ព័ត៌មានអន្ដរជាតិ

ប៉ូលិសការពារព្រំដែនថៃ៣រូបរងរបួសក្នុងការបំផ្ទុះគ្រាប់បែកនៅខេត្តភាគខាងត្បូងប្រទេស

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

ជនដៃដល់មិនស្គាល់អត្តសញ្ញាណ បានបំផ្ទុះគ្រាប់បែកសំដៅរថពាសដែករបស់អង្គភាពនគរបាលការពារព្រំដែននៅភាគខាងត្បូងថៃ បណ្តាលឱ្យមន្ត្រី៣នាក់រងរបួស និងបានបង្កជាក្តីបារម្ភចំពោះអំពើហិង្សាផ្ទុះឡើងវិញនៅភាគខាងត្បូងប្រទេសថៃ ដែលមានប្រវត្តិទាមទារបំបែករដ្ឋក្នុងសម័យកាលកាន់់កាប់អំណាចរបស់លោក ថាក់ស៊ីន ស៊ីណាវ៉ាត្រ។

កន្លែងបំផ្ទុះគ្រាប់បែកសំដៅរថពាសដែកប៉ូលិសព្រំដែនថៃ។ The Reporters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍ របស់សារព័ត៌មាន The Reporters របស់ប្រទេសថៃ បានឲ្យដឹងថា នៅវេលាម៉ោង៩និង៣០នាទីព្រឹកថ្ងៃទី២៨ខែមេសានេះ មានសេចក្តីរាយការណ៍ថា មានហេតុការណ៍បំផ្ទុះគ្រាប់បែកមួយកើតឡើងលើអង្គភាពនគរបាលការពារព្រំដែនគោកលេខ៤៤១២ នៅភាគខាងត្បូងថៃ ដែលបង្កឡើងដោយជនមិនស្គាល់អត្តសញ្ញាណម្នាក់បណ្តាលឱ្យមន្ត្រីនគរបាលការពារព្រំដែន៣នាក់រងរបួស និងរថពាសដែកក្រឡាប់ផ្ងារជើងរងការខូចខាត។

សេចក្តីរាយការណ៍បឋម បានឱ្យដឹងថា ក្នុងខណៈពេលដែលមន្ត្រីនគរបាលការពារព្រំដែនដែលរងរបួសទាំង៣នាក់កំពុងធ្វើដំណើរវិលត្រឡប់មកពីត្រួតពិនិត្យសុខភាពវិញដោយជិះរថពាសដែក១គ្រឿងរបស់អង្គភាព ហើយពេលមកដល់កន្លែងកើតហេតុ ជនដៃដល់បានធ្វើសកម្មភាពបំផ្ទុះគ្រាប់បែកដែលខ្លួនបានបង្កប់លើទ្រូងផ្លូវ ផ្ទុះបណ្តាលឱ្យរថពាសដែកខាងលើក្រឡាប់ផ្ងារជើងរងការខូចខាត និងបណ្តាលឱ្យមន្ត្រីនគរបាលការពារព្រំដែនទាំង៣នាក់ជាប់ក្នុងរថពាសដែកនោះរងរបួស។

ក្រោយកើតហេតុគេឃើញក្រុមជួយសង្គ្រោះបានចុះទៅដល់កន្លែងកើតហេតុដើម្បីជួយសង្គ្រោះ និងបានបញ្ជូនអ្នករងគ្រោះទាំង៣នាក់ទៅកាន់មន្ទីរពេទ្យខេត្តយ៉ាឡា (Yala)។

គួររំលឹកថា មួយរយៈចុងក្រោយនេះ ពោលគឺក្នុងសម័យរដ្ឋាភិបាលរបស់លោកស្រី ផែថងថាន ស៊ីណាវ៉ាត្រ ស្ថានការណ៍អសន្តិសុខនៅព្រំដែនភាគខាងត្បូងថៃហាក់កម្រើកឡើងវិញ ដោយមានហេតុការណ៍បំផ្ទុះគ្រាប់បែកកើតឡើងជាញឹកញាប់ បើធៀបនឹងសម័យរដ្ឋាភិបាលរបស់លោកឧត្តមសេនីយ៍ ប្រាយុទ្ធ ចាន់អូចា៕

ដោយ ភ្នាក់ងារ