ព័ត៌មានអន្ដរជាតិ

The Times៖ លោក ស៊ី ត្រាំ និង ពូទីន ទំនងជួបគ្នានៅទីក្រុងប៉េកាំងនៅដើមខែកញ្ញា

បានផុស

៤៣ វិនាទី មុន

នៅ

ថ្ងៃសៅរ៍ ១៩ កក្កដា ២០២៥

ដោយ

សារព័ត៌មានលោកខាងលិច បានរាយការណ៍ថា ប្រធានាធិបតីអាមេរិក លោក ដូណាល់ ត្រាំ (Donald Trump) អាចនឹងត្រូវជួបប្រធានាធិបតីចិន លោក ស៊ី ជីនពីង និងប្រធានាធិបតីរុស្ស៊ី លោក វ៉្លាឌីមៀរ ពូទីន នៅក្នុងទីក្រុងប៉េកាំងនៅដើមខែកញ្ញាខាងមុខនេះ។

រូបគំនូរលោក ត្រាំ លោកស៊ី និង លោក ពូទីន។ SCMP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍របស់កាសែត The Times បានផ្តល់ហេតុផលថា ជំនួបរបស់ប្រមុខរដ្ឋមហាអំណាចទាំង៣នៅទីក្រុងប៉េកាំង ដោយសារតែប្រទេសចិននឹងត្រូវរៀបចំការអបអរសាទរខួបទី៨០នៃការបិទបញ្ចប់សង្គ្រាមប្រឆាំងអាណានិគមជប៉ុន និងជាការបិទបញ្ចប់សង្គ្រាមលោកលើកទី២ នៅតំបន់អាស៊ីរវាងចិននិងជប៉ុន ហើយនៅពេលនោះ លោក ដូណាល់ ត្រាំ និង លោក ពូទីន នឹងត្រូវបានអញ្ជើញឲ្យទៅចូលរួមក្នុងពិធីហែក្បួនព្យុហយាត្រាយោធា។

កាសែត The Times បាននិយាយថា សង្គ្រាមពាក្យសម្តីលើកិច្ចព្រមព្រៀងពាណិជ្ជកម្មជាបន្តបន្ទាប់រវាងសហរដ្ឋអាមេរិក និងចិន បានបង្ខំឱ្យលោក ត្រាំ ពិចារណាឡើងវិញនូវគន្លងអរិភាពរបស់គាត់ចំពោះទីក្រុងប៉េកាំង ដែលបណ្តាលឱ្យមានការរំពឹងទុកអំពីការអញ្ជើញមេដឹកនាំអាមេរិកដែលអាចធ្វើទៅបានទៅកាន់រដ្ឋធានីរបស់ប្រទេសចិនសម្រាប់ព្យុហយាត្រាយោធាជាកិត្តិយសនៃខួបលើកទី ៨០នៃជ័យជំនះក្នុងសង្គ្រាមលោកលើកទីពីរនៅតំបន់អាស៊ី ដែលជាការធ្វើសង្គ្រាមរវាងចិននិងជប៉ុនដ៏ធំសម្បើម។

តាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ជំនួយការវិមានក្រឹមឡាំងរុស្ស៊ី លោក Yury Ushakov បាននិយាយថា លោកពូទីននឹងធ្វើទស្សនកិច្ចនៅប្រទេសចិននៅចុងខែសីហា និងដើមខែកញ្ញា ដើម្បីចូលរួមក្នុងព្រឹត្តិការណ៍រំឭកខួបនៃជ័យជំនះក្នុងសង្គ្រាមលោកលើកទីពីរ។

ទោះបីជាបែបនេះក្តី អ្នកនាំពាក្យវិមានក្រឹមឡាំងបានបញ្ជាក់ដល់ព័ត៌មានរុស្ស៊ីថា លោកមិនទាន់ដឹងច្បាស់អំពីផែនការជួបគ្នាដែលត្រូវបានគេផ្សព្វផ្សាយនោះទេ។

នៅចុងខែសីហា ប្រទេសចិននឹងរៀបចំកិច្ចប្រជុំកំពូលនៃប្រទេសជាសមាជិកនៃអង្គការកិច្ចសហប្រតិបត្តិការសៀងហៃ ដែលត្រូវបានគេចាត់ទុកថា ជាណាតូប្រចាំតំបន់អាស៊ី ដែលមានបេសកកម្មពង្រឹងវិស័យយោធា និងការពារគ្នានៅក្នុងតំបន់អាស៊ីកណ្តាលដែលងាយទទួលឥទ្ធិពលពីការពង្រីកខ្លួនរបស់អង្គការណាតូនៅតំបន់កូកាស៕

រ៉ាន់ រើយ