ព័ត៌មានអន្ដរជាតិ

ខណៈតុលាការធម្មនុញ្ញជិតប្រកាសសាលក្រម ប្រជាជនកូរ៉េខាងត្បូងចេញតវ៉ាទាមទារ

បានផុស

១ year មុន

នៅ

ថ្ងៃអាទិត្យ ១៦ មីនា ២០២៥

ដោយ

ខណៈពេលដែលតុលាការធម្មនុញ្ញនៃប្រទេសកូរ៉េខាងត្បូងត្រូវគេរំពឹងយ៉ាងទូលទូលាយថា នឹងប្រកាសសាលក្រមលើសំណុំរឿងដកអំណាចប្រធានាធិបតី Yoon Suk Yeol នៅសប្តាហ៍នេះ ប្រជាជនក្រុងសេអ៊ូលនៃកូរ៉េខាងត្បូងទាំងគាំទ្រនិងប្រឆាំងបានចាប់ចេញប្រមូលផ្តុំបង្ហាញឆន្ទៈរបស់ពួកគេរៀងៗខ្លួន។

ប្រជាជនផ្នែកខាងប្រឆាំងបានចេញតវ៉ាកាន់តែខ្លាំងឡើងនៅចុងសប្តាហ៍នេះទាមទារឲ្យតុលាការធម្មនុញ្ញតម្កល់ការចោទប្រកាន់របស់សភាជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានកូរ៉េខាងត្បូងបានរាយការណ៍នៅថ្ងៃទី១៦ខែមីនា ថាសមាជិកនៃគណបក្សប្រជាធិបតេយ្យប្រឆាំងដ៏ធំរបស់ប្រទេសកូរ៉េបានចូលរួមជាមួយប្រជាជនដែលប្រមូលផ្តុំគ្នាសម្រាប់ការចោទប្រកាន់ទម្លាក់អំណាចរបស់លោក Yoon ដើម្បីដើរក្នុងចម្ងាយផ្លូវជិត៩គីឡូម៉ែត្រពីរដ្ឋសភាក្នុងទីក្រុង Yeouido ភាគខាងលិចទីក្រុងសេអ៊ូលទៅកាន់ជិត Gwanghwamun ដោយឆ្លងកាត់ទន្លេ Han តាមរយៈស្ពាន Mapo ។

តុលាការធម្មនុញ្ញរបស់កូរ៉េខាងត្បូងទំនងប្រកាសសាលក្រមរបស់ខ្លួនលើការព្យួរអំណាចប្រធានាធិបតី Yoon Suk Yeol នៅសប្តាហ៍នេះ បន្ទាប់ពីការបញ្ចប់សវនាចំនួន១១លើក និងសវនាការបញ្ចប់សេចក្តីកាលថ្ងៃទី២៥ខែកុម្ភៈ។ នៅ ក្នុងការប្រកាសសាលក្រមកាលថ្ងៃព្រហស្បត្តិ៍កន្លងទៅនេះ តុលាការធម្មនុញ្ បានច្រានចោលបណ្តឹងរដ្ឋសភាក្នុងការបោះឆ្នោតដកហូតអំណាចរបស់មន្ត្រីរដ្ឋបាលរបស់លោក Yoon ចំនួន៤រូប។

អំណាចប្រធានាធិបតី Yoon Suk Yeol បានស្ថិតក្នុងវាសនាមិនច្បាស់លាស់ ចាប់តាំងពីសមាជិករដ្ឋសភាជាង២០០រូបរួមមានពីសមាជិករបស់គណបក្សកាន់អំណាចផងដែរ ក្នុងចំណោមសមាជិកសភាសរុប៣០០ បានបោះឆ្នោតទម្លាក់កាលថ្ងៃទី១៤ខែធ្នូរឆ្នាំ២០២៤ បន្ទាប់ពីលោកប្រកាសប្រើច្បាប់អាជ្ញាសឹកមិនជោគជ័យកាលថ្ងៃទី៣ខែធ្នូឆ្នាំ២០២៤។

ការប្រកាសប្រើច្បាប់របស់របស់លោក បាននាំប្រទេសកូរ៉េធ្លាក់ចូលក្នុងវិបត្តិនយោបាយដ៏ធ្ងន់ធ្ងរក្នុងប៉ុន្មានខែចុងក្រោយនេះ រហូតឈានដល់ការចាប់ខ្លួនលោក ទៅឃុំឃាំង និងការចោទពីបទបះបោរ និងការរំលោភអំណាចទៀតផង ប៉ុន្តែតុលាការក្រុងសេអ៊ូលបានលើកលែងការចោទប្រកាន់និងដោះលែងលោកឲ្យមានសេរីភាពកាលពីសប្តាហ៍មុន ដើម្បីត្រៀមទទួលយកសាលក្រមរបស់តុលាការធម្មនុញ្ ដែលគេរំពឹងថា នឹងប្រកាសនៅសប្តាហ៍ក្រោយនេះ។

ទន្ទឹមនឹងមានការតវ៉ាឲ្យបណ្តេញលោក Yoon ចេញពីអំណាច ក៏មានក្រុមតវ៉ាគាំទ្រលោក Yoon ក្នុងពេលជាមួយគ្នា៕

ដោយ រ៉ាន់ រើយ