រដ្ឋមន្ត្រីក្រសួងការងារគុយបា លាលែងតំណែង ក្រោយនិយាយថា ប្រទេសគ្មានអ្នកសុំទាន

នៅថ្ងៃពុធទី១៦ខែកក្កដាឆ្នាំ២០២៥ រដ្ឋមន្ត្រីក្រសួងការងារគុយបាលោកស្រី Marta Elena Feitó-Cabrera ត្រូវបង្ខំចិត្តលាលែងពីតំណែងបន្ទាប់ពីនិយាយថា ប្រទេសនេះគ្មានអ្នកសុំទានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំសភា កាលពីថ្ងៃចន្ទ លោកស្រីនិយាយថា៖ «យើងឃើញមនុស្សដែលហាក់ដូចជាអ្នកសុំទាន ប៉ុន្តែនៅពេលអ្នកក្រឡេកមើលដៃរបស់ពួកគេ មើលសម្លៀកបំពាក់របស់ពួកគេ ពួកគេគ្រាន់តែក្លែងខ្លួនជាអ្នកសុំទានប៉ុណ្ណោះ ពួកគេមិនមែនជាអ្នកសុំទានពិតប្រាកដឡើយ។ នៅគុយបា គ្មានអ្នកសុំទានទេ។

មិនត្រឹមប៉ុណ្ណឹង លោកស្រីថែមទាំងលើកឡើងទៀតថា អ្នកដែលសម្អាតកញ្ចក់រថយន្តតាមដងផ្លូវ គឺរស់ដោយស្រួល ហើយយកលុយដែលរកបានទៅទិញស្រាផឹក។ លោកស្រីក៏រិះគន់អ្នករើសសំរាមដែរថា ពួកគេកំពុងរើសយករបស់របរទៅលក់បន្ត ហើយមិនបង់ពន្ធ។

ការលើកឡើងដ៏ចម្រូងចម្រាស់នេះបានបង្កឲ្យមានពាក្យរិះគន់ដូចទឹកបាក់ទំនប់ ដោយលោកស្រីត្រូវរងការរិះគន់ថា «គ្មានដឹងអ្វីពីប្រទេសរបស់ខ្លួនទេ ចេះតែនិយាយឲ្យបានៗ»។

ម្យ៉ាងពលរដ្ឋជាច្រើនក៏ខឹងសម្បាផងដែរ ព្រោះសម្តីរបស់លោកស្រីផ្ទុយពីការពិត ទាំងដែលពួកគេកំពុងជួបប្រទះវិបត្តិសេដ្ឋកិច្ចដ៏ធ្ងន់ធ្ងរ ធ្វើឲ្យមនុស្សជាច្រើន ជាពិសេសចាស់ៗ ត្រូវប្រឈមនឹងភាពក្រីក្រ។

ក្រោយរងសម្ពាធនិងទទួលពាក្យរិះគន់ដូចទឹកបាក់ទំនប់ លោកស្រីក៏ទទួលស្គាល់កំហុសនិងបានដាក់លិខិតលាលែងពីតំណែងជារដ្ឋមន្ត្រីក្រសួងការងារ។

សូមជម្រាបថា ការសិក្សា​មួយ​​បង្ហាញ​ថា នៅ​ឆ្នាំ ២០២៤ ប្រជាជន​គុយបា​ជិត ៩០% រស់នៅ​ក្នុង​ស្ថានភាព​ក្រីក្រ​ខ្លាំង។ វា​ឆ្លុះបញ្ចាំង​ពី​វិបត្តិ​សេដ្ឋកិច្ច​ដ៏​អាក្រក់​បំផុត​របស់ប្រទេស​កោះមួយ​នេះ ដែល​អតិផរណា​ខ្ពស់ និង​កង្វះខាត​ធនធាន​មូលដ្ឋាន​ធ្វើ​ឲ្យ​ការ​រស់នៅ​ប្រចាំថ្ងៃ​កាន់តែ​លំបាកទៅៗ៕

អត្ថបទ៖ សុខ សុវណ្ណ

ចុចអាន៖ គុយបាជួបទុក្ខផ្ទួនៗ រងគ្រោះរញ្ជួយដីកម្រិត ៦,៨ រ៉ិចទ័រ បន្ទាប់ពីខ្យល់ព្យុះ និងដាច់ភ្លើង