លោក ស៊ី ជីនពីង ទៅ​ដល់​ក្រុងមូស្គូ ដើម្បីពង្រឹងភាពជាដៃគូ«គ្មានដែនកំណត់» ជាមួយ ពូទីន

ប្រធានាធិបតីចិនលោក ស៊ី ជីនពីង បានចាប់ផ្តើមដំណើរទស្សនកិច្ចផ្លូវការរយៈពេលបួនថ្ងៃទៅកាន់ប្រទេសរុស្ស៊ីនា​ថ្ងៃ​ពុធ​ទី​៧ខែ​ឧសភា​នេះ ក្នុងគោលបំណងពង្រឹងភាពជាដៃគូយុទ្ធសាស្ត្រ«គ្មានដែនកំណត់» ជាមួយប្រធានាធិបតីរុស្ស៊ីលោក វ៉្លាឌីមៀរ ពូទីន។

ដំណើរទស្សនកិច្ច​របស់​លោក ស៊ី ធ្វើ​ឡើង​ស្របពេលជាមួយខួបលើកទី​៨០​​នៃ​ទិវា​ជ័យជម្នះរបស់សហភាពសូវៀតលើពួកណាស៊ីអាល្លឺម៉ង់ ដែលប្រារព្ធ​​រៀងរាល់​ឆ្នាំនៅថ្ងៃទី​៩​ខែឧសភា។ អំឡុង​ពេល​នៅ​​​ទីនោះ លោក ស៊ី គ្រោងនឹងចូលរួមនៅក្នុងក្បួនដង្ហែយោធាទិវាជ័យជម្នះ​នៅទីលាន Red Square នៃទីក្រុងមូស្គូ ជាកន្លែងដែលកងទ័ពចិននឹងដើរដង្ហែជាមួយកងកម្លាំងរុស្ស៊ី។

ព្រឹត្តិការណ៍នេះ បានគូសបញ្ជាក់ពីទំនាក់ទំនងកាន់តែស៊ីជម្រៅរវាងប្រជាជាតិទាំងពីរ ចំពេលមានភាពតានតឹងដែលកំពុងបន្តជាមួយបណ្តាប្រទេសលោកខាងលិចជុំវិញជម្លោះអ៊ុយក្រែន។

ដំណើរទស្សនកិច្ចនេះ ត្រូវបានគេរំពឹងថានឹងមានការចុះហត្ថលេខាលើកិច្ចព្រមព្រៀងទ្វេភាគីជាច្រើន ដោយផ្តោតលើកិច្ចសហប្រតិបត្តិការថាមពល រួមទាំងការពិភាក្សាលើគម្រោងបំពង់បង្ហូរឧស្ម័ន «Power of Siberia 2»។ ប្រទេសចិន ដែលជាដៃគូពាណិជ្ជកម្មដ៏ធំបំផុតរបស់រុស្ស៊ី បានផ្តល់ការគាំទ្រផ្នែកសេដ្ឋកិច្ចយ៉ាងសំខាន់តាមរយៈការបង្កើនការនាំចូលថាមពល ដោយជួយរុស្ស៊ីកាត់បន្ថយផលប៉ះពាល់នៃទណ្ឌកម្មរបស់លោកខាងលិច។

ជំនួយ​ការ​របស់​ប្រធានាធិបតី​រុស្ស៊ី លោក Yuri Ushakov បាន​ឲ្យ​ដឹង​ថា លោក​ ពូទីន គ្រោង​នឹង​​ធ្វើ​ដំណើរទស្សនកិច្ចទៅកាន់ប្រទេស​ចិននៅចុង​ខែ​សីហា ឬ​ដើម​ខែ​កញ្ញា​ខាង​មុខ ក្នុង​គោល​បំណង​ពង្រឹងបន្ថែមទៀតនូវសម្ព័ន្ធភាពជាយុទ្ធសាស្ត្ររវាងប្រទេសទាំងពីរ៕

ដោយ៖ ឈាង