គ្រោះទឹកជំនន់ដ៏សាហាវនៅតិចសាស់ ផ្តាច់ជីវិតមនុស្សឡើងដល់ ៨១នាក់

គិតត្រឹមព្រឹកថ្ងៃចន្ទទី៧ខែកក្កដាឆ្នាំ២០២៥ គ្រោះទឹកជំនន់ដ៏សាហាវនៅតិចសាស់ បានផ្តាច់ជីវិតមនុស្សឡើងដល់ ៨១នាក់ហើយ ខណៈជាង៤០នាក់ទៀតបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ CBS News, កន្លែងដែលរងគ្រោះខ្លាំងជាងគេគឺតំបន់ Kerr ដោយគ្រាន់តែទីនោះ មានមនុស្សស្លាប់រហូតដល់ទៅ៦៨នាក់ទៅហើយ ក្នុងនោះមានមនុស្សធំ៤០នាក់ និងក្មេងៗ២៨នាក់។

អ្វីដែលកាន់តែរន្ធត់គឺថា តួលេខដែលហក់ឡើងខ្ពស់នេះ គឺបន្ទាប់់ពីមានការបញ្ជាក់ជាផ្លូវការអំពីតួលេខបាត់បង់ជីវិតនៃក្មេងៗមួយក្រុមបោះជំរំនៅ Camp Mystic តាមដងទន្លេ Guadalupe ដែលត្រូវទឹកជំនន់ភ្លាមៗវាយប្រហារជំរំរបស់ពួកគេ។

ប្រតិបត្តិការស្វែងរកអ្នកបាត់ខ្លួនកំពុងបន្ត ខណៈមនុស្សជាង៨៥០នាក់ ត្រូវបានជួយសង្គ្រោះដោយភ្នាក់ងារក្នុងស្រុក រដ្ឋ និងសហព័ន្ធ រួមទាំងឆ្មាំសមុទ្រអាមេរិក ដោយប្រើឧទ្ធម្ភាគចក្រ ទូក និងដ្រូន។

ជាការឆ្លើយតបទៅនឹងគ្រោះធម្មជាតិដ៏ធ្ងន់ធ្ងរនេះ អភិបាលរដ្ឋតិចសាស់ Greg Abbott បានចេញសេចក្តីប្រកាសគ្រោះមហន្តរាយសម្រាប់តំបន់ដែលរងផលប៉ះពាល់ ហើយលោកប្រធានាធិបតី ដូណាល់ ត្រាំ បានចុះហត្ថលេខាលើ «សេចក្តីប្រកាសគ្រោះមហន្តរាយដ៏ធំ» សម្រាប់តំបន់ Kerr ដើម្បីបញ្ចេញជំនួយសហព័ន្ធ។

សូមជម្រាបថា ទឹកជំនន់ដ៏អាក្រក់នេះគឺបង្កឡើងដោយភ្លៀងធ្លាក់ខ្លាំងដែលជាចំហាយព្យុះត្រូពិក Barry ដោយនៅតំបន់ខ្លះ ភ្លៀងធ្លាក់មានកម្រិតពី២៥ទៅ៥០សង់ទីម៉ែត្រឯណោះ។

​នៅ​ព្រឹក​ព្រលឹម​ថ្ងៃទី​៤ខែកក្កដា ទឹកទន្លេ Guadalupe បានហក់ឡើងខ្ពស់មិនធ្លាប់មាន និងឡើងយ៉ាងឆាប់រហ័ស បោកបំផ្លាញផ្ទះ ហូរកួចនាំយានយន្តនិងសំណង់នានាបង្កភាពភ្ញាក់ផ្អើលដល់​ប្រជាពលរដ្ឋ និង​អ្នក​បោះតង់​ជាច្រើននាក់៕

អត្ថបទ៖ សុខ សុវណ្ណ

ចុចអាន៖ រដ្ឋ តិចសាស់ ប្រកាសអាសន្ន ខណៈទឹកជំនន់ដ៏អាក្រក់ សម្លាប់មនុស្សលើស២០នាក់