក​កំណត់ត្រា​វាយ​ប្រហារ​កោះ​Hokkaido ប្រទេស​ជប៉ុន

កោះ Hokkaido ប្រទេសជប៉ុន កំពុងជួបប្រទះព្រឹលធ្លាក់ខ្លាំងបំផុតមិនធ្លាប់មាន ក្នុងរយៈពេលប៉ុន្មានម៉ោងថ្មីៗនេះ ដោយសារប្រព័ន្ធសម្ពាធទាបកំពុងកើនយ៉ាងឆាប់រហ័សនៅជុំវិញប្រទេស។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី០៤ខែកុម្ភៈនេះ។

ក្រុមព្យាករណ៍អាកាសធាតុប្រចាំតំបន់ Sapporo បានរាយការណ៍ពីតួលេខគួរឱ្យភ្ញាក់ផ្អើល ដោយកត់សំគាល់ថាមានព្រឹល​ធ្លាក់​លើស​ពី​១១៥សង់ទីម៉ែត្រ នៅកោះ Hokkaido ក្នុងរយៈពេលត្រឹមតែ​២៤ម៉ោងប៉ុណ្ណោះ ដែលជាចំនួនខ្ពស់បំផុតមិនធ្លាប់មានចាប់តាំងពីឆ្នាំ​១៩៩៩។

ឥទ្ធិពលរបស់ព្យុះព្រឹលនេះបានជំរុញឲ្យទីភ្នាក់ងារឧតុនិយមជូនដំណឹង និងការព្រមានអំពីគ្រោះថ្នាក់ផ្សេងៗ ដល់ប្រជាពលរដ្ឋ​ឲ្យប្រុងប្រយ័ត្ន​ចំពោះ​ ការ​ដាច់​ភ្លើង ដើមឈើ​រលំ និង​បាក់​ផ្ទាំង​ទឹកកក​ជាដើម។

ការធ្លាក់ព្រឹលនេះត្រូវបានគេព្យាករណ៍ថាបណ្ដាលមកពីប្រព័ន្ធសម្ពាធទាបដែលរួមផ្សំជាមួយនឹងម៉ាស់ខ្យល់ក្នុងរដូវរងាខ្លាំង ដែលបង្កជារលកត្រជាក់ខ្លាំងបំផុតមួយនៅក្នុងតំបន់នេះសម្រាប់ទសវត្សរ៍នេះ។

ទោះបីប្រតិបត្តិការបោសសម្អាតព្រឹលកំពុងដំណើរការក៏ដោយ ក៏ការវាយតម្លៃដំបូងបង្ហាញថាមានការរំខានដល់បណ្តាញ​ដឹក​ជញ្ជូន រួមទាំងការពន្យារពេល និងការលុបចោលការដឹកជញ្ជូនសាធារណៈផងដែរ។ ឆ្លើយតបបញ្ហានេះអាជ្ញាធរបានរួមគ្នា​អនុវត្តវិធានការនានាក្នុងគោលបំណងធានាសុវត្ថិភាពសាធារណៈ រួមទាំងការបិទផ្លូវ និងការបង្កើនការត្រៀមខ្លួនរបស់​សេវា​សង្គ្រោះបន្ទាន់។

ការព្យាករណ៍អាកាសធាតុបង្ហាញថា ភាពត្រជាក់នេះអាចបន្តកើតមាន ជាមួយនឹងការធ្លាក់ព្រឹលបន្ថែមទៀតមិនត្រឹមតែនៅទូទាំងកោះ Hokkaido ប៉ុណ្ណោះទេ ប៉ុន្តែនឹងរីករាលដាលទៅភាគខាងត្បូងបន្តទៀត។ ការធ្លាក់ព្រឹលអាចមានក្នុងបរិមាណលើសពី៥០សង់ទីម៉ែត្រនៅទូទាំងតំបន់នានា ខណៈតំបន់ដូចជាតំបន់ Hokuriku និង Tohoku អាចមានព្រឹលធ្លាក់ដល់ទៅ១០០សង់ទីម៉ែត្រ៕

អត្ថបទ៖ ប៊ុន សុភាព