ដឹងមូលហេតុដែលខ្មាន់កាំភ្លើង បាញ់សម្លាប់មនុស្សយ៉ាងរង្គាលនៅ បាងកក

ដឹងមូលហេតុហើយ តាមពិតខ្មាន់កាំភ្លើងដែលបើកការបាញ់ប្រហារសម្លាប់រង្គាលនៅផ្សារ Or Tor Kor ក្នុងទីក្រុងបាងកក នៃប្រទេសថៃកាលពីរសៀលថ្ងៃចន្ទទី២៨ខែកក្កដាឆ្នាំ២០២៥ គឺដោយសារជម្លោះបុគ្គល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យប៉ូលិសក្រុងបាងកក Sayam Boonsom បានឲ្យដឹងថា ជនដៃដល់ឈ្មោះ ណយ អាយុ៦១ឆ្នាំ មកពីខេត្តនគររាជសីមា គឺជាអតីតអ្នកធ្វើការនៅផ្សារ Or Tor Kor ហើយមានជម្លោះជាមួយសន្តិសុខម្នាក់នៅផ្សារនេះជាយូរមកហើយ។

ដោយសារតែគំនំ ខ្មាន់កាំភ្លើងក៏បើកការបាញ់រះមិនរើសមុខ សម្លាប់មនុស្សចំនួន៥នាក់ក្នុងនោះមាន៤នាក់ជាសន្តិសុខនិងម្នាក់ជាអាជីវករ ហើយបន្ទាប់មកគាត់បានបាញ់សម្លាប់ខ្លួនឯង ធ្វើឲ្យមនុស្សស្លាប់ក្នុងហេតុការណ៍នេះមានសរុប ៦នាក់។

ទោះបីជាយ៉ាងណាក៏ដោយ ប៉ូលិសនៅតែបន្តការស៊ើបអង្កេត ដើម្បីរកព័ត៌មានលម្អិតបន្ថែមទៀត។

មិនមែនជារឿងចម្លែកទេចំពោះហេតុការណ៍បាញ់ប្រហារនៅថៃ ព្រោះថា ប្រទេសនេះមានគោលនយោបាយគ្រប់គ្រងកាំភ្លើងដ៏ធូររលុងបំផុត ធ្វើឲ្យមនុស្សម្នាក់ៗមានលទ្ធភាពកាន់កាប់កាំភ្លើងដោយងាយស្រួល៕

អត្ថបទ៖ សុខ សុវណ្ណ

ចុចអាន៖ អ្នកស្លាប់ក្នុងការបាញ់ប្រហារនៅបាងកកកើនដល់៦នាក់ ខណៈខ្មាន់កាំភ្លើងជាជនជាតិថៃ