មនុស្ស៤១​នាក់ស្លាប់​ក្នុង​គ្រោះថ្នាក់ចរាចរណ៍នៅ​ភាគ​ខាងត្បូង​ម៉ិ​ក​ស៊ិ​ក

គ្រោះថ្នាក់ចរាចរណ៍ដ៍សាហាវ​បំផុត​១​​ រវាងរថយន្តក្រុងនិងរថយន្ត​ដឹកទំនិញនៅភាគខាងត្បូងប្រទេសម៉ិកស៊ិក បង្កជាអណ្ដាតភ្លើងឆាបឆេះសម្លាប់មនុស្សចំនួន៤១នាក់។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១០ខែកុម្ភៈនេះ។

អាជ្ញាធរបានឲ្យដឹងថា គ្រោះថ្នាក់ចរាចរណ៍នេះបានកើតឡើងនៅជិតទីក្រុង Escarcega ដោយ​​រថយន្តដឹកទំនិញ បុកជាមួយរថយន្តក្រុងដែលផ្ទុកមនុស្ស៤៨នាក់កំពុងធ្វើដំណើរពីទីក្រុង Cancun ទៅ​កាន់​​រដ្ឋ Tabasco កាលព្រឹកព្រលឹមថ្ងៃសៅរ៍ បណ្តាលឲ្យស្លាប់អ្នកដំណើរ៣៨នាក់ និងអ្នកបើកបរ២នាក់ ក្នុងនោះមានទាំងអ្នកបើកបររថយន្តដឹកទំនិញផងដែរ។

រហូតមកដល់ពេលនេះ ប្រតិបត្តិការ​​​កំណត់​​​​អត្តសញ្ញា​ណ​​នៅតែបន្ត​ធ្វើ​នៅឡើយ ដោយសាក​សពចំនួន១៨ប៉ុណ្ណោះត្រូវបាន​កំណត់​អត្ត​សញ្ញា​​ណ​ ប៉ុន្តែច្រើននាក់ទៀតត្រូវបានបាត់ បន្ទាប់ពីបុកគ្នារថយន្តក្រុងបានឆាបនេះយ៉ាងខ្លាំង។

ពាក់ព័ន្ធហេតុការណ៍នេះ ប្រតិបត្តិកររថយន្តក្រុង Tours Acosta បានឲ្យដឹងថា នៅពេលកើតហេតុ រថយន្តក្រុងស្ថិតក្នុងស្ថានភាពល្អបំផុត ដោយធ្វើដំណើរក្នុងល្បឿនមធ្យម ដោយអនុលោមតាមច្បាប់ចរាចរណ៍ផ្លូវគោកទាំងអស់ ប៉ុន្តែរថយន្ត​ដឹក​ទំនិញ​ដែល​ធ្វើ​ដំណើរ​ក្នុង​ទិស​ដៅ​ផ្ទុយ​គ្នា​បាន​ជ្រុល​ទៅ​បុក​រថយន្ត​ក្រុង៕

អត្ថបទ៖ ប៊ុន សុភាព