ជម្លោះប្រច័ណ្ឌគ្នា ធ្វើឲ្យបែកធ្លាយព្រះសង្ឃថៃក្នុងខេត្តឈៀងរ៉ៃ មានទំនាក់ទំនងស្នេហាភេទដូចគ្នា

យោងតាមការចេញផ្សាយរបស់សារព័ត៌មាន Khaosod រឿងរ៉ាវជម្លោះប្រច័ណ្ឌគ្នានាំឲ្យមានការបែកធ្លាយវីដេអូស្នេហាភេទដូចគ្នារវាងព្រះចៅអធិការវត្តដ៏ល្បីមួយក្នុងខេត្តឈៀងរ៉ៃ ប្រទេសថៃ ជាមួយបុរសម្នាក់និងបែកធ្លាយវីដេអូមិនសមរម្យផ្សេងទៀតបង្កឲ្យពុទ្ធបរិស័ទជាច្រើនរិះគន់និងបង្ខំឲ្យព្រះចៅអធិការអង្គនោះផ្សឹកចេញពីវត្ត។

វីដេអូមួយបានរីករាលដាលនៅលើអ៊ីនធឺណិត ដែលបង្ហាញពីព្រះសង្ឃមួយអង្គ ដែលត្រូវបានគេស្គាល់ថាជាព្រះចៅអធិការវត្តដ៏ល្បីមួយក្នុងខេត្តឈៀងរ៉ៃបានវីដេអូខលជាមួយបុរសម្នាក់ក្នុងលក្ខណៈស្និទ្ធស្នាលដូចស្នេហា។ ខណៈវីដេអូឃ្លីបមួយទៀត បង្ហាញពីព្រះសង្ឃអង្គនេះមានកាយវិការមិនសមរម្យទាក់ទងនឹងអ្នកស្រឡាញ់ភេទដូចគ្នា បង្កឱ្យមានការរិះគន់ពីសំណាក់ប្រជាជននិងការជជែកដេញដោលពេញបណ្ដាញសង្គម។

យោងតាមព័ត៌មានបឋម វីដេអូទាំងនេះត្រូវបានបែកធ្លាយ ដោយសារតែជម្លោះប្រច័ណ្ឌរវាងមេភូមិម្នាក់ ដែលជាអ្នកស្រលាញ់ភេទដូចគ្នា និងមានតួនាទីជាប្រធានឧបាសក និងជាគ្រូធ្វើពិធីសាសនានៅក្នុងវត្ត ទៅលើព្រះសង្ឃមួយអង្គទៀតនៅវត្តដែលស្និទ្ធនឹងចៅអធិការវត្តអង្គនេះ។

ហេតុការណ៍​នេះ​បាន​បង្ក​ការ​ខឹងសម្បារ​ដល់​ប្រជាពលរដ្ឋ​ក្នុង​មូលដ្ឋាន​ជា​ច្រើន​ដែល​អំពាវនាវ​ឱ្យ​អាជ្ញាធរ​ពុទ្ធសាសនា​ចាត់វិធានការ​ឱ្យ​បាន​ត្រឹមត្រូវ។ ពលរដ្ឋថៃ​ក៏​កំពុង​ជំរុញ​ឲ្យ​ព្រះចៅអធិការអង្គនេះផ្សឹកចេញ បញ្ចប់​ជម្លោះនិង​ស្ដារ​ជំ​នូវ​ទំនុក​ចិត្ត​ក្នុង​វត្តមកវិញ។

គួរបញ្ជាក់ថានៅក្នុងប្រទេសថៃមួយរយៈចុងក្រោយនេះតែងតែមានរឿងអាស្រូវទាក់ទងនឹងព្រះសង្ឃដូចជាព្រះសង្ឃជាន់ខ្ពស់ជាច្រើនអង្គមានទំនាក់ទំនងផ្លូវភេទជាមួយស្រ្តីម្នាក់ និងលួយបច្ច័យវត្ត។ ក្រោយមកក៏មានការត្រួតពិនិត្យព្រះសង្ឃជាច្រើនអង្គទូទាំងប្រទេសដើម្បីស្ដាទំនុកចិត្តប្រជាជនលើព្រះពុទ្ធសាសនា រកឃើញព្រះសង្ឃមួយចំនួនតេស្តវិជ្ជមានសារធាតុញៀន ខណៈព្រះសង្ឃអង្គខ្លះទៀតធ្លាប់មានប្រព្រឹត្តបទឧក្រិដ្ឋពីមុនមកនិងបានរត់គេចពីសំណាញ់ច្បាប់មកបួស។ រឿងអាស្រូវទាំងនេះបានធ្វើឲ្យសហគមន៍ពុទ្ធសាសនាថៃរង្គោះរង្គើនិងបាត់ទំនុកយ៉ាងខ្លាំង ហើយរឿងអាស្រូវទាំងនេះក៏ល្បីសាយភាយដល់អន្តរជាតិផងដែរ៕

អត្ថបទ៖ ប៊ុន សុភាព