ព័ត៌មានអន្ដរជាតិ

លើកទី១ ដែលកងទ័ពថៃបារម្ភការផ្សព្វផ្សាយរបស់សារព័ត៌មានថៃអាចប៉ះពាល់ដល់ការចរចា JBC

បានផុស

១ year មុន

នៅ

ថ្ងៃពុធ ១១ មិថុនា ២០២៥

ដោយ

អ្នកនាំពាក្យយោធាថៃបានចេញការព្រមានលើកដំបូងចំពោះសារព័ត៌មានថៃ ដោយការក្រើនរំឭកឲ្យមានការប្រុងប្រយ័ត្នចំពោះការផ្សព្វផ្សាយឯកសារមួយចំនួនដែលនាំទៅដល់ផលប៉ះពាល់ដំណើរការចរចារបស់គណៈកម្មការព្រំដែនរួម (Joint Boundary Commission (JBC)) ដែលគ្រោងធ្វើនៅថ្ងៃទី១៤ខែមិថុនានេះ។

លោកស្រី ផែថងថាន ស៊ីណាវ៉ាត្រ នាយករដ្ឋមន្ត្រីថៃ មុខស្ងួតពេលចុះទៅពិនិត្យតាមខេត្តជាប់ព្រំដែន។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ឯក Winthai Suvari អ្នកនាំពាក្យយោធាថៃ ត្រូវបានស្រង់សម្តីផ្សាយដោយសារព័ត៌មានថៃ Khaosod ដែលផ្សព្វផ្សាយនៅថ្ងៃពុធនេះ ដោយលោកបានព្រមានសារព័ត៌មានថៃឱ្យប្រុងប្រយ័ត្ន កុំផ្សព្វផ្សាយឯកសារផ្លូវការមួយចំនួន ពាក់ព័ន្ធនឹងជម្លោះព្រំដែនកម្ពុជា-ថៃ ដែលអាចប៉ះពាល់ដល់កិច្ចប្រជុំគណៈកម្មការព្រំដែនចម្រុះ (JBC) រវាងភាគីទាំងពីរ។

ការព្រមានរបស់អ្នកនាំពាក្យយោធាថៃ កើតឡើងក្រោយប្រព័ន្ធផ្សព្វផ្សាយរបស់ថៃដែលរងការចោទថា បានផ្សាយព័ត៌មាននិងរូបភាពមួយចំនួនដែលបង្កើតឡើងដោយភាគីថៃជាឯកតោភាគីនៅតំបន់ជម្លោះនានាតាមបណ្តោយព្រំដែនជាមួយកម្ពុជា។

ការព្រមានរបស់អ្នកនាំពាក្យយោធាថៃនេះទៀតសោត គឺចំពេលដែលប្រទេសថៃបានតែងតាំងសមាជិកគណៈកម្មការព្រំដែនរួម ដឹកនាំដោយ លោក Prasas Prasasvinitchai ដែលជាអតីតឯកអគ្គរាជទូតប្រចាំកម្ពុជាពីឆ្នាំ២០០៩ ដល់២០១១។

ទោះបីមានការព្រមានបែបនេះ ប៉ុន្តែអ្នកនាំពាក្យយោធាថៃ លោកឧត្តមសេនីយ៍ឯក Winthai Suvari មិនបានលើកឡើងពីរបៀបដែលសារព័ត៌មានថៃបានផ្សព្វផ្សាយដែលអាចនាំទៅដល់ផលប៉ះពាល់នោះទេ ហើយក៏មិនបានបញ្ជាក់ថាតើឯកសារជាក់លាក់ណាដែលលោកចង់សំដៅទៅនោះដែរ។ នេះបើយោងតាម Khaosod។

ការផ្សព្វផ្សាយព័ត៌មានផ្សេងៗ ទាំងព័ត៌មានពិតនិងព័ត៌មានមិនពិត គឺងាយធ្វើឡើងក្នុងសម័យបច្ចេកវិទ្យាព័ត៌មានដ៏លឿនរហ័សនេះ ដែលងាយបង្កផលប៉ះពាល់ដល់ទំនាក់ទំនងរវាងភាគីទាំងពីរនៅពេលដែលព័ត៌មានមិនពិតត្រូវបានផ្សព្វផ្សាយដល់ប្រជាជនដែលងាយប្រតិកម្មដោយខ្វះការអត់ធ្មត់ និងការបញ្ជាក់ប្រភពពិតឬមិនពិត។

ថ្នាក់ដឹកនាំនៃប្រទេសកម្ពុជាធ្លាប់បានបង្ហាញក្តីកង្វល់មួយចំនួនជុំវិញជម្លោះព្រំដែនដែលបានផ្ទុះឡើងនេះ ដែលងាយរីករាលដាលដោយសារតែការផ្សព្វផ្សាយព័ត៌មានមិនពិត។

ក្រសួងការពារជាតិកម្ពុជា នៅថ្ងៃទី០៩ ខែមិថុនា ឆ្នាំ២០២៥នេះ បានចេញសេចក្តីប្រកាសមួយដោយរកឃើញថា សារព័ត៌មានថៃ និងបណ្តាញសង្គមមួយចំនួន បានផ្សព្វផ្សាយព័ត៌មានមិនពិត បង្កឱ្យមានការភាន់ច្រឡំពាក់ព័ន្ធស្ថានភាពកងទ័ព។

ជុំវិញបញ្ហានេះ ក្រសួងការពារជាតិកម្ពុជា បានអំពាវនាវដល់ជនរួមជាតិទាំងអស់ កុំឱ្យជឿតាមការផ្សព្វផ្សាយតាមសារព័ត៌មានថៃ និងបណ្តាញសង្គមទាំងនោះ ហើយរង់ចាំទទួលយកតែព័ត៌មានផ្លូវការ ដែលផ្សព្វផ្សាយដោយក្រសួងការពារជាតិ និងរាជរដ្ឋាភិបាលកម្ពុជា។

សេចក្តីប្រកាសរបស់ក្រសួងការពារជាតិកម្ពុជា បានអះអាងថា «ក្នុងរយៈពេលប៉ុន្មានថ្ងៃកន្លងទៅនេះ មានស្ថាប័នសារព័ត៌មានថៃ និងបណ្តាញសង្គមក្នុងស្រុកមួយចំនួនបានផ្សព្វផ្សាយព័ត៌មានមិនពិតនាំឱ្យមានការយល់ច្រឡំ ដែលអាចបញ្ឆេះកំហឹងជាតិសាសន៍ និងរុញច្រានឱ្យស្ថានការណ៍រឹតតែតានតឹង។ ក្នុងន័យនេះ ក្រសួងការពារជាតិ សូមអំពាវនាវឱ្យបងប្អូនជនរួមជាតិទាំងអស់ ទទួលយកតែព័ត៌មានដែលមានប្រភពច្បាស់លាស់ ជាពិសេសការជូនព័ត៌មានដោយរាជរដ្ឋាភិបាល និងពីក្រសួងការពារជាតិនៃប្រទេសទាំងពីរ ដែលជាប្រភពព័ត៌មានផ្លូវការ ពិត និងត្រឹមត្រូវ ជឿទុកចិត្តបាន ដើម្បីថែរក្សាសន្តិភាព មិត្តភាពល្អ និងបញ្ចៀសសង្គ្រាមជាយថាហេតុ»៕

ដោយ រ៉ាន់ រើយ