រញ្ជួយដីកម្រិត ៥.០ រ៉ិចទ័រវាយប្រហារកោះតៃវ៉ាន់

រញ្ជួយដីកម្រិត ៥.០ រ៉ិចទ័របានវាយប្រហារភាគឦសានកោះតៃវ៉ាន់ នៅថ្ងៃពុធទី៩ខែមេសាឆ្នាំ២០២៥ ដែលបណ្តាលឱ្យអគារនានាញ័រនៅក្នុងទីក្រុងតៃប៉ិ។ នេះបើយោងតាមការចេញផ្សាយរបស់សារព័ត៌មាន CNA​ ដោយដកស្រង់ប្រភពពីទីភ្នាក់ងារស្ទាបស្ទង់ភូមិសាស្ត្រអាមេរិកហៅកាត់ USGS។

USGS បានឲ្យដឹងថា គ្រោះរញ្ជួយដីនេះមានជម្រៅជិត ៧០ គីឡូម៉ែត្រ ក្នុងតំបន់ Yilan ក្បែរទីក្រុងតៃប៉ិ បណ្ដាលឲ្យអគារនានាញ័រ។ ទោះយ៉ាងណាមិនមានរបាយការណ៍ភ្លាមៗអំពីការខូចខាត ឬជនរងគ្រោះទេ។ សេវារថភ្លើង រួមទាំងផ្លូវរថភ្លើងល្បឿនលឿនក៏មិនប៉ះពាល់ដោយការរញ្ជួយនេះដែរ។

គួរបញ្ជាក់ថា តៃវ៉ាន់តែងតែរងការរញ្ជួយដី ដោយសារតែទីតាំងរបស់កោះនេះស្ថិតនៅលើគែមនៃបន្ទះ tectonic ពីរជិតខ្សែក្រវាត់ភ្លើង Pacific Ring of Fire ដែល USGS ថាជាតំបន់មានសកម្មភាពរញ្ជួយខ្លាំងបំផុតនៅក្នុងពិភពលោក។

ការរញ្ជួយដីដ៏ធំចុងក្រោយរបស់តៃវ៉ាន់កើតឡើងក្នុងខែមេសា ឆ្នាំ២០២៤ ជារញ្ជួយដីកម្រិត ៧.៤ រ៉ិចទ័រ និងខ្លាំងបំផុតក្នុងរយៈពេល ២៥ឆ្នាំ។ មនុស្ស ១៧ នាក់បានស្លាប់ក្នុងការរញ្ជួយនោះ និងបង្កឱ្យមានបំណាក់ដី ព្រមទាំងខូចខាតអគារយ៉ាងធ្ងន់ធ្ងរនៅជុំវិញទីក្រុង Hualien ។

ចំណែកគ្រោះមហន្តរាយធម្មជាតិដ៏សាហាវបំផុតក្នុងប្រវត្តិសាស្ត្ររបស់កោះនេះគឺនៅឆ្នាំ១៩៩៩ ដែលជាការរញ្ជួយដីកម្រិត៧.៦រ៉ិចទ័រសម្លាប់មនុស្សប្រមាណ ២៤០០នាក់។

ចាប់តាំងពីពេលនោះមក តៃវ៉ាន់បានធ្វើបច្ចុប្បន្នភាព និងពង្រឹងការសាងសង់អគាររបស់ខ្លួន ដើម្បីបញ្ចូលវិធីសាស្រ្តសំណង់ដែលធន់នឹងការរញ្ជួយដី។ តៃវ៉ាន់ក៏បានបង្កើតប្រព័ន្ធព្រមានជាមុនកម្រិតខ្ពស់ដែលអាចជូនដំណឹងដល់សាធារណជនអំពីការរញ្ជួយដីធ្ងន់ធ្ងរក្នុងរយៈពេលតែប៉ុន្មានវិនាទីផងដែរ៕

អត្ថបទ៖ ប៊ុន សុភាព