ថៃ មានអ្នកស្លាប់ជាបន្ត ដោយសារកូវីដ ខណៈមនុស្សអាយុចន្លោះ ៣០-៣៩ឆ្នាំ ងាយឆ្លងវីរុសបំប្លែងថ្មីបំផុត

ក្នុងរយៈពេលមួយសប្តាហ៍ គិតចាប់ពីថ្ងៃ១១-១៧ខែឧសភាឆ្នាំ២០២៥ ប្រទេសថៃ បានកត់ត្រាពីករណីឆ្លងកូវីដ-១៩ រឹតតែខ្លាំង ខណៈក្នុងនោះក៏មានមនុស្សស្លាប់២នាក់ផងដែរ ហើយដ្បិតថា តួលេខមនុស្សស្លាប់ ស្ថិតនៅកម្រិតទាប ប៉ុន្តែវាក៏បង្កជាក្តីបារម្ភផងដែរ ព្រោះថា បើគ្មានវិធានការការពារទេនោះ ស្ថានភាពអាចនឹងកាន់តែអាក្រក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Thailand Business News ដោយដកស្រង់ប្រភពពីក្រសួងសុខាភិបាលសាធារណៈថៃ បានចុះផ្សាយកាលពីថ្ងៃអង្គារទី២០ខែឧសភាថា ករណីស្លាប់ទាំងពីរ គឺស្ថិតនៅក្នុងខេត្ត Kanchanaburi និង Sukhothai។

ទោះបីជាយ៉ាងណាក៏ដោយ មានប្រភពក្រៅផ្លូវការហ៊ានអះអាងថា តាមពិតតួលេខមនុស្សស្លាប់ពិតប្រាកដ អាចកើនលើសនេះ គ្រាន់តែក្រសួងមិនដាក់បញ្ចូលក្នុងរបាយការណ៍។

ចំពោះតួលេខមនុស្សស្លាប់ថ្មីនេះ ដ្បិតតែវាធ្លាក់ចុះបន្តិចបើធៀបនឹងសប្តាហ៍មុន (៤-១០ខែឧសភា) ក៏ដែលមានមនុស្សស្លាប់៦នាក់ក៏ពិតមែន ប៉ុន្តែនេះសបញ្ជាក់ឲ្យឃើញថា មនុស្សស្លាប់ដោយសារជំងឺកូវីដ១៩នៅប្រទេសថៃ ចេះតែមានជាបន្តបន្ទាប់ក្នុងការវាយប្រហាររលកថ្មី។

ម្យ៉ាងក្រសួងរកឃើញថា ក្នុងរលកថ្មីនេះ គឺមានការជំរុញករណីឆ្លងខ្លាំងដោយសារវីរុសអូមីក្រុងបំប្លែងខ្លួនប្រភេទ XEC ហើយមនុស្សដែលមានអាយុចន្លោះ៣០-៣៩ឆ្នាំ ជាក្រុមមនុស្សងាយឆ្លងវីរុសបំប្លែងថ្មីនេះបំផុត។

បើនិយាយពីករណីឆ្លងវិញ ក្នុងរយៈពេលត្រឹមមួយសប្តាហ៍ប៉ុណ្ណោះ គិតចាប់ពីថ្ងៃទី១១ដល់១៧ខែឧសភា ថៃមានមនុស្សឆ្លងកូវីដរហូតដល់ទៅ ៣៣ ០៣០ករណី ខណៈរាជធានីបាងកក ធ្ងន់ធ្ងរជាងគេ ដោយមានអ្នកឆ្លងដល់ទៅ ៦ ២៩០ករណី។

ទន្ទឹមនោះ ក្រសួងរកឃើញថា ក្នុងចំណោមករណីឆ្លងកូវីដសរុប គិតចាប់តាំងពីខែមករាឆ្នាំនេះមក មាន ១០៨ ៨៩១ករណីជាប្រភេទអូមីក្រុងបំប្លែងថ្មី XEC ក្នុងនោះស្លាប់ ២៧នាក់។ មិនត្រឹមប៉ុណ្ណឹង ក្រសួងបានព្រមានដល់ពលរដ្ឋឲ្យប្រុងប្រយ័ត្នព្រោះថា វីរុសអូមីក្រុងបំប្លែងថ្មី XEC នេះឆ្លងរាលដាលលឿនជាងជំងឺផ្តាសាយរហូតដល់ទៅ៧ដងឯណោះ៕

អត្ថបទ៖ សុខ សុវណ្ណ

ចុចអាន៖ ការពារខ្លួន! ថៃ ព្រមានថា អូមីក្រុងបំប្លែងថ្មី XEC ឆ្លងលឿនជាងផ្តាសាយ ៧ដងឯណោះ