មីយ៉ាន់ម៉ា៖ ​ក្រោយរញ្ជួយដី មនុស្សជាង៤ម៉ឺននាក់ រស់​នៅក្រោមតង់​បណ្តោះអាសន្ន ខណៈភ្លៀង​​​​​បង្អុរខ្លាំង​

​ប្រជាជន​​មីយ៉ាន់​ម៉ា​ជាង៤ម៉ឺននាក់កំពុងរស់នៅក្នុងតង់ និងជម្រកបណ្តោះអាសន្ន​​ច្រើន​កន្លែង​អស់រយៈពេល​​មួយខែមក​ហើយ បន្ទាប់ពីការរញ្ជួយដីដ៏ខ្លាំងក្លា​នៅ​​ភូមិភាគ​កណ្តាល​​នៃ​​ប្រទេសមីយ៉ាន់ម៉ា ជាមួយនឹងសកម្មភាពរញ្ជួយដីដែលកំពុងបន្តធ្វើឱ្យពួកគេមិនអាចត្រឡប់ទៅផ្ទះរបស់ពួកគេវិញ ឬចាប់ផ្តើមជួសជុលបានទេ។ នេះបើយោងតាមការចេញផ្សាយរបស់ Save the Children International កាលពីថ្ងៃទី២៣ខែមេសា។

អង្គការ Save the Children បានឲ្យដឹងថា ក្រោយរងគ្រោះរញ្ជួយដី មនុស្សប្រហែល២ម៉ឺននាក់ រួមទាំងស្ត្រី និងកុមារជាច្រើនត្រូវបានផ្លាស់ទីលំនៅ ក្នុងនោះមនុស្សប្រហែល៤២០០០ នាក់កំពុងរស់នៅក្នុងជម្រកបណ្តោះអាសន្នចំនួន ១៤៥ ដែលសាងសង់ពីសម្ភារៈដែលមិនអាចទប់ទល់នឹងបញ្ហាអាកាសធាតុ ដូចជាភ្លៀងធ្លាក់ខ្លាំង និងកំដៅខ្លាំងបាននោះទេ។

ជនភៀសខ្លួនជាច្រើននាក់ក៏ខ្វះលទ្ធភាពទទួលបានប្រភពទឹកស្អាតសម្រាប់ផឹក និងប្រើប្រាស់ ដែលជាកត្តាសំខាន់បណ្ដាលឲ្យមានការរីករាលដាលនៃជំងឺពីទឹកមិនស្អាត និងជំងឺដែលបណ្តាលមកពីមូស ដូចជាជំងឺអាសន្នរោគ និងគ្រុនឈាម និងការឆ្លងមេរោគលើស្បែកជាដើម។

គួររម្លឹកថា គ្រោះរញ្ជួយដីកម្រិត ៧.៧ រ៉ិចទ័រ ដែលជាកម្លាំងរញ្ជួយខ្លាំងបំផុតក្នុងរយៈពេលមួយសតវត្សមិនធ្លាប់មាន បានវាយប្រហារភាគកណ្តាលប្រទេសមីយ៉ាន់ម៉ា កាលពីថ្ងៃទី២៨ខែមីនា ធ្វើឲ្យអគារជាច្រើនដួលរលំ។

យោងតាម Mizzima News គ្រោះរញ្ជួយដីនេះបណ្ដាលឲ្យមនុស្សចំនួន ៥,៣៥២នាក់ស្លាប់, របួស ៧,១០៨នាក់ និងបាត់ខ្លួនចំនួន ៥៣៨នាក់។ ប៉ុន្តែបើតាមក្រុមប្រឹក្សារដ្ឋបាលរដ្ឋរបស់របបយោធា មានមនុស្ស ៣,៧២៧ នាក់បានស្លាប់, ១២៩នាក់កំពុងបាត់ខ្លួន និង ៥,១០៦ នាក់បានរងរបួស។

រហូតមកដល់ពេលនេះសកម្មភាពរញ្ជួយដីកម្រិតស្រាលនៅតែមានស្ទើរតែរៀងរាល់ថ្ងៃ បានបង្កើនការព្រួយបារម្ភអំពីលទ្ធភាពជួសជុល ឬសាងសង់រចនាសម្ព័ន្ធឡើងវិញមុនរដូវវស្សារបស់ប្រទេសមីយ៉ាន់ម៉ាមកដល់នៅក្នុងខែឧសភាខាងមុខ ខណៈភ្លៀងធ្លាក់ខ្លាំងនៅដើមខែនេះ ក៏បានជន់លិចជំរំសម្រាប់គ្រួសារដែលផ្លាស់ទីលំនៅនៅជិតទីក្រុង Mandalay រួចទៅហើយ៕

អត្ថបទ៖ ប៊ុន សុភាព