ព័ត៌មានអន្ដរជាតិ

អគ្គរដ្ឋអាជ្ញាកូរ៉េ នឹងបន្តដាក់សម្ពាធផ្លូវច្បាប់ ប្រឆាំងលោក Yoon ទើបរួចផុតពីការឃុំខ្លួន

បានផុស

១ year មុន

នៅ

ថ្ងៃចន្ទ ១០ មីនា ២០២៥

ដោយ

រដ្ឋអាជ្ញាកូរ៉េខាងត្បូងនឹងបន្តដំណើរការផ្លូវច្បាប់ប្រឆាំង ប្រធានាធិបតី Yoon Suk Yeol ដែលត្រូវបានព្យួរអំណាច សម្រាប់ការចោទប្រកាន់ពីបទ «ការបះបោរនិងរំលោភអំណាច» បើទោះបីជា ការសម្រេចចិត្តរបស់តុលាការក្រុងសេអ៊ូល បញ្ជាឱ្យដោះលែងមេដឹកនាំកូរ៉េខាងត្បូងរូបនេះ បន្ទាប់ពីការឃុំខ្លួនជិត២ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរ៉យទ័របានរាយការណ៍ថា អគ្គរដ្ឋអាជ្ញា លោក Shim Woo-jung បាននិយាយថា លោកគោរពសេចក្តីសម្រេចរបស់តុលាការកាលពីចុងសប្តាហ៍ ប៉ុន្តែមិនយល់ស្របនឹងការវាយតម្លៃរបស់ខ្លួនដែលថា ការប្តឹងផ្តល់គឺហួសពេលកំណត់ដែលអនុញ្ញាតដោយស្របច្បាប់ ដែលតុលាការបាននិយាយថា បានធ្វើឱ្យការឃុំខ្លួនលោក Yoon ក្នុងពេលកំពុងជំនុំជម្រះដោយខុសច្បាប់នោះទេ។

ប្រធានាធិបតីកូរ៉េខាងត្បូង លោក Yoon Suk Yeol ត្រូវបានដោះលែងកាលថ្ងៃសៅរ៍ពីការឃុំខ្លួនអាស់រយៈពេលជិត២ខែ ចាប់ពីថ្ងៃទី១៥ខែមករា ហើយលោកក៏កំពុងប្រឈមការប្រកាសសាលក្រមរបស់តុលាការធម្មនុញ្ញ ដែលត្រូវបានគេរំពឹងយ៉ាងខ្លាំងថា «នឹងធ្វើឡើងនៅសប្តាហ៍នេះ» ជុំវិញការចោទប្រកាន់ទម្លាក់អំណាចរបស់រដ្ឋសភា។

សេចក្តីរាយការណ៍របស់រ៉យទ័រ បានឲ្យដឹងថា អគ្គរដ្ឋអាជ្ញា លោក Shim Woo-jung បានប្រាប់អ្នកយកព័ត៌មាននៅពេលសួរថា តើសេចក្តីសម្រេចរបស់តុលាការមានន័យថា ទំនងជាទម្លាក់រឿងក្តីនេះថា៖«ខ្ញុំបានបញ្ជាឱ្យតំណាងអយ្យការធ្វើអំណះអំណាងលើវិវាទផ្សេងៗក្នុងអំឡុងពេលសវនាការ ហើយយើងនឹងធ្វើអ្វីគ្រប់យ៉ាងដែលយើងអាចធ្វើបានដើម្បីបន្តការចោទប្រកាន់នេះ»។

លោក Yoon ត្រូវបានចោទប្រកាន់ជាផ្លូវការតាំងពីថ្ងៃទី២០ខែកុម្ភៈ លើការចោទប្រកាន់ថាគាត់បានដឹកនាំការបះបោរដោយប្រកាសច្បាប់អាជ្ញាសឹកនៅថ្ងៃទី៣ខែធ្នូ ហើយក្រោមមកប្រហែល៦ម៉ោង ប្រធានាធិបតី Yoon បានលុបចោលក្រឹត្យច្បាប់អាជ្ញាសឹកនោះវិញ។

មេធាវីការពារក្តីរបស់លោក Yoon បានដាក់សំណើរសុំលុបចោលការឃុំខ្លួននោះ ដោយចាត់ទុកថា ជាការខុសច្បាប់ ព្រោះប្រធានាធិបតីកំពុងប្រឈមតុលាការធម្មនុញ្ញ និងមិនស្ថិតនៅក្រោមអង្គភាពខាងក្រោមនោះទេ ដោយក្រុមមេធាវីបាននិយាយថា សេចក្តីសម្រេចកាលពីថ្ងៃសុក្របង្ហាញថា ករណីប្រឆាំងនឹង Yoon មានហេតុផលនយោបាយ និងមិនមានហេតុផលផ្លូវច្បាប់ទេ៕

ដោយ រ៉ាន់ រើយ