អស់ពីចង់សង់របង ពេលនេះ ថៃ ចង់ជីកប្រឡាយនៅព្រំដែន កម្ពុជា ទៀត

អស់ពីចង់សង់របងព្រំដែនលើទឹកដីកម្ពុជា ស្រាប់តែពេលនេះ រដ្ឋមន្ត្រីការពារជាតិស្តីទីថៃ Nattaphon Narkphanit បានលើកឡើងពីគំនិត ជីកប្រឡាយនៅតំបន់ណងចាន់ថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Nation កាលពីថ្ងៃសុក្រទី២៩ខែសីហាឆ្នាំ២០២៥ លោក Nattaphon ​និយាយបន្ទាប់ពីកិច្ចប្រជុំក្រុមប្រឹក្សាការពារជាតិថា មានជម្រើសជាច្រើនសម្រាប់ការសង់រនាំងនៅតាមព្រំដែន ក្នុងនោះមានទាំងលទ្ធភាពនៃការជីកប្រឡាយផងដែរ ដើម្បីសន្សំលុយ។

ការលើកឡើងនេះបង្ហាញពីការខ្វែងគំនិតគ្នារបស់មន្ត្រីថៃ ព្រោះថា មុននោះ នាយករដ្ឋមន្ត្រីស្តីទី Phumtham Wechayachai បានបញ្ជាក់យ៉ាងច្បាស់រួចហើយថា ការសង់របងសីមាអចិន្ត្រៃយ៍មួយ អាចធ្វើទៅបានលុះត្រាកម្ពុជា-ថៃ អាចកំណត់ព្រំដែនប្រទេសទាំងពីរឲ្យដាច់ស្រេចសិន។

លោក Phumtham ទទួលស្គាល់ថា ការសង់របងនេះពិតជានឹងធ្វើឲ្យស្ថានការណ៍កាន់តែតានតឹង ដូច្នេះថៃត្រូវមានការពិភាក្សានិងបញ្ជាក់ឲ្យច្បាស់សិនជាមួយកម្ពុជា ទើបអាចសង់របងបាន។ 

សូមជម្រាបជាថ្មី គំនិតនៃការសង់របងសីមានេះគឺកើតចេញពីមេបញ្ជាការកងកម្លាំងការពារជាតិ Songwit Noonpakdee បន្ទាប់ពីថៃបង្កភាពតានតឹងនៅព្រំដែនមិនចេះចប់ ជាពិសេសការដាក់បន្លាលួស ព័ទ្ធយកដីខ្មែរតែម្តង៕

អត្ថបទ៖ សុខ សុវណ្ណ

ចុចអាន៖ Phumtham៖ បើថៃ ចង់សង់របងព្រំដែន ត្រូវកំណត់ខ័ណ្ឌសីមាជាមួយកម្ពុជា ឲ្យដាច់ស្រេចសិន