ប្រមុខយោធាមីយ៉ាន់ម៉ា បញ្ជាឱ្យបង្កើនសន្តិសុខទូទាំងប្រទេសមុនការបោះឆ្នោត

បើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៤ខែសីហា ប្រមុខយោធាមីយ៉ាន់ម៉ា និងជាប្រធានាធិបតីស្តីទី លោក មីនអ៊ុង ឡាំង (Min Aung Hlaing) បានអំពាវនាវឱ្យបង្កើនសន្តិសុខសម្រាប់អ្នកនយោបាយ និងអ្នកបោះឆ្នោត នៅមុនការបោះឆ្នោតដែលបានគ្រោងទុកនៅខែធ្នូ និងខែមករា។

ការបោះឆ្នោតរបស់របបសឹកមីយ៉ាន់ម៉ាដែលគ្រោងនឹងប្រព្រឹត្តនេះ ត្រូវបានច្រានចោលដោយរដ្ឋាភិបាលលោកខាងលិចថាជាការបោកប្រាស់និងមានតែអ្នកគាំទ្រយោធាប៉ុណ្ណោះ បន្ទាប់ពីក្រុមប្រឆាំងត្រូវបានរារាំង ឬជ្រើសរើសមិនចូលរួម។

នៅក្នុងកិច្ចប្រជុំនៃគណៈកម្មាធិការរៀបចំការបោះឆ្នោតថ្មី លោក មីន អ៊ុងឡាំង បានព្រមានអំពីការវាយប្រហារដែលអាចកើតមានលើមន្ត្រីរាជការ ហើយបានសង្កត់ធ្ងន់ថា ការបោះឆ្នោតត្រូវតែដំណើរការដោយគ្មានការបរាជ័យ។ អាជ្ញាធររបបសឹកក៏កំពុងពង្រឹងសន្តិសុខនិងពិនិត្យមើលប្រតិបត្តិការយោធាដើម្បីការពារការបោះឆ្នោត។ ជុំវិញការបោះឆ្នោតច្បាប់​បោះឆ្នោត​ថ្មី​ពី​ក្រុមប្រឹក្សា​យោធា​រួម​បញ្ចូល​ទាំង​ការ​ដាក់​ទោស​ធ្ងន់​ធ្ងរ រួមមាន​ចាប់​ពី​ដាក់ពន្ធនាគារ​យ៉ាង​តិច​បី​ឆ្នាំ​រហូត​ដល់​ប្រហារ​ជីវិត។

កាលពីឆ្នាំមុន ជំរឿនទូទាំងប្រទេសដែលមានគោលបំណងបង្កើតបញ្ជីឈ្មោះអ្នកបោះឆ្នោតត្រូវបានបញ្ចប់តែផ្នែកខ្លះប៉ុណ្ណោះ ដែលគ្របដណ្តប់ ១៤៥ ក្នុងចំណោមសង្កាត់ចំនួន ៣៣០ របស់ប្រទេសមីយ៉ាន់ម៉ា។ យោធាបានប្រគល់អំណាចបន្ទាប់បន្សំទៅឱ្យរដ្ឋាភិបាលបណ្តោះអាសន្នដឹកនាំដោយជនស៊ីវិលក្នុងខែនេះ បួនឆ្នាំបន្ទាប់ពីការធ្វើរដ្ឋប្រហាររបស់លោក មីន អ៊ុងឡាំង បានទម្លាក់រដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី(Aung San Suu Kyi) ដែលបង្កឱ្យមានការតវ៉ា និងជម្លោះប្រដាប់អាវុធនិងកំពុងបន្តមកដល់ពេលនេះ​​​​​​​​​​​​​​​​​​​​​​​​​​​​​​​​​​​​​៕

អត្ថបទ៖ ប៊ុន សុភាព