ព័ត៌មានអន្ដរជាតិ

ស្លាប់៦៨នាក់ ក្រោយអាមេរិកវាយប្រហារលើមន្ទីរឃុំខ្លួនជនចំណាកស្រុកនៅយេម៉ែន

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

Chheang

ការវាយប្រហារតាមអាកាសរបស់សហរដ្ឋអាមេរិកកាលពីថ្ងៃទី២៨ ខែមេសា ឆ្នាំ២០២៥ បានកំណត់គោលដៅលើមន្ទីរឃុំឃាំងជនចំណាកស្រុកមួយកន្លែងនៅទីក្រុង Saada ប្រទេសយេម៉ែន ដែលបណ្តាលឲ្យមានជនចំណាកស្រុកអាហ្វ្រិកយ៉ាងតិច ៦៨នាក់ស្លាប់ និង ៤៧នាក់ផ្សេងទៀតរងរបួស។ នេះបើយោងតាមប្រព័ន្ធផ្សព្វផ្សាយដែលគ្រប់គ្រងដោយក្រុមហ៊ូធី និងមន្ត្រីយេម៉ែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លែងកើតហេតុ មានផ្ទុកជនចំណាកស្រុកជាង ១០០នាក់ ហើយស្ថិតក្រោមការត្រួតពិនិត្យដោយអង្គការអន្តរជាតិសម្រាប់ការធ្វើចំណាកស្រុក (IOM) និងកាកបាទក្រហម។ ការវាយប្រហារនេះ គឺជាផ្នែកមួយនៃប្រតិបត្តិការ «Rough Rider» សម្រាប់យុទ្ធនាការយោធារបស់សហរដ្ឋអាមេរិកដែលបានចាប់ផ្តើមនៅថ្ងៃទី១៥ ខែមីនា ឆ្នាំ២០២៥ ក្នុងគោលបំណងលុបបំបាត់ការគំរាមកំហែងរបស់ហ៊ូធី ចំពោះការដឹកជញ្ជូននៅសមុទ្រក្រហម និងធ្វើឲ្យការដឹកនាំរបស់ពួកគេចុះខ្សោយ។ ចាប់តាំងពីប្រតិបត្តិការចាប់ផ្តើម សហរដ្ឋអាមេរិកបានធ្វើការវាយប្រហារតាមអាកាសជាង ៨០០លើកនៅក្នុងប្រទេសយេម៉ែន។

ឧប្បត្តិហេតុនេះ បានបង្កឲ្យមានការថ្កោលទោសយ៉ាងខ្លាំងពីអង្គការមនុស្សធម៌អន្តរជាតិ និងក្រុមសិទ្ធិមនុស្ស ដែលបានអំពាវនាវឲ្យមានការស៊ើបអង្កេតជាបន្ទាន់ និងការទទួលខុសត្រូវ។

សូមបញ្ជាក់ថា ទីតាំងមន្ទីរឃុំខ្លួនដែលរងគ្រោះលើកនេះ ធ្លាប់រងការវាយប្រហារម្ដងរួចមកហើយកាលពីឆ្នាំ២០២២ដោយក្រុមចម្រុះដឹកនាំដោយប្រទេសអារ៉ាប៊ីសាអូឌីត ដែលបណ្ដាលឲ្យមានអ្នកស្លាប់ និងរបួសជាច្រើន។ ការកំណត់គោលដៅម្តងហើយម្តងទៀតលើទីតាំងដដែលគ្នានេះ គូសបញ្ជាក់អំពីហានិភ័យដែលកំពុងប្រឈមសម្រាប់ជនចំណាកស្រុកនៅក្នុងតំបន់ជម្លោះ និងមានការចោទជាសំណួរអំពីប្រសិទ្ធភាព និងផលប៉ះពាល់មនុស្សធម៌នៃប្រតិបត្តិការយោធានៅក្នុងតំបន់៕

ដោយ៖ ឈាង

ចុចអាន៖ ហ៊ូធី លែងសូវហ៊ានបាញ់មីស៊ីល ក្រោយអាមេរិកវាយប្រហារជាង ៨០០លើក តាំងពីពាក់កណ្ដាលខែមីនា