លោក ត្រាំ ថា អ៊ុយក្រែន ដូចគ្មានចេតនា ចង់បានសន្តិភាពសោះ

ថ្លែងប្រាប់អ្នកសារព័ត៌មាននៅលើយន្តហោះ Air Force One ពាក់ព័ន្ធការបើកជំនួយយោធាឲ្យអ៊ុយក្រែនវិញ ពេលភាគីទាំងពីរចុះកិច្ចព្រមព្រៀងរ៉ែជាមួយគ្នាហើយនោះ, ប្រធានាធិបតីអាមេរិក ដូណាល់ ត្រាំ បញ្ជាក់យ៉ាងច្បាស់ថា អ៊ុយក្រែន ដូចគ្មានចេតនាចង់បានសន្តិភាពជាមួយរុស្ស៊ីសោះ។ នេះបើតាមការចុះផ្សាយរបស់ RT។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ អះអាងបែបនេះកាលពីថ្ងៃអាទិត្យទី៩ខែមីនាឆ្នាំ២០២៥ ពោលគឺមុនកិច្ចពិភាក្សាអាមេរិក-អ៊ុយក្រែន ក្នុងប្រទេសអារ៉ាប៊ីសាអ៊ូឌីតដោយនិយាយថា «ជាការពិត ខ្ញុំគិតថាពួកគេនឹងស៊ីញេលើកិច្ចព្រមព្រៀងរ៉ែ ប៉ុន្តែខ្ញុំចង់ឲ្យពួកគេចង់បានសន្តិភាពជាង។ យ៉ាងណាមកទល់ឥឡូវ ពួកគេមិនទាន់បង្ហាញអ្វីឲ្យឈានដល់កម្រិតនោះទេ ប៉ុន្តែខ្ញុំគិតថា ​ពួកគេនឹងបង្ហាញចេតនានោះប្រហែលនៅ២-៣ថ្ងៃទៀត ហើយនៅទីបំផុត យើងនឹងមានសន្តិភាព»។

ទោះបីជាយ៉ាងណាក៏ដោយ មុននេះដែរ ក្នុងបទសម្ភាសជាមួយសារ​ព័ត៌មាន​​ Fox News លោកត្រាំ បានបោះពាក្យសម្តីវាយប្រហារលោក វ៉ូឡូឌីមៀរ ហ្សេលេនស្គី សាជាថ្មី ដោយនិយាយថា ប្រមុខដឹកនាំអ៊ុយក្រែន យកលុយពីអតីតប្រធានាធិបតី ចូ បៃដិន ស្រួលដូចយកស្ករគ្រាប់ពីកូន​ក្មេង​។

លោកនិយាយថា «ហ្សេលេនស្គី យកលុយចេញពីប្រទេសនេះក្រោមការដឹកនាំរបស់បៃដិន ដូចយកស្ករគ្រាប់ពីកូនង៉ែតទៅហើយ។ វាស្រួលពេក!»។ ទន្ទឹមនោះ លោកត្រាំ រម្លឹកឡើងវិញថា មេដឹកនាំអ៊ុយក្រែន គ្មានដឹងគុណស្រ័យអ្វីទេ ហើយបើលោក ជាប្រធានាធិបតីអាមេរិកឆ្នាំ២០២២ វិបត្តិអ៊ុយក្រែន ក៏មិនធ្ងន់ធ្ងរឈានដល់ដំណាក់កាលនេះដែរ។

កាលពីចុងខែកុម្ភៈ លោក ហ្សេលេនស្គី បានទៅទីក្រុងវ៉ាស៊ីនតោន ដើម្បីចុះហត្ថលេខាលើកិច្ចព្រមព្រៀងរ៉ែ ក្នុងគោលបំណងឲ្យអាមេរិកជួយបញ្ចប់សង្គ្រាមជាមួយរុស្ស៊ី ប៉ុន្តែអ្វីៗខុសការគ្រោងទុក ដោយលោក ត្រាំ ចោទហ្សេលេនស្គីថា ​មិនចេះ​ដឹង​គុណដល់​ការ​គាំទ្រ​របស់​សហរដ្ឋ​អាមេរិក ឈានដល់ការកើតសង្គ្រាមពាក្យសម្តីយ៉ាងក្តៅគគុកនៅឯសេតវិមាន។

ក្រោយមក ត្រាំ ក៏បញ្ជាឲ្យផ្អាកជំនួយអាមេរិកទៅអ៊ុយក្រែន ទាំងអស់ ជាពិសេសឈប់ផ្តល់ការណ៍សម្ងាត់អំពីរុស្ស៊ីឲ្យទីក្រុងកៀវថែមទៀតផង ដែលធ្វើឲ្យទ័ពលោកហ្សេលេនស្គី ជួបបញ្ហាប្រឈមដ៏ធំនៅសមរភូមិ។

យ៉ាងណា មកដល់ថ្ងៃអាទិត្យ លោក ត្រាំ ហាក់ធ្វើឲ្យស្ថានការណ៍ចុះត្រជាក់បន្តិចដោយបង្ហើបពីបំណង ​​បើក​ការចែករំលែកព័ត៌មានសម្ងាត់ជាមួយអ៊ុយក្រែន​ឡើង​វិញ៕

អត្ថបទ៖ សុខ សុវណ្ណ

ចុចអាន៖ លោក ត្រាំ ប្រកាស​ថា អាមេរិក​ជិត​បើក​ការ​ផ្ដល់​ព័ត៌មាន​ចារកម្ម​ឲ្យ​អ៊ុយក្រែន​វិញ​ហើយ