សិស្សវិទ្យាល័យចាក់សម្លាប់សិស្សគ្នាឯងនៅបារាំង

ក្មេងស្រីជំទង់សិស្សសាលាម្នាក់បានស្លាប់ និងសិស្ស៣នាក់បានរងរបួស នៅក្នុងហេតុការណ៍វាយ​ប្រហារ​ចាក់សម្លាប់​គ្នា​ក្នុង​សាលារៀន​ឯកជនមួយ នៅភាគខាងលិចប្រទេសបារាំង។ នេះបើយោងតាមការចេញផ្សាយរបស់សារព័ត៌មាន​ BBC នៅថ្ងៃទី២៥ខែមេសានេះ។

ការវាយប្រហារនេះបានកើតឡើងនៅសាលាឯកជន Notre-Dame-de-Toutes-Aides ក្នុងទីក្រុង Nantes កាលពីរសៀលថ្ងៃព្រហស្បតិ៍បណ្ដាលឲ្យ​ក្មេងស្រី​សិស្សសាលាអាយុ១៥ឆ្នាំម្នាក់ស្លាប់និង៣នាក់ទៀតបានរងរបួស ត្រូវ​បញ្ជូនទៅមន្ទីពេទ្យ។

ហេតុការណ៍នេះបានធ្វើឲ្យសិស្សជាច្រើនភ័យស្លន់ស្លោ ដោយខ្លះត្រូវបានេជម្លៀសចេញ។ ចំពោះសិស្សវិទ្យាល័យដែលជាជនបង្កត្រូវបានគ្រូបង្រៀនឃាត់ខ្លួននៅកន្លែង​កើត​ហេតុ​ ប្រគល់ឲ្យប៉ូលិស ខណៈ​ឈ្មោះ​របស់ជនសង្ស័យមិនត្រូវបានបញ្ចេញជា​សាធារណៈ​នោះទេ។

គួរបញ្ជាក់ថាសាលានេះមានសិស្សប្រហែល ២០០០ នាក់ និងអប់រំសិស្សចាប់ពីថ្នាក់មត្តេយ្យរហូតដល់វិទ្យាល័យ។
ការវាយប្រហារដ៏សាហាវបែបនេះគឺកម្រមានណាស់នៅក្នុងសាលាបារាំង ខណៈមូលហេតុដែលនាំឲ្យមានការចាក់សម្លាប់នេះមិនត្រូវបានដឹងនៅឡើយនោះទេ។

ពាក់ព័ន្ធនឹងបញ្ហានេះប្រធានាធិបតីបារាំងលោក Emmanuel Macron បានបញ្ជាក់អំពីការស្លាប់ និងរបួសនៅលើX ហើយបានសរសើរគ្រូបង្រៀនដែលបានធ្វើអន្តរាគមន៍នៅកន្លែងកើតហេតុផងដែរ។

ជាមួយគ្នានេះនាយករដ្ឋមន្រ្តីបារាំងលោក Francois Bayrou បានបញ្ជាឱ្យរឹតបន្តឹងសន្តិសុខនៅខាងក្រៅ និងខាងក្នុងសាលារៀនទូទាំងប្រទេស ក្នុងរយៈពេល ៤ សប្តាហ៍ដើម្បីទប់ស្កាត់ និងដាក់ទណ្ឌកម្មលើអំពើហិង្សាដោយកាំបិតពីក្មេងជំទង់ និងកុមារ៕

អត្ថបទ៖ ប៊ុន សុភាព