UN៖ តំបន់ហ្គាហ្សាជាកន្លែងស្រេកឃ្លានបំផុតនៅលើភពផែនដី

អង្គការសហប្រជាជាតិប្រកាសថា តំបន់ហ្គាហ្សាជា «កន្លែងស្រេកឃ្លានបំផុតនៅលើភពផែនដី» ដោយព្រមានថា គ្រោះទុរ្ភិក្សបានគំរាមកំហែងដល់ប្រជាជនទាំង ២.៣ លាននាក់ ដោយសារតែការបន្តរារាំងរបស់អ៊ីស្រាអែល និងជំនួយមនុស្សធម៌មិនគ្រប់គ្រាន់។ នេះបើយោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី៣១ខែឧសភា។

លោក Jens Laerke អ្នក​នាំពាក្យ​ការិយាល័យ​ UN ​ទទួលបន្ទុក​សម្រប​សម្រួល​កិច្ចការ​មនុស្សធម៌បានពណ៌នាជំនួយដែលចូលទៅក្នុងហ្គាហ្សាថាគ្រាន់តែជា «ល្បិច» ដែលរារាំងដោយការរឹតត្បិតខ្លាំងនិងការគ្រប់គ្រងដោយអង្គការមិនមែនរដ្ឋាភិបាលគាំទ្រដោយអ៊ីស្រាអែលនិងសហរដ្ឋអាមេរិកគឺមូលនិធិមនុស្សធម៌ហ្គាហ្សា (GHF)។

លើសពីនេះនៅពេលដែលជនស៊ីវិលកំពុងស្វែងរកអាហារ ទាហានអ៊ីស្រាអែលក៏បាញ់ទៅលើអ្នកស្វែងរកជំនួយ បង្ករបួសមនុស្សយ៉ាងតិច២០នាក់នៅកន្លែងចែកចាយរបស់ GHF ក្បែរច្រករបៀងយោធាអ៊ីស្រាអែលផងដែរ។

ក្រុមផ្តល់ជំនួយ និងមន្ត្រី UN បានថ្កោលទោសប្រតិបត្តិការរបស់ GHF ដោយចោទថា វាបានជួយកិច្ចខិតខំប្រឹងប្រែងរបស់អ៊ីស្រាអែលក្នុងការផ្លាស់ទីលំនៅប្រជាជនប៉ាឡេស្ទីនក្រោមរូបភាពនៃការផ្តល់ជំនួយមនុស្សធម៌។ អ្នករិះគន់អះអាងថា ជំនួយអាចចែកចាយដោយសុវត្ថិភាព ប្រសិនបើអ៊ីស្រាអែលអនុញ្ញាតឱ្យភ្នាក់ងារដែលមានបទពិសោធន៍ចូលធ្វើប្រតិបត្តិការនិងគ្រប់គ្រង។

ប្រធានាធិបតីបារាំងលោក Emmanuel Macron ក៏ព្រមានអំពីការដាក់ទណ្ឌកម្មដែលអាចកើតមានដែរ លុះត្រាតែអ៊ីស្រាអែលបើកដៃឲ្យជំនួយមនុស្សធម៌បានចូលទៅដល់ទីនោះ។

ទន្ទឹមនឹងនេះដែរ ពលរដ្ឋប៉ាឡេស្ទីន ៣០ នាក់ទៀតត្រូវបានសម្លាប់ក្នុងការវាយប្រហាររបស់អ៊ីស្រាអែលកាលពីថ្ងៃសុក្រ។ ការផ្លាស់ទីលំនៅដោយបង្ខំនៅតែបន្ត ដោយមានមនុស្សជិត ២០០,០០០ នាក់ត្រូវបានផ្លាស់ចេញក្នុងរយៈពេលពីរសប្តាហ៍កន្លងមកនេះ៕

អត្ថបទ៖ ប៊ុន សុភាព