ការ​វិ​វឌ្ឍ​សំខាន់ៗ​នៅ​ក្នុងកិច្ច​ចរចានុយក្លេអ៊ែរ​អាមេរិក-អ៊ីរ៉ង់

គិត​ត្រឹម​ថ្ងៃ​ទី​២៣​ខែ​មេសា​ឆ្នាំ​២០២៥​នេះ ការវិវឌ្ឍគួរ​​ឲ្យ​កត់សម្គាល់​ទាក់ទងនឹងកម្មវិធីនុយក្លេអ៊ែររបស់អ៊ីរ៉ង់ និងកិច្ច​ចរចាដែលកំពុងបន្តជាមួយសហរដ្ឋអាមេរិក មាន​ដូចជា៖

កិច្ចចរចានុយក្លេអ៊ែរអាមេរិក-អ៊ីរ៉ង់​ដែល​កំពុងដំណើរការ

កិច្ច​ចរចានុយក្លេអ៊ែរដោយប្រយោលរវាងអ៊ីរ៉ង់ និងសហរដ្ឋអាមេរិកកំពុងឈានទៅរកការពិភាក្សា «កម្រិតអ្នកជំនាញ» ដែលបង្ហាញពីការផ្លាស់ប្តូរឆ្ពោះទៅរក​ជំនួប​បច្ចេកទេសលម្អិតបន្ថែមទៀត។ កិច្ចពិភាក្សា​​កម្រិត​អ្នក​ជំនាញ​នេះ ដើម​ឡើយ​គ្រោងនឹងធ្វើឡើងដំបូងក្នុងថ្ងៃ​ពុធ​នេះ តែ​ត្រូវបានពន្យារពេលទៅថ្ងៃសៅរ៍​ទី​២៦​ខែមេសា​វិញ ដើម្បី​ឲ្យ​ស្របទៅនឹងជុំទីបីនៃការពិភាក្សាការទូត​កម្រិត​ខ្ពស់​នៅក្នុងប្រទេសអូម៉ង់។

ការ​ប្រជុំ​លើក​​មុន ដែលបានធ្វើឡើងនៅទីក្រុងរ៉ូមកាល​ពី​ថ្ងៃទី​១៩​ខែមេសា អាច​ចាត់​ទុក​ថា​ទទួល​បាន​ផ្លែផ្កា​ល្អ​ ដោយភាគីទាំងពីរបង្ហាញពីសុទិដ្ឋិនិយម​យ៉ាង​ប្រុងប្រយ័ត្នចំពោះការឈានដល់កិច្ចព្រមព្រៀងក្របខ័ណ្ឌមួយ។

​ឆន្ទៈ​​អ៊ីរ៉ង់​សម្រាប់​កិច្ច​ព្រម​ព្រៀង​

ប្រធានាធិបតីអ៊ីរ៉ង់ លោក Masoud Pezeshkian បានរំលឹកឡើងវិញនូវការត្រៀមខ្លួនរបស់ទីក្រុងតេហេរ៉ង់ ក្នុងការ​សម្រេច​បាន​នូវ​កិច្ចព្រមព្រៀងនុយក្លេអ៊ែរ ជា​ថ្នូរ​នឹង​ការ​ដក​ទណ្ឌកម្មរបស់សហរដ្ឋអាមេរិក។ អ៊ីរ៉ង់​បាន​ស្នើ​ផែនការ​បី​ដំណាក់កាល​ ដើម្បី​កំណត់​ការ​ចម្រាញ់​សារធាតុ​អ៊ុយរ៉ាញ៉ូម​ដូច​ទៅ​អ្វី​ដែល​ធ្លាប់​​ធ្វើ​កាល​ពី​​កិច្ច​ព្រមព្រៀង​នុយក្លេអ៊ែរ​ឆ្នាំ​២០១៥ (JCPOA) ដែល​ទាក់ទង​នឹង​ការ​បន្ធូរបន្ថយ​ការ​រឹតត្បិត​សេដ្ឋកិច្ច។

ទណ្ឌកម្ម​ថ្មី​របស់​អាមេរិក​លើ​អ៊ីរ៉ង់

នៅ​ក្នុង​ពេល​ដំណាល​​គ្នា​នេះ ក្រសួងរតនាគារសហរដ្ឋអាមេរិកបានប្រកាសពីការដាក់ទណ្ឌកម្មថ្មី ដែលផ្តោតលើមហាសេដ្ឋី​​​​ហ្គាស​ម្នាក់​របស់អ៊ីរ៉ង់ រួម​ទាំង​កូនប្រុសរបស់គាត់ និងបណ្តាញក្រុមហ៊ុនដែលពាក់ព័ន្ធ។ វិធានការនេះ មានគោលបំណងដាក់សម្ពាធបន្ថែមលើសេដ្ឋកិច្ចរបស់អ៊ីរ៉ង់ មុនពេលការចរចានាពេលខាងមុខ។

ការចូលរួមក្នុងតំបន់ និងអន្តរជាតិ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានពិភាក្សាអំពីកម្មវិធីនុយក្លេអ៊ែររបស់អ៊ីរ៉ង់ ជាមួយ​ព្រះ​អង្គ​ម្ចាស់ Haitham bin Tariq Al Said នៃប្រទេសអូម៉ង់ ក្នុងអំឡុងទស្សនកិច្ចរបស់ស្តេចស៊ុលតង់ទៅកាន់ទីក្រុងមូស្គូ។ រុស្ស៊ី​បាន​បង្ហាញ​ការ​គាំទ្រ​ចំពោះ​កិច្ច​ចរចា​រវាង​អាមេរិក​និង​អ៊ីរ៉ង់​ដែល​កំពុង​បន្ត ហើយ​កំពុង​តាម​ដាន​ស្ថានការណ៍​យ៉ាង​ដិត​ដល់។

កិច្ចពិភាក្សាកម្រិតអ្នកជំនាញនាពេលខាងមុខនៅក្នុងប្រទេសអូម៉ង់ ត្រូវ​គេរំពឹងថានឹងស្វែងយល់ពីទិដ្ឋភាពបច្ចេកទេសនៃសកម្មភាពនុយក្លេអ៊ែររបស់អ៊ីរ៉ង់ និងការដកទណ្ឌកម្មដ៏មានសក្តានុពល។ អ្នកសង្កេតការណ៍កំពុងឃ្លាំមើលយ៉ាងយក​ចិត្ត​ទុក​ដាក់ ដើម្បី​តាម​ដាន​ថាតើការពិភាក្សាទាំងនេះអាចត្រួសត្រាយផ្លូវសម្រាប់កិច្ចព្រមព្រៀងជាថ្មី ដែលដោះស្រាយកង្វល់របស់ភាគីទាំងពីរ​​បាន​ដែរ​ឬ​ក៏​អត់៕

ដោយ៖ ឈាង