ព័ត៌មានអន្ដរជាតិ

យោធាថៃព្យាយាមបំភាន់ប្រជាជនខ្លួនឯង និងសាធារណៈជន ត្រង់ថា «ខ្លួនមិនបានបិទព្រំដែន»

បានផុស

១ year មុន

នៅ

ថ្ងៃអាទិត្យ ១៣ កក្កដា ២០២៥

ដោយ

ថ្នាក់ដឹកនាំយោធាជាន់ខ្ពស់ថៃ បានចេញមកអះអាងជាថ្មីថា «ខ្លួនមិនបានបិទព្រំដែន» គឺគ្រាន់តែកែសម្រួលម៉ោងពេលវេលាប៉ុណ្ណោះ ដោយមានចេតនាបំភាន់សាធារណៈជន ជាពិសេសប្រជាជនថៃ ក្នុងន័យទម្លាក់កំហុសមកលើភាគីកម្ពុជារឿងបិទព្រំដែន ដោយមិនបានឆ្លុះបញ្ចាំងមើលទង្វើរបស់ខ្លួនដែលបានធ្វើក្នុងរយៈពេលជាងមួយខែកន្លងមកនេះ។

នាយឧត្តមសេនីយ៍ Songwit Noonpackdee។ The Nation

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចបិទព្រំដែនជាងឯកតោភាគីរបស់យោធាថៃក្នុងបំណងដាក់សម្ពាធលើវិស័យសេដ្ឋកិច្ចត្រូវបានគេមើលឃើញយ៉ាងទូលំទូលាយ ប៉ុន្តែទង្វើរបស់យោធាថៃដែលចង់ទម្លាក់កំហុសមកលើភាគីកម្ពុជាជាអ្នកខុសក្នុងសកម្មភាពបិទព្រំដែន បានធ្វើឲ្យភាគីថៃរងការខាតបង់យ៉ាងធ្ងន់ធ្ងរ និង ការតវ៉ាពីសំណាក់អាជីវករ និងអ្នកធុរកិច្ចថៃ។

យោងសេចក្តីរាយការណ៍របស់សារព័ត៌មាន The Nation នៅថ្ងៃអាទិត្យនេះ នាយឧត្តមសេនីយ៍ Songwit Noonpackdee នាយសេនាធិការនៃកងកម្លាំងការពារជាតិបាននិយាយកាលពីថ្ងៃសៅរ៍ថា ប្រទេសថៃមិនដែលបិទច្រកព្រំដែនរបស់ខ្លួនជាមួយកម្ពុជានោះទេ ប៉ុន្តែគ្រាន់តែបានកែសម្រួលម៉ោងប្រតិបត្តិការសម្រាប់ហេតុផលជាក់ស្តែងប៉ុណ្ណោះ។

ការអះអាងរបស់មន្ត្រីយោធាជាន់ខ្ពស់ថៃជាថ្មីនេះ គឺគ្រាន់តែជាឆ្លើយតបចំពោះអ្នកសារព័ត៌មានឲ្យរួចតែខ្លួន ដោយមិនបានឆ្លុះបញ្ចាំង ពីការសម្រេចរបស់ប្រព័ន្ធយោធាថៃដែលបានធ្វើចាប់តាំងពីថ្ងៃទី៧ខែមិថុនា ដែលកាលនោះ នាយឧត្តមសេនីយ៍ Pana Klaewblaudtuk អគ្គមេបញ្ជាការកងទ័ពជើងគោកនៃកងយោធពលខេមរភូមិន្ទថៃ (RTA) បានចុះហត្ថលេខាលើបទបញ្ជាលេខ ៨០៦/២៥៦៨ ស្តីពីការអនុញ្ញាតឱ្យត្រួតពិនិត្យការបើក និងបិទច្រកព្រំដែនគ្រប់ប្រភេទនៅតាមព្រំដែនកម្ពុជា-ថៃ។ ការបើកនិងបិទព្រំដែននោះ គឺត្រូវអនុវត្តដោយមេបញ្ជាការភូមិភាគ២របស់ថៃ។

ការចេញបញ្ជានាពេលនោះ បន្ទាប់ពីនាយករដ្ឋមន្ត្រី និង រដ្ឋមន្ត្រីការពារជាតិថៃ ដែលកាលនោះ គឺ លោក ភុមថាំ វិច្ឆាយ៉ាឆៃ (Phumtham Wechayachai) បានបង្ហាញពីភាពគ្មានឥទ្ធិពលអំណាចក្នុងការគ្រប់គ្រងយោធានៅតំបន់ភូមិភាគ២ ដឹកនាំដោយ លោក Boosin Padklang ដែលតែងតែធ្វើសកម្មភាព និង និយាយបង្កហេតុមកលើជម្លោះព្រំដែនកម្ពុជា។

