ភ្ញាក់ផ្អើល! គីម ជុងអ៊ុន នាំកូនស្រីទៅចិន ធ្វើឲ្យអន្តរជាតិ មើលឃើញកាន់តែច្បាស់ថា ជាអ្នកស្នងតំណែង

លោក គីម ជុងអ៊ុន ធ្វើឲ្យពិភពលោកភ្ញាក់ផ្អើលយ៉ាងខ្លាំង ដោយមេដឹកនាំកូរ៉េខាងជើងរូបនេះ បាននាំកូនស្រីទៅចូលរួមក្នុងពិធីដង្ហែក្បួនព្យុហយាត្រាយោធានៃទិវាជ័យជម្នះខួបលើកទី៨០ក្នុងប្រទេសចិន ខណៈវត្តមានកូនស្រីរបស់លោក ត្រូវបានមជ្ឈដ្ឋានអន្តរជាតិ មើលឃើញកាន់តែច្បាស់ថា អាចជាអ្នកស្នងតំណែងរបស់ប្រទេសអធិរាជនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC, លោកគីម និងកូនស្រីឈ្មោះ គីម ជូអេ បានទៅដល់ទីក្រុងប៉េកាំងតាមរថភ្លើងពាសដែកកាលពីថ្ងៃអង្គារទី២ខែកញ្ញាឆ្នាំ២០២៥ តាមការអញ្ជើញរបស់ប្រធានាធិបតីចិន ស៊ី ជីនពីង ដើម្បីចូលក្បួនដង្ហែយោធាទ្រង់ទ្រាយធំបំផុតរបស់ចិន ដែលជាការរំលឹកដល់ជ័យជម្នះលើជប៉ុន ក្នុងសង្គ្រាមលោកលើកទី២។

តាមពិតទៅ គីម ជូអេ ត្រូវគេចង្អុលចំៗជាយូរមកហើយថា ជាអ្នកតំណែងលោកគីម ប៉ុន្តែទើបលើកនេះប៉ុណ្ណោះដែលគេឃើញភាគរយកាន់តែខ្ពស់ ព្រោះនាងបានចូលរួមក្នុងពិធីដ៏ធំបែបនេះ។

កាលពីឆ្នាំទៅ ភ្នាក់ងារចារកម្មកូរ៉េខាងត្បូង ហៅកាត់ NIS បានប្រាប់សមាជិកសភា ក្នុងសម័យប្រជុំបិទទ្វារថា កុមារីរូបនេះ អាចជាអ្នកបន្តវេនក្នុងគ្រួសារត្រកូលគីម ដែលនឹងត្រូវដឹកនាំប្រទេសកូរ៉េខាងជើង ខណៈរូបនេះកំពុងសិក្សាអំពីមេរៀនពាក់ព័ន្ធភាពជាអ្នកដឹកនាំប្រទេស ត្រៀមឡើងស្នងតំណែង។

សូមជម្រាបថា គីម ជូអេ បានបង្ហាញខ្លួនជាសាធារណៈលើកដំបូងក្នុងខែវិច្ឆិកា ឆ្នាំ២០២២ នៅពេលនាង ទៅមើលការសាកល្បងមីស៊ីលផ្លោងអន្តរទ្វីប Hwasong-17 ជាមួយឪពុក។

ចាប់តាំងពីពេលនោះមក នាងបានបង្ហាញខ្លួនរាប់សិបដង ដោយអមដំណើរមេដឹកនាំកូរ៉េខាងជើងទៅកាន់ទីតាំងបាញ់មីស៊ីល មូលដ្ឋានយោធា កម្មវិធីរដ្ឋ និងសូម្បីតែព្រឹត្តិការណ៍កីឡា។

យោងតាម ​​NIS, កុមារី ជូអេ មានអាយុប្រហែល១២ឆ្នាំ ហើយត្រូវបានគេជឿថា ជាកូនទីពីរក្នុងចំណោមកូនទាំងបី របស់លោក គីម ជាមួយភរិយាឈ្មោះ រី ស៊ុលជូ៕

អត្ថបទ៖ សុខ សុវណ្ណ

ចុចអាន៖ កូរ៉េខាងត្បូង៖ កូនស្រីលោក គីម អាយុ១១ឆ្នាំ ​ត្រៀមឡើងដឹកនាំប្រទេស ស្នងតំណែងឪពុក