ប្រេស៊ីល បន្តបំបែកកំណត់ត្រាអ្នកស្លាប់ដោយសារកូវីដ មួយថ្ងៃជាង៣ពាន់នាក់

ប្រទេសប្រេស៊ីល បានកត់ត្រាអ្នកស្លាប់ដោយសារជំងឺកូវីដ១៩ចំនួន ៣,២៥១នាក់បន្ថែមទៀតកាលពីថ្ងៃអង្គារ ដែលនេះជាកំណត់ត្រាថ្មីស្របពេលដែលប្រទេសនេះនៅតែបន្តដោះស្រាយជាមួយនឹងការកើនឡើងយ៉ាងគំហុកនៃករណីឆ្លង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការបូកសរុបរបស់សកលវិទ្យាល័យ Johns Hopkins បានឲ្យដឹងថា ប្រទេសប្រេស៊ីលបានរាយការណ៍ថា គិតត្រឹមពេលនេះ មានការឆ្លងជាង១២លានករណី និងមានមនុស្សស្លាប់ជាង២៩៥,០០០នាក់។

លោក Jair Bolsonaro កំពុងប្រឈមមុខនឹងការរិះគន់កាន់តែខ្លាំងឡើង ចំពោះវិបត្តិដែលកំពុងកើតមាន ប៉ុន្តែប្រធានាធិបតីប្រេស៊ីលស្តាំនិយមរូបនេះ នៅតែរក្សាជំហរប្រឆាំងនឹងវិធានការរឹតត្បិត ដោយប្រាប់ប្រជាជនប្រេស៊ីលថា វិធានការបែបនេះធ្វើឲ្យភាពក្រីក្រ កាន់តែអាក្រក់។

ទោះបីជាអត្រាឆ្លងហក់ឡើងខ្ពស់នាពេលថ្មីៗនេះក៏ដោយ ក៏ប្រជាជនប្រេស៊ីលមួយចំនួននៅតែធ្វើការតវ៉ាប្រឆាំងនឹងវិធានការរឹតត្បិតនៅក្នុងតំបន់ ដែលមានគោលបំណងទប់ស្កាត់ការរីករាលដាលនៃវីរុសកូវីដ១៩។

ស្របពេលជាមួយគ្នានោះ គម្រោងចែកចាយវ៉ាក់សាំងរបស់ប្រទេសនេះ ក៏ត្រូវបានញាំញីដោយភាពអប្រសិទ្ធិភាពនិងកំហឹងជាសាធារណៈផងដែរ។

វិទ្យាស្ថាន Fiocruz ដែលកំពុងផលិតវ៉ាក់សាំង AstraZeneca បាននិយាយកាលពីថ្ងៃអង្គារថា ខ្លួននឹងចែកចាយវ៉ាក់សាំងត្រឹមតែ១៨.៨លានដូសប៉ុណ្ណោះក្នុងខែមេសា ពោលគឺធ្លាក់ចុះពីការព្យាករណ៍ដំបូង ៣០លានដូស។

បើយោងតាមការស្ទង់មតិរបស់ Fiocruz បានបង្ហាញថា មានមនុស្សពេញវ័យប្រេស៊ីលត្រឹម ២,៦ភាគរយប៉ុណ្ណោះដែលបានទទួលការចាក់វ៉ាក់សាំងចំនួនពីរដូស ខណៈ៧,៦ភាគរយនៃប្រជាជនឬស្មើ ១២.១លាននាក់ បានទទួលវ៉ាក់សាំងមួយដូស៕

ប្រែសម្រួលដោយ៖ Vann Vann

ប្រភព៖ Al Jazeera

ចុចអាន៖ នៅតែច្រើន! ប្រេស៊ីល បន្តរកឃើញអ្នកឆ្លងកូវីដជិត ៨ ពាន់ករណី និងស្លាប់ជាង ២ ពាន់នាក់