តាមសេចក្តីរាយការណ៍របស់កាសែតថៃ លោក ឧត្តមសេនីយ៍ Songwit ដែលមានតួនាទីជានាយកមជ្ឈមណ្ឌលបង្ការនិងដោះស្រាយការគម្រាមកំហែងសន្តិសុខនៅតាមតំបន់ព្រំដែន បានធ្វើការកត់សម្គាល់នៅពេលថ្លែងទៅកាន់ប្រព័ន្ធផ្សព្វផ្សាយនៅឯមូលដ្ឋានប្រតិបត្តិការ Doi Chang Moob ក្នុងស្រុក Mae Fa Luang ខេត្ត Chiang Rai។

ការអត្ថាធិប្បាយរបស់លោក ដោយយោងទៅលើរបាយការណ៍មួយ ដែលលោកបានទទួលកាលពីថ្ងៃសុក្រ ១១ កក្កដា ពីមេបញ្ជាការភូមិភាគទី ២ គឺលោកឧត្តមសេនីយ Boonsin Padklang ដែលបានបញ្ជាក់ថា ការទំនាក់ទំនង និងការសម្របសម្រួលកម្រិតយោធារវាងថៃ និងកម្ពុជាបានប្រសើរឡើង។ ពេលនេះប្រទេសទាំងពីរធ្វើល្បាតរួមគ្នាបីដងក្នុងមួយសប្តាហ៍។

សូមបញ្ជាក់ថា កាលពីថ្ងៃទី៧ ខែមិថុនា នាយឧត្តមសេនីយ៍ Pana Klaewblaudtuk អគ្គមេបញ្ជាការកងទ័ពជើងគោកនៃកងយោធពលខេមរភូមិន្ទថៃ (RTA) បានចុះហត្ថលេខាលើបទបញ្ជាលេខ ៨០៦/២៥៦៨ ស្តីពីការអនុញ្ញាតឱ្យត្រួតពិនិត្យការបើក និងបិទច្រកព្រំដែនគ្រប់ប្រភេទនៅតាមព្រំដែនកម្ពុជា-ថៃ។ ចាប់តាំងពីការដាក់បទបញ្ជានោះមក យោធាថៃចាប់ផ្តើមបិទច្រកព្រំដែនទាំងអស់។

ជាការតបតរបស់ភាគីកម្ពុជាចំពោះការសម្រេចជាឯកតោភាគីរបស់ភាគីថៃ ប្រមុខរាជរដ្ឋាភិបាលកម្ពុជាក៏បានបិទច្រកព្រំដែនដោយមិនអនុវត្តតាមម៉ោងដែលភាគីថៃធ្វើតាមតែអំពើចិត្តហើយ នាយករដ្ឋមន្ត្រីថៃ ផែថងថាន ស៊ីណាវ៉ាត្រ ដែលត្រូវបានគេមើលឃើញថា គ្មានអំណាចគ្រប់គ្រាន់ក្នុងការបញ្ជាក្រុមយោធាឲ្យអនុវត្តតាមខ្លួននោះ ក៏បាននិយាយទូរស័ព្ទជាលក្ខណៈឯកជនជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ក្នុងបំណងស្នើសុំសម្តេចហ៊ុនសែន អនុញ្ញាតបើកច្រកដូចម៉ោងធម្មតាវិញ គឺចាប់ពីម៉ោង៦ព្រឹកដល់ម៉ោង១០យប់។

ក្នុងសារសន្ទនានោះ ក៏ដូចជាការអះអាងជាច្រើនលើកច្រើនសាររបស់ថ្នាក់ដឹកនាំកម្ពុជា គឺសម្តេចហ៊ុន សែន បានប្រាប់នាយករដ្ឋមន្ត្រីថៃវិញថា កម្ពុជាត្រៀមតែបើកទេ ប៉ុន្តែតម្រូវឲ្យភាគីថៃបើកមុន ព្រោះភាគីថៃជាអ្នកបិទមុនជាឯកតោភាគី។ កម្ពុជានឹងបើកតាមភាគីថៃវិញ ដោយអនុវត្តយ៉ាងយូរបំផុតត្រឹម៥ម៉ោង ក្រោយភាគីថៃបើកច្រក។

សម្តេចតេជោ ហ៊ុន សែន ក៏ដូចជាសម្តេចធិបតី ហ៊ុន ម៉ាណែត បានបញ្ជាក់ម្តងហើយម្តងទៀតថា កម្ពុជានឹងអនុវត្តបើកព្រំដែនភ្លាមៗ និងមិនចាំបាច់ឆ្លងកាត់ការជជែកទ្វេភាគីបន្ថែមនោះទេ៕