ព័ត៌មានអន្ដរជាតិ

កូរ៉េខាងជើង បញ្ជូនកម្លាំង ២៥ ០០០នាក់ទៅជួយផលិតដ្រូនឲ្យរុស្ស៊ី

បានផុស

១ year មុន

នៅ

ថ្ងៃសុក្រ ២០ មិថុនា ២០២៥

ដោយ

Chheang

ទូរទស្សន៍ជប៉ុន NHK បានរាយការណ៍កាលពីថ្ងៃទី១៩ខែមិថុនាឆ្នាំ២០២៥ថា កូរ៉េខាងជើងកំពុងបញ្ជូនបុគ្គលិកស៊ីវិលចំនួន ២៥ ០០០នាក់ទៅកាន់ប្រទេសរុស្ស៊ី ដើម្បីជួយក្នុងការផលិតដ្រូនយោធា Shahed ជាថ្នូរនឹងការទទួលជំនាញផលិតកម្ម និងប្រតិបត្តិការកម្រិតខ្ពស់។

រដ្ឋាភិបាលកូរ៉េខាងជើងកំពុងចុះត្រួតពិនិត្យដ្រូន (រូបថត៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មករកូរ៉េខាងជើង នឹងត្រូវធ្វើការនៅតំបន់សេដ្ឋកិច្ចពិសេស Alabuga ក្នុងទីក្រុង Tatarstan ភាគខាងកើតប្រទេសរុស្ស៊ី ដែលជារោងចក្រផលិតដ្រូនដ៏សំខាន់សម្រាប់ប្រើប្រាស់ក្នុងសង្គ្រាមលុកលុយអ៊ុយក្រែន។

ជាការតបស្នងវិញ ទីក្រុងព្យុងយ៉ាងត្រូវបានគេរាយការណ៍ថានឹងទទួលការហ្វឹកហ្វឺនដោយផ្ទាល់ក្នុងប្រតិបត្តិការយន្តហោះគ្មានមនុស្សបើក ដែលនឹងអាចជួយពង្រឹងសមត្ថភាពយោធារបស់ទីក្រុងព្យុងយ៉ាង។

ការដាក់ពង្រាយនេះ បង្ហាញពីភាពជាដៃគូស៊ីជម្រៅរវាងរុស្ស៊ី និងកូរ៉េខាងជើង ជាពិសេសបន្ទាប់ពីការចុះកិច្ចព្រមព្រៀងការពារគ្នាទៅវិញទៅមកកាលពីខែមិថុនាឆ្នាំ២០២៤។ ថ្មីៗនេះ ក៏មានរបាយការណ៍ផងដែរថា កូរ៉េខាងជើង នឹងដាក់ពង្រាយបុគ្គលិកយោធាប្រមាណ ៦ ០០០នាក់ ដែលរួមមានក្រុមសាងសង់ ៥ ០០០នាក់ និងអ្នកដោះមីន ១ ០០០នាក់ ដើម្បីជួយសម្រួលដល់ការកសាងឡើងវិញ និងការបោសសម្អាតមីននៅក្នុងតំបន់ Kursk របស់រុស្ស៊ី។

កូរ៉េខាងជើងត្រូវ បានគេប៉ាន់ប្រមាណថាបានបញ្ជូនទាហាន ៣ ០០០នាក់បន្ថែមទៀតទៅកាន់តំបន់ Kursk ក្នុងឆ្នាំ២០២៥នេះ បន្ទាប់ពីបានបញ្ជូនទាហានប្រហែល ១១ ០០០នាក់ទៅកាន់ប្រទេសរុស្ស៊ីកាលពីឆ្នាំមុន ដែលជាថ្នូរនឹងការទទួលបានអាវុធ និងបច្ចេកវិទ្យាយោធាពីទីក្រុងមូស្គូមកវិញ។ ជាងពាក់កណ្តាលនៃទាហានទាំង ១១ ០០០នាក់ដែលបានដាក់ពង្រាយដំបូង ត្រូវគេប៉ាន់ប្រមាណថាបានស្លាប់ និងរងរបួស៕

ដោយ៖ ឈាង

ចុចអាន៖ កូរ៉េខាងជើង ត្រៀមបញ្ជូនកម្លាំងបន្ថែម ៦ ០០០នាក់ទៅកាន់តំបន់ Kursk របស់រុស្ស៊ី