បេសកជនលោក Trump៖ Zelenskyy សុំទោសប្រធានាធិបតីអាមេរិក រួចហើយ

ថ្លែងមុនកិច្ចពិភាក្សារវាងគណៈប្រតិភូអាមេរិកនិងអ៊ុយក្រែននៅប្រទេសអារ៉ាប៊ីសាអូឌីត ស្តីពីវិធានការដោះស្រាយឈានទៅការបញ្ចប់សង្គ្រាមជាមួយរុស្ស៊ី, បេសកជនពិសេសរបស់លោក Trump គឺលោក Steve Witkoff បានបញ្ជាក់ថា ប្រមុខដឹកនាំអ៊ុយក្រែន Volodymyr Zelenskyy បានសុំទោសប្រធានាធិបតីអាមេរិករួចហើយ ចំពោះជម្លោះយ៉ាងបែកផ្សែងនៅសេតវិមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ New York Post, លោក Witkoff បានថ្លែងយ៉ាងដូច្នេះក្នុងអំឡុងបទសម្ភាសជាមួយកម្មវិធី «America’s Newsroom» របស់ទូរទស្សន៍ Fox News កាលពីថ្ងៃចន្ទទី១០ខែមីនាឆ្នាំ២០២៥។

កាលពីចុងខែកុម្ភៈ សង្គ្រាមពាក្យសម្តីយ៉ាងក្តៅគគុកបានផ្ទុះឡើងនៅឯសេតវិមានរវាងលោក Zelenskyy ជាមួយលោក Trump និងអនុប្រធានាធិបតីអាមេរិក JD Vance អំឡុងពេលប្រធានាធិបតីអ៊ុយក្រែន ធ្វើដំណើរទៅទីក្រុងវ៉ាស៊ីនតោន ដើម្បីចុះហត្ថលេខាលើកិច្ចព្រមព្រៀងរ៉ែ ក្នុងគោលបំណងឲ្យអាមេរិកជួយបញ្ចប់សង្គ្រាមជាមួយរុស្ស៊ី ដោយពេលនោះលោក Trump ចោទ Zelenskyy ថា ​មិនចេះ​ដឹង​គុណដល់​ការ​គាំទ្រ​របស់​សហរដ្ឋ​អាមេរិក។

ដោយសារខឹងចិត្ត ក្រោយមក ត្រាំ ក៏បញ្ជាឲ្យផ្អាកជំនួយអាមេរិកទៅអ៊ុយក្រែន ទាំងអស់ ជាពិសេសឈប់ផ្តល់ការណ៍សម្ងាត់អំពីរុស្ស៊ីឲ្យទីក្រុងកៀវថែមទៀតផង ដែលធ្វើឲ្យទ័ពលោកហ្សេលេនស្គី ជួបបញ្ហាប្រឈមដ៏ធំនៅសមរភូមិ។

យ៉ាងណា ឥឡូវនេះលោក Witkoff អះអាងថា «លោក Zelenskyy បានផ្ញើលិខិតសុំទោសលោក Trump រួចហើយចំពោះហេតុការណ៍ដែលកើតឡើងក្នុងការិយាល័យពងក្រពើ ហើយខ្ញុំគិតថា ការសុំទោសនេះគឺជាជំហានដ៏សំខាន់។ មានកិច្ចពិភាក្សាជាច្រើនរវាងក្រុមរបស់យើងនិងអ៊ុយក្រែន ហើយអឺរ៉ុប ក៏ពាក់ព័ន្ធនឹងកិច្ចពិភាក្សានេះដែរ»។

សូមជម្រាបជាថ្មី អំឡុងពេលថ្លែងទៅកាន់សភាកាលពីសប្តាហ៍មុន លោក Trump ក៏បង្ហើបដែរថា លោកបានទទួលលិខិតមួយច្បាប់ពី Zelenskyy ដែលខ្លឹមសារក្នុងនោះគឺបង្ហាញពីការត្រៀមខ្លួនរបស់ទីក្រុងកៀវ ចូលមកកាន់តុចរចាក្នុងពេលឆាប់ៗ។

ទោះបីជាយ៉ាងណាក៏ដោយ ក្នុងអំឡុងពេលនោះ ប្រធានាធិបតីអាមេរិក មិនបញ្ជាក់ឡើយថាតើលិខិតនោះ មានភ្ជាប់ជាមួយនូវពាក្យសុំទោសរបស់លោក Zelenskyy ដែរឬក៏អត់៕

អត្ថបទ៖ សុខ សុវណ្ណ

ចុចអាន៖ លោក ត្រាំ ថា អ៊ុយក្រែន ដូចគ្មានចេតនា ចង់បានសន្តិភាពសោះ