អគារក្រសួងការងារថៃ រង្គើដោយសាររញ្ជួយដី, មនុស្សជាង ១ពាន់នាក់ ឆោឡោស្លន់ស្លោ

មនុស្សខ្ទង់ពាន់នាក់នាំគ្នារត់ប្រសាចចេញពីអគារក្រសួងការងារថៃ ដោយសារតែអគារកម្ពស់១៥ជាន់មួយនេះរង្គើព្រោះឥទ្ធិពលនៃគ្រោះរញ្ជួយដីកម្រិត ៥.៤រ៉ិចទ័រ ដែលវាយប្រហារឆ្នេរសមុទ្រភាគខាងត្បូងប្រទេសមីយ៉ាន់ម៉ា នៅព្រឹកថ្ងៃព្រហស្បតិ៍ទី២១ខែសីហាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីលោក Santi Nantasuwan អនុរដ្ឋលេខាធិការ​ក្រសួង​ការងារ, មនុស្សជាងមួយពាន់នាក់នៅក្នុងអគារក្រសួង (បូករួមទាំងបុគ្គលិកផងដែរ) ស្រឡាំងកាំងនិងឆោឡោពេលអគាររង្គើព្រោះតែចំហាយរញ្ជួយដីនៅមីយ៉ាន់ម៉ា។ ពួកគេនាំគ្នារត់ចុះក្រោម ហើយមន្ត្រីបានធ្វើការជម្លៀសដើម្បីសុវត្ថិភាព។

ជុំវិញគ្រោះរញ្ជួយថ្មីនេះដែរ ដ្បិតវាកើតឡើងនៅមីយ៉ាន់ម៉ា ប៉ុន្តែថៃកំពុងបារម្ភថា ការរញ្ជួយលើកនេះ មានចំណុចកណ្តាលជិតរាជធានីប្រទេសថៃ ជាងការរញ្ជួយកម្រិតធ្ងន់លើកមុន កាលពីថ្ងៃទី២៨ខែមីនាទៅទៀត។

ការរញ្ជួយថ្ងៃព្រហស្បតិ៍បានវាយប្រហារនាវេលាម៉ោង ១០ព្រឹក ជាមួយចំណុចកណ្តាល១០គីឡូម៉ែត្រ ​ហើយវាមានចម្ងាយចន្លោះពី៤០០-៥០០គីឡូម៉ែត្រពីទីក្រុងបាងកក ពោលគឺជិតជាងការរញ្ជួយកម្រិត៧.៧រ៉ិចទ័រកាលពីខែមីនា ដែលមានចម្ងាយប្រមាណ ១ ០០០គីឡូម៉ែត្រពីរាជធានីប្រទេសថៃ។

យោងតាមក្រសួងធនធានរ៉ែថៃ ការរញ្ជួយលើកនេះគឺបណ្តាលមកពីការបុកនៃផ្ទាំងតិចតូនិក Sagaing ក្នុងសមុទ្រអាដាម៉ាន់ ដូចលើកមុនដែរ ប៉ុន្តែអ្វីដែលកាន់តែបារម្ភគឺថា វាកាន់តែកើតឡើងជិតទីក្រុងបាងកក ដែលនេះអាចបង្កហានិភ័យកាន់តែធំនាពេលអនាគត៕

អត្ថបទ៖ សុខ សុវណ្ណ

ចុចអាន៖ ថៃបារម្ភខ្លាំង ព្រោះរញ្ជួយដី កាន់តែមកកៀក បាងកក