UN៖ នៅឆ្នាំ២០២៤ អំពើហិង្សាផ្លូវភេទក្នុងសង្គ្រាមជុំវិញពិភពលោកកើនឡើង ២៥%

យោងតាមការចេញផ្សាយរបស់ទីភ្នាក់ងារព័ត៌មាន AP របាយការណ៍របស់អង្គការសហប្រជាជាតិចេញផ្សាយកាលពីថ្ងៃព្រហស្បតិ៍បានបង្ហាញថា អំពើហិង្សាផ្លូវភេទនៅក្នុងសង្គ្រាម និងជម្លោះជុំវិញពិភពលោកបានកើនឡើង ២៥% ក្នុងឆ្នាំ ២០២៤ ដោយមានរបាយការណ៍ពីជនរងគ្រោះជាង ៤,៦០០ នាក់ ។

ចំនួនខ្ពស់បំផុតត្រូវបានកត់ត្រានៅក្នុងសាធារណរដ្ឋអាហ្រ្វិកកណ្តាល កុងហ្គោ ហៃទី សូម៉ាលី និងស៊ូដង់ខាងត្បូង។ ការរំលោភបំពានភាគច្រើនត្រូវបានប្រព្រឹត្តដោយក្រុមប្រដាប់អាវុធ ខ្លះពាក់ព័ន្ធនឹងកងកម្លាំងរដ្ឋាភិបាលក៏ដោយ។ អង្គការសហប្រជាជាតិបានសង្កត់ធ្ងន់ថាតួលេខជាក់ស្តែងទំនងជាខ្ពស់ជាងឆ្ងាយ។

របាយការណ៍បានដាក់ឈ្មោះក្រុម ឬកងកម្លាំងចំនួន ៦៣ នៅក្នុងប្រទេសចំនួន ១២ ក្នុងបញ្ជីខ្មៅសម្រាប់ប្រព្រឹត្តការរំលោភសេពសន្ថវៈ និងឧក្រិដ្ឋកម្មស្រដៀងគ្នា ដោយកត់សម្គាល់ថាជាង ៧០% បានស្ថិតក្នុងបញ្ជីអស់រយៈពេលជាង ៥ ឆ្នាំដោយមិនព្យាយាមបញ្ឈប់អំពើហិង្សា។ ជាមួយគ្នានេះជាលើកដំបូង យោធារបស់អ៊ីស្រាអែល និងកងកម្លាំងរបស់រុស្ស៊ី ត្រូវបានព្រមានថា ពួកគេអាចនឹងត្រូវបានបន្ថែមនៅក្នុងបញ្ជីខ្មៅនៅឆ្នាំក្រោយ ដោយសារតែការអះអាងគួរឱ្យជឿជាក់នៃការរំលោភបំពាននៅក្នុងមណ្ឌលឃុំឃាំងរបស់ប្រទេសទាំងនេះ។

ជនរងគ្រោះភាគច្រើនជាស្ត្រី និងកុមារីអាយុពី ១ឆ្នាំ ដល់ ៧៥ឆ្នាំ ត្រូវបានរំលោភនៅក្នុងផ្ទះ តាមផ្លូវ និងកន្លែងធ្វើការ ដោយខ្លះត្រូវបានប្រហារជីវិតបន្ទាប់ពីរំលោភរួច។ បុរស​និង​ក្មេងប្រុស​ក៏​ត្រូវ​បាន​គេ​ធ្វើ​បាប​ដែរ ភាគច្រើននៅក្នុង​ពេល​ឃុំ​ខ្លួន។

អង្គការសហប្រជាជាតិបានចងក្រងឯកសារករណីធ្ងន់ធ្ងរនៅក្នុងប្រទេសកុងហ្គោ ស៊ូដង់ និងសាធារណរដ្ឋអាហ្រ្វិកកណ្តាល ដែលជារឿយៗត្រូវបានផ្សារភ្ជាប់ទៅនឹងការគ្រប់គ្រងដែនដី និងការកេងប្រវ័ញ្ចធនធាន។ អគ្គលេខាធិការអង្គការសហប្រជាជាតិលោក Antonio Guterres បានថ្កោលទោសការប្រើប្រាស់អំពើហិង្សាផ្លូវភេទជាអាវុធនៃសង្គ្រាម ការធ្វើទារុណកម្ម និងការគាបសង្កត់ផ្នែកនយោបាយ ដោយជំរុញឱ្យអន្តរជាតិមានសកម្មភាពជាបន្ទាន់៕

អត្ថបទ៖ ប៊ុន សុភាព