ប្រេសិត​អាមេរិក​ នឹង​ជួប​រដ្ឋមន្ត្រី​ការ​បរទេស​អ៊ីរ៉ង់​នៅ​ថ្ងៃ​ទី​១៥​មិថុនា​ក្នុង​ប្រទេស​អូម៉ង់

បេសកជនពិសេសរបស់សហរដ្ឋអាមេរិក លោក Steve Witkoff គ្រោងនឹងជួបជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi នៅ​ទីក្រុង Muscat ប្រទេសអូម៉ង់ នាថ្ងៃ​អាទិត្យ​ទី១៥​ខែមិថុនា។

យោង​តាម​ការ​ចុះផ្សាយ​របស់​ទីភ្នាក់ងារព័ត៌មាន Reuters ដែល​ដក​ស្រង់​ប្រភពពី​មន្ត្រី​អាមេរិក កិច្ចប្រជុំនេះនឹងផ្តោតលើការឆ្លើយតបនាពេលខាងមុខរបស់អ៊ីរ៉ង់ ចំពោះសំណើរបស់អាមេរិក​សម្រាប់កិច្ចព្រមព្រៀងនុយក្លេអ៊ែរថ្មី។

មុនជំនួប​នេះ ទីក្រុងតេហេរ៉ង់ ធ្លាប់​បាន​លើក​ឡើង​ថា​ សំណើ​របស់​​អាមេរិក​គឺ​«មិនអាចទទួលយកបានទេ» ហើយបាន​ប្រាប់​ថា ខ្លួនគ្រោងនឹងបង្ហាញសំណើតបតក្នុងពេលឆាប់ៗ។

ប្រធានាធិបតីអាមេរិក លោក ដូណាល់ ត្រាំ ដែលបង្ហាញការសង្ស័យអំពីឆន្ទៈរបស់អ៊ីរ៉ង់ក្នុងការបញ្ឈប់ការចម្រាញ់សារធាតុអ៊ុយរ៉ាញ៉ូម បានរំលឹកឡើងវិញថា ក្រុង​វ៉ាស៊ីនតោន​នៅតែបើកចំហសម្រាប់កិច្ច​ចរចា តែ​ទន្ទឹម​នោះ​លោក​និងមន្ត្រី​របស់​លោក​នៅ​តែ​ព្រមាន​ម្ដង​ហើយ​ម្ដង​ទៀត​ថា សកម្មភាពយោធាអាចកើតឡើង​ប្រសិន​បើការចរចាការ​ទូតបរាជ័យ។

កិច្ចប្រជុំដែលបានគ្រោងទុក ធ្វើឡើងចំពេលមានភាពតានតឹងក្នុងតំបន់​កាន់​តែ​ខ្លាំង ហើយ​អាមេរិក​កំពុង​ចាត់​វិធានការប្រុងប្រយ័ត្ន​ថ្មីៗ​នេះ ដែល​មាន​ដូចជា ការជម្លៀសបុគ្គលិក​ចេញពីស្ថានទូត​ប្រទេស​អ៊ីរ៉ាក់ នៅពេលដែលកិច្ចពិភាក្សានុយក្លេអ៊ែរ​ឈានដល់ដំណាក់កាល​សំខាន់។

លោក ត្រាំ និយាយថា «យើងកំពុងជម្លៀសពួកគេចេញពីកន្លែងដែលមានគ្រោះថ្នាក់ ហើយយើងរង់ចាំមើលថាតើនឹងមានអ្វីកើតឡើង»។ ទន្ទឹមនោះ រដ្ឋមន្ត្រីការពារជាតិអាមេរិក Pete Hegseth ក៏សំណូមពរឲ្យក្រុមគ្រួសាររបស់បុគ្គលិកយោធាអាមេរិក ត្រូវស្ម័គ្រចិត្តចាកចេញពីបណ្តាប្រទេសនៅទូទាំងតំបន់មជ្ឈិមបូព៌ា រួមទាំងគុយវ៉ែត និងបារ៉ែនផងដែរ។

យ៉ាង​ណា ការជម្លៀសនេះ ត្រូវ​គេ​ដឹង​ថា​កើតឡើងបន្ទាប់ពីរដ្ឋមន្ត្រីការពារជាតិអ៊ីរ៉ង់ Aziz Nasirzadeh ​ប្រកាសថា ប្រទេសរបស់លោកនឹងសងសឹកអាមេរិកវិញ បើកិច្ចចរចាស្តីពីបញ្ហានុយក្លេអ៊ែរអ៊ីរ៉ង់រងបរាជ័យ ហើយលោក ត្រាំ បើកការវាយប្រហារយោធាប្រឆាំងសាធារណរដ្ឋឥស្លាម៕

ដោយ៖ ឈាង

ចុចអាន៖ អាមេរិក ជម្លៀសមន្ត្រីទូតចេញពីអ៊ីរ៉ាក់ ព្រោះស្ថានការណ៍មិនស្រួល