ជប៉ុន ជួបគ្រោះរញ្ជួយដីដ៏ខ្លាំងក្លាមួយទៀត

យោងតាមការស្ទង់ភូមិសាស្ត្រអាមេរិក (USGS) បាននិយាយថា ការរញ្ជួយដីកម្រិត ៥.៩ រ៉ិចទ័រត្រូវបានកើតឡើងនៅកោះ Ryukyu ភាគខាងត្បូងរបស់ប្រទេសជប៉ុន ។

ការរញ្ជួយនេះបានកើតឡើងនៅម៉ោង ១០ និង ០២ នាទីយប់ថ្ងៃសុក្រចម្ងាយ ១៤៧ គីឡូម៉ែត្រភាគខាងជើងទីក្រុង Hirara ក្នុងខេត្ត Okinawa ។ ចំណុចកណ្តាលនៃការរញ្ជួយដីស្ថិតនៅជម្រៅ ១៥៣ គីឡូម៉ែត្រ ។

ទន្ទឹមនោះមិនមានរបាយការណ៍អំពីការស្លាប់ និងការខូចខាតណាមួយដែលបណ្តាលមកពីការរញ្ជួយដីនេះនោះទេ ខណៈក៏មិនមានការប្រកាសអាសន្នពីរលកយក្សស៊ូណាមិផងដែរ ។

ប្រទេសជប៉ុនមានទីតាំងស្ថិតនៅក្នុងតំបន់ដែលមានសកម្មភាពរញ្ជួយដីដែលត្រូវបានគេស្គាល់ថាជា Ring of Fire និងជួបការរញ្ជួយដីយ៉ាងខ្លាំងក្លា ។  ជួបការរញ្ជួយដីកម្រិត ៩.០ រ៉ិចទ័រនៅខែមីនា ឆ្នាំ ២០១១  ហើយបន្ទាប់មករលកយក្សស៊ូណាមិបានសម្លាប់មនុស្សជាង ១៥,០០០ នាក់ និងបង្កគ្រោះមហន្តរាយរោងចក្រនុយក្លេអ៊ែរហ្វូគូស៊ីម៉ា ជាដើម ។

ស្របពេលជាមួយគ្នានេះកាលពីថ្ងៃសៅរ៍សប្ដាហ៍មុនប្រទេសជប៉ុនបានជួបការរញ្ជួយដីដ៏ខ្លាំងមួយដែលធ្វើឲ្យរង្គើអគារជាច្រើននៅក្នុងរាជធានីតូក្យូ និងបណ្តាលឲ្យមានការប្រកាសអាសន្នពីរលកយក្សស៊ូណាមិនៅឆ្នេរសមុទ្រភាគឦសានប្រទេស ហើយត្រូវបាន USGS ដាក់កម្លាំងនៃការរញ្ជួយនេះថាមានកម្រិត ៧.០ រ៉ិចទ័រ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ជប៉ុន ជួបការរញ្ជួយដីខ្លាំងក្លា និងប្រកាសអាសន្នពីរលកយក្សស៊ូណាមិ

ចុចអាន ៖ មិនធម្មតា! មួយសប្ដាហ៍ ជប៉ុនរកឃើញអ្នកឆ្លងវីរុសបំប្លែងខ្លួនថ្មីជាង ១២០ ករណី