ព័ត៌មានអន្ដរជាតិ

ទឹកជំនន់នៅប៉ាគីស្ថាន សម្លាប់មនុស្ស៤៥នាក់ក្នុងរយៈពេលតែប៉ុន្មានថ្ងៃ

បានផុស

៣៨ វិនាទី មុន

នៅ

ថ្ងៃចន្ទ ៣០ មិថុនា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន AFP កាលពីថ្ងៃទី២៩ខែមិថុនា ភ្លៀងធ្លាក់ខ្លាំង និងទឹកជំនន់ភ្លាមៗនៅទូទាំងប្រទេសប៉ាគីស្ថានបានសម្លាប់មនុស្ស ៤៥នាក់ ក្នុងរយៈពេលតែប៉ុន្មានថ្ងៃប៉ុណ្ណោះចាប់តាំងពីចូលដល់រដូវខ្យល់មូសុង។

បុគ្គលិកសង្គ្រោះម្នាក់កំពុងស្វែងរកអ្នកនៅរស់ បន្ទាប់ទូកទេសចរណ៍ត្រូវបានទឹកកួចលិចនៅទន្លេ Swat (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំនួនអ្នកស្លាប់ខ្ពស់បំផុតគឺនៅក្នុងខេត្ត Khyber Pakhtunkhwa ដែលមានព្រំប្រទល់ជាប់ប្រទេសអាហ្វហ្គានីស្ថាន ដោយមានកុមារចំនួន១០នាក់ ក្នុងចំណោមមនុស្ស ២១នាក់បានស្លាប់។ ជនរងគ្រោះទាំងនោះភាគច្រើនបានស្លាប់នៅក្បែរទន្លេ Swat ដោយសារមានទឹកជំនន់ភ្លាមៗបោកបក់ចំផ្ទះគ្រួសារមួយចំនួននៅលើច្រាំងទន្លេ។

ចំណែកនៅក្នុងខេត្ត Punjab ដែលមានប្រជាជនច្រើនបំផុតរបស់ប្រទេសប៉ាគីស្ថាន តាមបណ្តោយព្រំដែនជាមួយប្រទេសឥណ្ឌាមាន អ្នកស្លាប់ចំនួន១៣នាក់ ក្នុងនោះ៨នាក់ជាកុមារដែលបានស្លាប់ដោយសារបាក់ជញ្ជាំងនិងដំបូលក្នុងពេលមានភ្លៀងធ្លាក់ខ្លាំង។ រីឯមនុស្ស១១នាក់ទៀតបានស្លាប់នៅក្នុងខេត្ត Sindh និង Balochistan។

កាលពីខែមុន ក៏មានមនុស្សយ៉ាងហោចណាស់ ៣២នាក់ ត្រូវបានសម្លាប់នៅក្នុងព្យុះដ៏កំណាច។ គួរបញ្ជាក់ថា ប៉ាគីស្ថានគឺជាប្រទេសមួយក្នុងចំណោមប្រទេសដែលងាយរងគ្រោះបំផុតក្នុងពិភពលោកចំពោះផលប៉ះពាល់នៃការប្រែប្រួលអាកាសធាតុ ហើយប្រជាជនចំនួន ២៤០លាននាក់របស់ប្រទេសនេះកំពុងប្រឈមនឹងការកើនឡើងនៃបញ្ហាអាកាសធាតុ៕