ខ្យល់ព្យុះត្រូពិកវីពផាបង្កឲ្យមានទឹកជំនន់ពាសពេញភាគខាងជើងប្រទេសថៃ

ព្យុះវីពផា (Wipha) ដែលទើបតែបានចុះខ្សោយទៅជាព្យុះត្រូពិច បានបណ្តាលឱ្យមានភ្លៀងធ្លាក់ខ្លាំង ទឹកជំនន់ភ្លាមៗ និងខ្យល់បក់ខ្លាំង បានវាយប្រហារខេត្តមួយចំនួននៅភាគខាងជើងប្រទេសថៃ ជាពិសេសខេត្ត Nan, Chiang Rai, Phayao និង Chiang Mai ខណៈដែលព្យុះនេះបានផ្លាស់ទីពីប្រទេសជិតខាងឡាវ។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី២៣ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានឧតុនិយមថៃ សំណល់របស់ព្យុះវីពផា រួមជាមួយនឹងខ្យល់មូសុងនិរតីតាមរដូវ បានបង្កឲ្យមានភ្លៀងធ្លាក់ជាបន្តបន្ទាប់ពាសពេញភាគខាងជើង និងភាគឦសានប្រទេសថៃ។ នៅខេត្ត Nan បរិមាណទឹកភ្លៀងបានឡើងដល់ពី ១៥០-២០០ មីលីម៉ែត្រ ដែលនាំឱ្យមានការជន់លិចយ៉ាងខ្លាំងនៅតំបន់ទំនាប។ នៅក្នុងស្រុក Thoeng នៃខេត្ត Chiang Rai ទឹកជំនន់បានជន់លិចហេដ្ឋារចនាសម្ព័ន្ធសំខាន់ៗ រួមទាំងប៉ុស្តិ៍ប៉ូលិស មន្ទីរពេទ្យ និងសាលរៀន ព្រមទាំងផ្ទះអ្នកស្រុកនៅក្នុងស្រុក Muang និង Phaya Mengrai។

ជាមួយគ្នានេះ អាជ្ញាធរខេត្ត Chaing Mai បានចាប់ផ្តើមការឆ្លើយតបជាបន្ទាន់ ដោយបង្កើតមជ្ឈមណ្ឌលបញ្ជា ២៤ម៉ោង និងបើកជម្រកបណ្តោះអាសន្នចំនួន ៤០ សម្រាប់អ្នកស្រុកដែលរងផលប៉ះពាល់ជាង ២ ម៉ឺននាក់។

ព្យុះ​នេះ​ក៏​បាន​ប៉ះពាល់​ដល់​លក្ខខណ្ឌ​សមុទ្រ​ផង​ដែរ​។ នាយកដ្ឋានឧតុនិយមថៃ បានព្រមានអំពីស្ថានភាពសមុទ្រដ៏គ្រោះថ្នាក់ទាំងនៅសមុទ្រ Andaman និងឈូងសមុទ្រថៃ ដែលរលកមានកម្ពស់ពី ២ ទៅ ៤ ម៉ែត្រ។ ទូកតូចៗត្រូវបានណែនាំឲ្យនៅជាប់ច្រាំង ខណៈនាវាធំៗត្រូវបានជំរុញឱ្យដំណើរការដោយប្រុងប្រយ័ត្ន។

គួរបញ្ជាក់ថាទោះបីព្យុះវីពផា មិនបានវាយលុកប្រទេសថៃដោយផ្ទាល់ក៏ដោយ ក៏ឥទ្ធិពលរបស់វា រួមជាមួយនឹងខ្យល់មូសុងនិរតីដ៏ខ្លាំងក្លា បានបណ្តាលឱ្យមានភ្លៀងធ្លាក់ខ្លាំងដល់ខ្លាំងនៅទូទាំងភាគខាងជើង ដែលបង្កើនការព្រួយបារម្ភអំពីទឹកជំនន់ភ្លាមៗ និងការខូចខាតហេដ្ឋារចនាសម្ព័ន្ធ ខណៈមានអ្នកទេសចរចិនពីរនាក់ហើយបានស្លាប់ដោយសារតែឥទ្ធិពលរបស់ព្យុះនេះ៕

អត្ថបទ៖ ប៊ុន សុភាព