ភ្លៀង​ធ្លាក់​ខ្លាំងនិង​ទឹកជំនន់​កំពុងគំរាមកំហែងលើ៤១ខេត្តរបស់ថៃ

នាយកដ្ឋានឧតុនិយមរបស់ប្រទេសថៃបានចេញការព្រមានចំពោះភ្លៀងធ្លាក់ខ្លាំង និងទឹកជំនន់នៅទូទាំងខេត្តចំនួន ៤១ ខណៈភ្លៀង​ត្រូវ​បាន​ព្យាករ​ថា​នឹង​គ្រប​ដណ្តប់​ពី ៦០ទៅ ៧០% ជាពិសេស​នៅ​តំបន់​ភាគ​ខាងជើង ឦសាន កណ្តាល និង​ភាគ​ខាងកើត។ នេះបើយោងតាមការចេញផ្សាយរបស់សារព័ត៌មាន ​Khaosod នៅថ្ងៃទី២៩ខែកក្កដា។

ខេត្តសំខាន់ៗដែលមានហានិភ័យរួមមាន Chiang Mai, Chiang Rai, Nan, Nakhon Phanom, Bungkan, Chanthaburi និង Trat។ ប្រជាពលរដ្ឋត្រូវប្រុងប្រយ័ត្នចំពោះទឹកជំនន់ភ្លាមៗ ទឹកហូរ និងកម្ពស់ទឹកទន្លេ ពិសេសនៅតំបន់ទំនាប និងក្បែរជើងភ្នំ។ ស្ថានភាពនេះគឺដោយសារខ្យល់មូសុងវាយលុកលើប្រទេសមីយ៉ាន់ម៉ា ឡាវ និងវៀតណាមភាគខាងជើង រួមជាមួយនឹងខ្យល់មូសុងនិរតីកម្រិតមធ្យម លើសមុទ្រ Andaman ប្រទេសថៃ និងឈូងសមុទ្រថៃ។

ខ្យល់បក់បោកខ្លាំង និងរលកក៏ត្រូវបានព្យាករថានឹងកើតមាននៅសមុទ្រ Andaman ខាងលើ និងឈូងសមុទ្រថៃ ជាមួយនឹងរលកកម្ពស់ដល់ទៅ ២ ម៉ែត្រ ហើយនឹងខ្ពស់ជាងនេះនៅតំបន់ដែលមានខ្យល់ព្យុះ។ កងទ័ពជើងទឹកថៃត្រូវបានជំរុញឱ្យអនុវត្តការប្រុងប្រយ័ត្ន និងជៀសវាងការជិះទូកនៅតំបន់ដែលមានព្យុះផ្គររន្ទះ។

អាជ្ញាធរ​ថៃកំពុងជំរុញ​ឲ្យ​វិស័យ​សាធារណៈ និង​ដែនសមុទ្រ​បន្ត​ធ្វើ​បច្ចុប្បន្នភាព និង​ប្រុងប្រយ័ត្ន​ចំពោះ​គ្រោះថ្នាក់​ដែល​ទាក់ទង​នឹង​អាកាសធាតុ និងត្រៀមខណៈជម្លៀសចេញប្រសិនបើលក្ខខណ្ឌអាកាសធាតុកាន់តែធ្ងន់ធ្ងរ។

គួរបញ្ជាក់ថា​មួយរយៈចុងក្រោយនេះប្រទេសថៃប្រឈមនឹងបញ្ហាអាកាសធាតុធ្ងន់ធ្ងរ ជាពិសេស ភ្លៀងធ្លាក់ខ្លាំងបង្កជាទឹកជំនន់និងបំណាក់ដី ខណៈខេត្តខ្លះដូចជាខេត្ត Nan ទឹកជំនន់ហក់ឡើងដល់ ២ ម៉ែត្រឯណោះនិងកំពុងបញ្ជាជម្លៀស៕

អត្ថបទ៖ ប៊ុន សុភាព