អ៊ុយក្រែនពិចារណាទិញអាវុធអាមេរិក៩០​ពាន់លានដុល្លារ ជាថ្នូរនឹងការធានាសន្តិសុខ

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បាន​ឲ្យ​ដឹង​កាល​ពី​​ថ្ងៃទី​១៨​ខែសីហាថា អ៊ុយក្រែនកំពុង​ពិចារណា​លើ​ការ​ទិញអាវុធអាមេរិក​ក្នុង​តម្លៃ ៩០ពាន់លានដុល្លារ ដោយប្រើមូលនិធិអឺរ៉ុប ជាថ្នូរនឹងការធានាសន្តិសុខពីទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ុយក្រែន កំពុង​ស្វែងរកទិញប្រព័ន្ធការពារដែនអាកាស Patriot យ៉ាងតិច១០គ្រឿង ព្រម​ទាំង​ឧបករណ៍យោធា និង​មីស៊ីល​ផ្សេងៗទៀត។ បន្ថែម​ពី​នេះ អ៊ុយក្រែន ក៏កំពុង​ធ្វើ​កិច្ចព្រមព្រៀងតម្លៃ ៥០​ពាន់លានដុល្លារដាច់ដោយឡែក​មួយ​ សម្រាប់ការផលិតយន្តហោះគ្មានមនុស្សបើករួមគ្នាជាមួយ​អាមេរិក​ផង​ដែរ។ លោក​ ហ្សេលេនស្គី និយាយ​ថា «យើងក៏បានយល់ព្រមជាមួយប្រធានាធិបតីសហរដ្ឋអាមេរិកថា ពួកគេនឹងទិញយន្តហោះគ្មានមនុស្សបើករបស់អ៊ុយក្រែនបន្ទាប់ពី​វា​ត្រូវបាននាំចេញ»។

យោងតាមរបាយការណ៍របស់ Financial Times អ៊ុយក្រែនបានស្នើ​ឲ្យ​​មាន​ការ​ប្រើប្រាស់ថវិកាចំនួន ១០០​ពាន់លានដុល្លាររបស់អឺរ៉ុប ដើម្បីទិញអាវុធរបស់សហរដ្ឋអាមេរិក ដែលជាផ្នែកមួយនៃកិច្ចព្រមព្រៀងធានាសន្តិសុខក្រោយសង្គ្រាម។ ផែនការនេះស្របនឹងការផ្លាស់ប្តូរគោលនយោបាយរបស់លោកប្រធានាធិបតី ដូណាល់ ត្រាំ ដែល​​ថា​នឹង​«លែងមាន​ជំនួយ​អាវុធដោយឥតគិតថ្លៃទៀតហើយ មានតែការលក់ប៉ុណ្ណោះ»។

សូម​ជម្រាប​ថា ថ្មីៗនេះអង្គការណាតូបានបង្កើត​មូលនិធិ PURL ((NATO Prioritized Ukraine Requirements List) ដែលសមាជិកអឺរ៉ុប និងកាណាដាផ្តល់មូលនិធិសម្រាប់​ការ​ទិញអាវុធអាមេរិកសម្រាប់ទីក្រុងកៀវ។ ដាណឺម៉ាក ហូឡង់ ន័រវែស និងស៊ុយអែត បានសន្យារួចហើយនូវទឹកប្រាក់ជាង ១ពាន់លានដុល្លារ ក្រោមគំនិតផ្តួចផ្តើមនេះ៕

ដោយ៖ ឈាង

ចុចអាន៖ អធិការបតី​អាល្លឺម៉ង់ បង្ហើប​ថា កិច្ចប្រជុំកំពូលពូទីន-ហ្សេលេនស្គី ធ្វើក្នុងពេល២សប្តាហ៍ទៀត