ពលរដ្ឋប៉ាឡេស្ទីនរាប់ពាន់នាក់ នៅ​ហ្គាហ្សា រត់ជាន់គ្នា ទៅយកជំនួយ 

ពលរដ្ឋប៉ាឡេស្ទីនរាប់ពាន់នាក់ បានសម្រុករត់ជាន់គ្នាទៅយកជំនួយរបស់អង្គការមនុស្សធម៌ហ្គាហ្សា GHF ដល់ថ្នាក់អង្គការនេះត្រូវផ្អាកចែកសិន ថែមទាំងកងទ័ពត្រូវបង្ខំចិត្តបាញ់កាំភ្លើងប៉ុន្មានគ្រាប់ឡើងលើអាកាស ដើម្បីគំរាមឲ្យពួកគេឈប់ការដណ្តើមគ្នាសិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, អង្គការ GHF ដែលឧបត្ថម្ភដោយអាមេរិក បានចាប់ផ្តើមចែកជំនួយនៅឯមណ្ឌលរបស់ខ្លួនក្នុងទីក្រុងភាគខាងត្បូង Rafah ខណៈក្នុងវីដេអូ គេឃើញមានពលរដ្ឋប៉ាឡេស្ទីន រត់ប្រសាច មានអ្នកខ្លះផ្លោះរបងនិងលូនក្រាប ដើម្បីទៅយកជំនួយឲ្យទាន់គេ ប៉ុន្តែមិនមានអ្នករបួសទេ។

GHF និយាយថា រថយន្តដឹកស្បៀងបានធ្វើដំណើរទៅដល់កន្លែងសុវត្ថិភាពកាលពីថ្ងៃចន្ទ ហើយក៏ចាប់ផ្តើមការចែកចាយនៅថ្ងៃអង្គារតែម្តង។ GHF ធ្វើសកម្មភាពនេះទាំងមិនឆ្លងកាត់អង្គការសហប្រជាជាតិ ក្នុងនាមជាអ្នកផ្គត់ផ្គង់ជំនួយដ៏សំខាន់ដល់ប្រជាជន២.១លាននាក់នៅតំបន់ហ្គាហ្សា។

យ៉ាងណាក្តី UN និងក្រុមជំនួយជាច្រើន មិនព្រមសហការជាមួយផែនការរបស់ GHF ឡើយ ព្រោះពួកគេនិយាយថា វាផ្ទុយពីគោលការណ៍មនុស្សធម៌ និងធ្វើការតាមចិត្ត ហើយហាក់ដូចជាយកជំនួយធ្វើជាអាវុធ។

ការចែកចាយជំនួយនេះកើតឡើងស្របពេលអន្តរជាតិ កំពុងរិះគន់ប្រទេសអ៊ីស្រាអែល យ៉ាងចាស់ដៃ ជុំវិញការមិនព្រមបើកច្រកព្រំដែន ដើម្បីឲ្យអង្គការមនុស្សធម៌ច្រើនទៀត ដឹកជំនួយចូលទៅជួយអ្នកដែលកំពុងត្រូវការជាចាំបាច់។

ដ្បិតមានការប្រកាសដោយអ៊ីស្រាអែលថា រថយន្ត​ដឹក​ជំនួយចំនួន៩៣គ្រឿង ត្រូវបានអនុញ្ញាតឲ្យចូលទៅក្នុងហ្គាហ្សាតាមរយៈច្រក Karem Abu Salem ក៏ដោយ ប៉ុន្តែ​មានតែ៥​គ្រឿងប៉ុណ្ណោះ ដែលបានទៅដល់ភាគីប៉ាឡេស្ទីន ខណៈរថយន្តនៅសល់ ត្រូវជាប់គាំងនៅព្រំដែនដោយសារអ៊ីស្រាអែលរឹតបន្តឹង។

ក្រុម​អង្គការ​មនុស្សធម៌ជាច្រើន បានថ្កោលទោស​ចំពោះ​​ការផ្តល់​ជំនួយរឹតត្បិតនេះ ហើយចោទប្រកាន់អ៊ីស្រាអែលថា គ្រាន់តែធ្វើដើម្បី​បង្វែរ​ការចោទប្រកាន់អំពីភាពអត់ឃ្លាននៅហ្គាហ្សាប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ថា សាលារៀនដែលខ្លួនទម្លាក់គ្រាប់លើ គឺជាទីបញ្ជាការភេរវករ ខណៈមនុស្សស្លាប់កើនដល់ ៨១នាក់