មនុស្ស ១១ នាក់បាត់ខ្លួនក្នុងហេតុការណ៍លិចទូកនៅជិតកោះ Mentawai ប្រទេសឥណ្ឌូណេស៊ី

យោងតាមការចេញផ្សាយរបស់សារព័ត៌មាន​CNA នៅថ្ងៃទី១៥ខែកក្កដានេះ យ៉ាងហោចណាស់មនុស្ស ១១នាក់ កំពុងបាត់ខ្លួន បន្ទាប់ពីទូកដឹកអ្នកដំណើរ ១៨នាក់ បានក្រឡាប់នៅជិតកោះ Mentawai ក្នុងខេត្តស៊ូម៉ាត្រា ភាគខាងលិចប្រទេសឥណ្ឌូណេស៊ី ។

យោងតាមសេចក្តីថ្លែងការណ៍rbsទីភ្នាក់ងារស្វែងរក និងជួយសង្គ្រោះកោះ Mentawai ឧបទ្ទវហេតុនេះបានកើតឡើងនៅម៉ោងប្រហែល ១១ព្រឹកថ្ងៃចន្ទ (ម៉ោងក្នុងស្រុក) ពេលដែលទូកកំពុងបើកនៅជិតកោះ Mentawai ដែលជាប្រជុំកោះដាច់ស្រយាលនៅភាគខាងលិចនៃកោះស៊ូម៉ាត្រា។ មនុស្ស​៧​នាក់​ត្រូវ​បាន​គេ​ជួយ​សង្គ្រោះ ខណៈ​១១​នាក់​ទៀត​នៅតែបាត់ខ្លួន​នៅឡើយ ។

មកដល់ពេលនេះក្រុមជួយសង្គ្រោះបានផ្តោតការខិតខំប្រឹងប្រែងស្វែងរករបស់ពួកគេលើតំបន់ជុំវិញកន្លែងគ្រោះថ្នាក់ ដោយមិនទាន់​មាន​មូលហេតុ​ផ្លូវការ​នៃ​គ្រោះថ្នាក់​នេះ​នៅឡើយ​ទេ​។ ប្រតិបត្តិការស្វែងរក និងជួយសង្គ្រោះកំពុងបន្ត ខណៈដែលក្រុមគ្រួសារអ្នកបាត់ខ្លួនកំពុងរង់ចាំព័ត៌មានថ្មីៗបន្តទៀត។

គួរបញ្ជាក់ថាគ្រោះថ្នាក់តាមទូក និងសាឡាងគឺជារឿងធម្មតានៅក្នុងប្រទេសឥណ្ឌូណេស៊ី ដែលជាប្រជុំកោះដ៏ធំដែលមានកោះប្រហែល ១៧,០០០ ដែលជារឿយៗបទបញ្ជាសុវត្ថិភាពត្រូវបានអនុវត្តន៍មិនសូវល្អ ហើយលក្ខខណ្ឌអាកាសធាតុមិនសូវអំណោយផល។

សោកនាដកម្មចុងក្រោយនេះក៏បានកើតឡើងបន្ទាប់ពីគ្រោះមហន្តរាយសមុទ្រនាពេលថ្មីៗនេះផងដែរដោយកាលពីដើមខែនេះ សាឡាងមួយបានលិចចេញពីកោះបាលី សម្លាប់មនុស្សយ៉ាងហោចណាស់ ១៨ នាក់។ កាល​ពី​ខែ​មីនា នាវា​មួយ​ទៀត​បាន​ក្រឡាប់​នៅ​កោះ​បាលី ដែល​បណ្តាល​ឲ្យ​ស្ត្រី​អូស្ត្រាលី​ម្នាក់​ស្លាប់។ ក្នុងឆ្នាំ ២០១៨ មនុស្សជាង ១៥០ នាក់បានលង់ទឹកស្លាប់នៅពេលដែលសាឡាងមួយបានលិចនៅក្នុងបឹង Toba ដែលជាបឹងមួយក្នុងចំណោមបឹងភ្នំភ្លើងជ្រៅបំផុតរបស់ពិភពលោកនៅកោះស៊ូម៉ាត្រា៕

អត្ថបទ៖ ប៊ុន សុភាព