ជនជាតិប៉ាឡេស្ទីន១៥​នាក់ទៀត​ស្លាប់​ព្រោះអត់ឃ្លាន​ ខណៈ​ហ្គាហ្សា​រងការ​វាយ​ប្រហារពីអ៊ីស្រាអែល​កាន់​តែ​ខ្លាំង

យោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី២៣ខែកក្កដា យ៉ាងហោចណាស់ជនជាតិប៉ាឡេស្ទីន ១៥នាក់ រួមទាំងទារកអាយុប្រាំមួយសប្តាហ៍បានស្លាប់ដោយសារភាពអត់ឃ្លានក្នុងរយៈពេល ២៤ ម៉ោងក្នុងតំបន់ហ្គាហ្សា ចំពេលមានការកើនឡើងការវាយប្រហាររបស់អ៊ីស្រាអែល និងវិបត្តិមនុស្សធម៌កាន់តែអាក្រក់ទៅៗ។

មន្ត្រីសុខាភិបាលហ្គាហ្សារាយការណ៍ថាមនុស្សជាង ១០០ នាក់ ភាគច្រើនជាកុមារបានស្លាប់ដោយសារភាពអត់ឃ្លានចាប់តាំងពីការវាយលុករបស់អ៊ីស្រាអែលចាប់ផ្តើមនៅក្នុងខែតុលា ឆ្នាំ ២០២៣ ខណៈចំនួនអ្នកស្លាប់ក្នុងប៉ុន្មានសប្តាហ៍ថ្មីៗនេះបានកើនឡើងជាលំដាប់។

ភាពអត់ឃ្លានបន្តកើនឡើងបន្ទាប់ពីការផ្គត់ផ្គង់ស្បៀងអាហារនៅហ្គាហ្សាបានដួលរលំក្រោយអ៊ីស្រាអែលបិទផ្លូវដឹកជំនួយកាលពីខែមីនា។ ទោះបីជាមានជំនួយខ្លះបានចូលតាំងពីខែឧសភា តាមរយៈមូលនិធិមនុស្សធម៌ហ្គាហ្សា ដែលគាំទ្រដោយសហរដ្ឋអាមេរិក និងអ៊ីស្រាអែល (GHF) ក៏ដោយ ក៏អង្គការសហប្រជាជាតិ និងទីភ្នាក់ងារផ្តល់ជំនួយនិយាយថាប្រព័ន្ធចែកចាយជំនួយកំពុងបរាជ័យ ដោយហៅវាថាជា «អន្ទាក់មរណៈ» ព្រោះជាកន្លែងដែលអ្នកលបបាញ់សំដៅលើហ្វូងមនុស្សចាំបើកជំនួយ។ ចាប់តាំងពីមានមូលនិធិមនុស្សជាង ១,០០០ នាក់ត្រូវបានគេរាយការណ៍ថាបានស្លាប់ ខណៈពេលដែលកំពុងព្យាយាមទទួលជំនួយ។

ក្នុងពេលជាមួយគ្នានោះ ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនយ៉ាងតិច ៨១ នាក់កាលពីថ្ងៃអង្គារតែមួយ រួមទាំងជនស៊ីវិលស្វែងរកជំនួយ។ ការវាយប្រហារតាមអាកាសបានសំដៅទៅលើទីក្រុងហ្គាហ្សា និង Deir el-Balah ដោយបង្ខំជម្លៀសមនុស្សរាប់ម៉ឺននាក់ចេញពីតំបន់ចុងក្រោយមួយដែលត្រូវបានគេចាត់ទុកថាមានសុវត្ថិភាព។

យោងតាមក្រសួងសុខាភិបាលរបស់ហ្គាហ្សា ប្រជាជនប៉ាឡេស្ទីនជិត ៦០,០០០ នាក់ ភាគច្រើនជាស្ត្រី និងកុមារត្រូវបានសម្លាប់ចាប់តាំងពីសង្រ្គាមបានចាប់ផ្តើម ៕

អត្ថបទ៖ ប៊ុន សុភាព