ព័ត៌មានអន្ដរជាតិ

អ៊ីរ៉ង់ប្រកាសថា ខ្លួននឹងមិនឈប់ចម្រាញ់អ៊ុយរ៉ាញ៉ូមដាច់ខាត

បានផុស

១ year មុន

នៅ

ថ្ងៃចន្ទ ៣០ មិថុនា ២០២៥

ដោយ

Chheang

ឯកអគ្គរដ្ឋទូតប្រចាំអង្គការសហប្រជាជាតិរបស់អ៊ីរ៉ង់ លោក Amir-Saeid Iravani បាននិយាយនៅក្នុងបទសម្ភាសន៍មួយជាមួយសារព័ត៌មាន CBS កាលពីថ្ងៃអាទិត្យទី២៩ខែមិថុនាថា ទីក្រុងតេហេរ៉ង់នឹងមិនបញ្ឈប់ការចម្រាញ់សារធាតុអ៊ុយរ៉ាញ៉ូមឡើយ ដោយហៅវាថាជា«សិទ្ធិមិនអាចកាត់ផ្តាច់បាន» ក្រោមសន្ធិសញ្ញាមិនរីកសាយភាយនុយក្លេអ៊ែរ (NPT)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Iravani បានសង្កត់ធ្ងន់ថា ខណៈពេលដែលអ៊ីរ៉ង់នៅតែបើកចំហចំពោះការទូត ខ្លួននឹងមិនយល់ព្រមចំពោះការទាមទារដែលស្រដៀងទៅនឹង«ការចុះចាញ់ដោយគ្មានលក្ខខណ្ឌ»ពីសហរដ្ឋអាមេរិកនោះទេ។

មន្ត្រីការទូតអ៊ីរ៉ង់រូបនេះ បានប្រាប់ថា «ការចម្រាញ់(អ៊ុយរ៉ាញ៉ូម) គឺជាសិទ្ធិរបស់យើង ជាសិទ្ធិដែលមិនអាចកាត់ផ្តាច់បាន ហើយយើងចង់អនុវត្តសិទ្ធិនេះ» ដោយបន្ថែមថា ទីក្រុងតេហេរ៉ង់នឹងមិនបញ្ឈប់ដាច់ខាត ព្រោះវាជាប្រភពថាមពលសម្រាប់គោលបំណងស៊ីវិលប៉ុណ្ណោះ។

លោក Iravani ក៏បានបញ្ជាក់ផងដែរថា ទោះបីជាសភាអ៊ីរ៉ង់បានផ្អាកកិច្ចសហប្រតិបត្តិការជាមួយទីភ្នាក់ងារថាមពលបរមាណូអន្តរជាតិ (IAEA) ហើយអ្នកត្រួតពិនិត្យត្រូវបានរារាំងជាបណ្តោះអាសន្នពីទីតាំងនុយក្លេអ៊ែរក៏ដោយ ក៏មិនមានការគំរាមកំហែងដល់បុគ្គលិក IAEA ឬលោកប្រធាន Rafael Grossi ដែរ។

ការប្រកាសនេះ ធ្វើឡើងប៉ុន្មានថ្ងៃបន្ទាប់ពីប្រធាននុយក្លេអ៊ែររបស់អង្គការសហប្រជាជាតិលោក Rafael Grossi បានព្រមានថា អ៊ីរ៉ង់អាចចាប់ផ្តើមការចម្រាញ់សារធាតុអ៊ុយរ៉ាញ៉ូមឡើងវិញក្នុងរយៈពេលប៉ុន្មានខែខាងមុខ បើទោះបីជាមានការវាយប្រហារតាមអាកាសនាពេលថ្មីៗនៅក្នុងសង្គ្រាម១២ថ្ងៃរបស់សហរដ្ឋអាមេរិក និងអ៊ីស្រាអែលលើទីតាំងនុយក្លេអ៊ែរសំខាន់ៗរបស់ទីក្រុងតេហេរ៉ង់ក៏ដោយ។

ខណៈការវាយប្រហារបានបង្កការខូចខាតយ៉ាងធ្ងន់ធ្ងរ លោក Grossi បានបញ្ជាក់ថា ហេដ្ឋារចនាសម្ព័ន្ធសំខាន់ និងឃ្លាំងស្តុកទុកនៅដដែល ដោយរក្សាសមត្ថភាពនុយក្លេអ៊ែររបស់អ៊ីរ៉ង់ដោយលាក់កំបាំង៕

ដោយ៖ ឈាង

ចុចអាន៖ លោក ត្រាំ ប្រាប់ថានឹងពិចារណាទម្លាក់គ្រាប់បែកលើអ៊ីរ៉ង់ម្តងទៀត