ថាក់ស៊ីន ភូតពិភពលោកថា ថៃគោរពច្បាប់អន្តរជាតិ និងបំពេញកាតព្វកិច្ចជាអ្នកជិតខាងល្អ តែបាញ់កម្ពុជាមុន

ទាក់ទងការផ្ទុះអាវុធនៅព្រំដែនកម្ពុជា-ថៃ អតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រ ខំភូតកុហកទៅពិភពលោកថា ប្រទេសខ្លួនគោរពច្បាប់អន្តរជាតិណាស់ និងបំពេញកាតព្វកិច្ចក្នុងនាមជាអ្នកជិតខាងដ៏ល្អ រួមទាំងការអត់ធ្មត់ផងដែរ ទាំងដែលទាហានថៃបាញ់មកលើកម្ពុជាមុនសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារបង្ហោះលើបណ្តាញសង្គមនៅថ្ងៃព្រហស្បតិ៍ទី២៤ខែកក្កដាឆ្នាំ២០២៥ លោកថាក់ស៊ីន បែរជាចោទមកលើកងទ័ពកម្ពុជាថាជាអ្នកផ្តើមវាយប្រហារមុន និងដាក់គ្រាប់មីននៅតាមព្រំដែនទៅវិញ។ ថាក់ស៊ីន ថែមទាំងឡាំប៉ាថា កម្ពុជាបំពានច្បាប់អន្តរជាតិនិងក្រមសីលធម៌នៃការរួមរស់ជាអ្នកជិតខាងដ៏ល្អថែមទៀតផង។

ការចោទប្រកាន់យ៉ាងងងើលរបស់ថាក់ស៊ីន កើតឡើងមិនយូរប៉ុន្មានបន្ទាប់ពីកូនស្រីរបស់ខ្លួនគឺ ផែថងថាន ស៊ីណាវ៉ាត្រ ដែលជានាយករដ្ឋមន្ត្រីព្យួរតំណែងនិងជារដ្ឋមន្ត្រីក្រសួងវប្បធម៌ ក៏ចោទមកលើប្រទេសកម្ពុជាទាំងគ្មានមូលដ្ឋានថា «ដូច​ការ​រំពឹង​ទុក ធ្វើ​ដូច​ជា​ជន​រង​គ្រោះ»។

ទន្ទឹម​នឹងនោះ ​លោកស្រីក៏​ចែករំលែក​ព័ត៌មាន​របស់​អនុរដ្ឋមន្ត្រី​ក្រសួងការពារជាតិ​ថៃ Nattapol Nakphanit ដែលរៀបរាប់អំពីស្ថានភាពបច្ចុប្បន្នថា កងទ័ពថៃរបស់ខ្លួនបានស៊ូទ្រាំបំផុត ហើយ​នឹង​មិន​មាន​ការ​ចរចា​ជាមួយ​កម្ពុជា​ទៀត​ដែរ។

ការចោទប្រកាន់របស់ឪពុកកូននេះ គឺជាការព្យាយាមភូតកុហកអន្តរជាតិដោយមិនចេះខ្មាស់អៀន ទាំងដែលប្រទេសខ្លួននោះ គឺជាអ្នកឈ្លានពាននិងរំលោភលើដែនអធិបតេយ្យរបស់កម្ពុជាសោះ៕

អត្ថបទ៖ សុខ សុវណ្ណ

ចុចអាន៖ ថៃបាញ់កម្ពុជាមុនសោះ តែឥឡូវបែរជាមកអំពាវនាវឲ្យកម្ពុជាឈប់បាញ់ទៅវិញ