កូរ៉េខាងជើង ព្រមានបាញ់មីស៊ីលបន្ថែម មុនកិច្ចប្រជុំក្រុមប្រឹក្សាសន្តិសុខ UN

កូរ៉េខាងជើងនិយាយថា រាល់ការប៉ុនប៉ងរំលោភសិទ្ធិការពារខ្លួនពីបរទេសនឹងជៀសមិនផុតពីវិធានការណ៍តបតវិញឡើយ ហើយអាចនឹងមានការបាញ់មីស៊ីលបន្ថែមផងដែរ ។

លោក Jo Chol Su អគ្គនាយកនៃនាយកដ្ឋានអង្គការអន្តរជាតិរបស់ក្រសួងការបរទេសបានចេញសេចក្តីថ្លែងការណ៍ខាងលើតាមរយៈទីភ្នាក់ងារព័ត៌មាន KCNA នៅថ្ងៃចន្ទនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះក្រុមប្រឹក្សាសន្តិសុខអង្គការសហប្រជាជាតិ (UNSC) តាមសេចក្តីរាយការណ៍គ្រោងនឹងបើកកិច្ចប្រជុំបិទទ្វារមួយនៅថ្ងៃអង្គារ បន្ទាប់ពីមានការបាញ់មីស៊ីលផ្លោង Ballistic ពីរគ្រាប់ដោយកូរ៉េខាងជើងកាលពីថ្ងៃព្រហស្បតិ៍សប្តាហ៍មុន ។

លោក Jo បាននិយាយថា ប្រទេសជាច្រើនកំពុងបាញ់គ្រាប់មីស៊ីលគ្រប់ប្រភេទក្នុងគោលបំណងបង្កើនកម្លាំងយោធារបស់ពួកគេ ។ លោកបាននិយាយថា វាគ្មានន័យអ្វីទាល់តែសោះដែលមានតែវិធានការការពារខ្លួនដ៏ត្រឹមត្រូវរបស់កូរ៉េខាងជើងត្រូវបានគេចាត់ទុកជាការបរិហារ ឬជាការរំលោភបំពាន ។

លោក Jo បាននិយាយថា ប្រសិនបើក្រុមប្រឹក្សាសន្តិសុខអង្គការសហប្រជាជាតិនៅតែបន្តប្រកាន់ខ្ជាប់នូវស្តង់ដាររបស់ខ្លួនបែបនេះនោះ វានឹងបង្កឲ្យមានភាពធ្ងន់ធ្ងរ មិនមានការលើកលែងទោស ហើយនឹងមានការប្រឈមមុខដាក់គ្នា និងគ្មានការសន្ទនានៅលើឧបទ្វីបកូរ៉េឡើយ ។

បន្ថែមពីនេះចិន និងរុស្ស៊ីដែលមានទំនាក់ទំនងមិត្តភាពជាមួយកូរ៉េខាងជើងនិយាយថា ក្រុមប្រឹក្សាសន្តិសុខគួរតែបន្ធូរបន្ថយទណ្ឌកម្មប្រឆាំងកូរ៉េខាងជើងពីទស្សនៈវែងឆ្ងាយ ខណៈជំហររបស់ពួកគេលើបញ្ហានេះគឺផ្ទុយស្រឡះពីជំហររបស់សហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក គីម ជុងអ៊ុន កំពុងបាត់ខ្លួន?

ចុចអាន ៖ កូរ៉េខាងជើង ថា មីស៊ីលដែលបាញ់កាលពីម្សិលមិញជាការសាកល្បងប្រព័ន្ធអាវុធយុទ្ធសាស្ត្រថ្មី