ប៊ិចដែលប្រធានាធិបតីកូរ៉េ ជូនជាអំណោយដល់លោកត្រាំ មានតែមួយគត់ក្នុងលោក

ប៊ិចដែលផលិតដោយដៃពីម៉ាកយីហោកូរ៉េ Zenyle បានក្លាយជាចំណុចកណ្តាលដែលមិននឹកស្មានដល់ នៅក្នុងកិច្ចប្រជុំកំពូលលើកដំបូងរបស់ប្រធានាធិបតីកូរ៉េខាងត្បូង Lee Jae Myung ជាមួយប្រធានាធិបតីអាមេរិក ដូណាល់ ត្រាំ កាលពីថ្ងៃចន្ទ កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឯសេតវិមានក្នុងទីក្រុងវ៉ាស៊ីនតោន ប្រធានាធិបតីកូរ៉េខាងត្បូង បានផ្តល់ប៊ិចដែលបានប្រើសម្រាប់រំលឹកថ្ងៃកិច្ចប្រជុំពិភាក្សា ជាអំណោយដ៏ពិសេសដល់ប្រធានាធិបតីអាមេរិក។ ដោយមិនបង្អង់យូរ លោកត្រាំបាននិយាយជាច្រើនដងថានោះជាប៊ិចល្អបំផុត ដែលជំរុញឲ្យលោក Lee ឆ្លើយតបវិញភ្លាមៗថា នេះជាកិត្តិយសសម្រាប់លោកក្នុងការផ្ដល់ជាអំណោយ។

ដូច្នេះហើយ តើប៊ិចមួយនោះមានភាពពិសេសបែបណា ទើបប្រធានាធិបតីកូរ៉េខាងត្បូង ជូនជាអំណោយដល់លោកត្រាំ?

ប៊ិចនេះត្រូវបានគេរៀបចំដោយក្រុមហ៊ុនកូរ៉េខាងត្បូង Zenyle ដែលជា​ក្រុមហ៊ុន​ល្បី​ខាង​ធ្វើឧបករណ៍ឈើដោយដៃសុទ្ធសាធ។ យ៉ាងណាក៏ដោយ អំណោយដ៏ពិសេសមួយនេះបានស្នើសុំពីការិយាល័យប្រធានាធិបតី ហើយពុំមានគម្រោងលក់សាធារណៈឡើយ។ នោះមានន័យថា វាមានតែមួយដើមលើពិភពលោក ដែលបានធ្វើយ៉ាងសម្រិតសម្រាំងបំផុត និងជាពិសេសសម្រាប់តែលោកត្រាំប៉ុណ្ណោះ។

ដោយឡែក នាយកប្រតិបត្តិក្រុមហ៊ុន Zenyle លោក Kim Yong-hyeon បានប្រាប់សារព័ត៌មាន JoongAng Ilbo ថា ប៊ិចដែលប្រគល់ជូនលោកត្រាំ គឺជាគំរូតែមួយគត់ ដែលមិនមានការលក់រាយ ជាពិសេសត្រូវបានចាត់ចែងដោយការិយាល័យប្រធានាធិបតីផ្ទាល់តែម្ដង។

ប៊ិចមួយ​នេះ​មាន​ប្រអប់​ឆ្លាក់​ដោយ​ដៃ ចំណែកឯប៊ិចវិញក៏បានឆ្លាក់​សត្វបុរាណ phoenix និង​និមិត្តសញ្ញា Taegeuk ពី​ទង់ជាតិ​កូរ៉េខាងត្បូង។ ទឹកថ្នាំរបស់វាគឺជាកំណែដែលបានកែប្រែនៃ Monami Name Pen ដែលជាម៉ាកល្បីនៅក្នុងប្រទេសកូរ៉េ។

មិនទាន់អស់នោះទេ លោក Lee Jae Myung ក៏បានប្រគល់នូវអំណោយដ៏ពិសេសមួយទៀត ជូនលោកត្រាំ ពោល​​​​​​​​​​​​​គឺឧបករ​​​​​​​​​​​​​​​​​​​​​​​​​​​​​​​​​​​​​​​​​​​​​ណ៍ដែលគេប្រើប្រាស់ក្នុងកីឡាវាយកូនហ្គោល។ វាត្រូវបានរចនាតាមបំណងនៅក្នុងប្រទេសកូរ៉េ ដើម្បីឲ្យសមនឹងរូបរាងកាយរបស់លោកត្រាំ និងបានឆ្លាក់ឈ្មោះរបស់គាត់ មុនពេលត្រូវបានប្រគល់ដោយការិយាល័យប្រធានាធិបតី៕

អត្ថបទ៖ សាង ស្រីល័ក្ខ

ចុចអាន៖អតីត​នាយក​រដ្ឋមន្ត្រី​ និង​អតីត​ជំទាវទី​មួយកូរ៉េខាងត្បូង ​ចោទប្រកាន់​ពីបទ​បះបោរ និងសូកប៉ាន់​